Wikiversity

Lech
elv
Lech i Augsburg
Land	Tyskland,  Austerrike
Nedslagsfelt	4 126 km²
Lengd	264 km
Middelvassføring	200 m³/s
Kjelde	Dei nordlege kalksteinsalpane
•  høgd	1 865 moh.
Munning	Donau
•  høgd	392 moh.
Lech 47°10′25″N 10°00′14″E / 47.173611111111°N 10.003888888889°E / 47.173611111111; 10.003888888889
Wikimedia Commons: Lech (river)

Lech (latin Licus, Licca) er ei elv i Austerrike og Tyskland, og ei av sideelevene til Donau frå høgre med ei lengd på 264 km og eit nedslagsfelt på 4 126 km².

Ho har sitt utspring frå innsjøen Formarinsee i Alpane i den austerrikske delstaten Vorarlberg. Ho renn i retning nord-nordaust og kryssar grensa til Tyskland ved Lechfall, ein tolv meter høg foss, før ho går inn i eit smalt gjel (Lechschlucht). Ho går så innover Fussensletta i Bayern der ho tidlegare danna grensa til Schwaben. Ho renn gjennom byen Füssen og så ut i Forggensee. Her dannar ho elvestryk.

Elva renn vidare nordover gjennom eit område kalla Lechrain og gjennom byane Schongau, Landsberg, Augsburg (der ho renn saman med Wertach) og Rain, før ho renn ut i Donau like forbi Donauwörth. Det er ikkje mogeleg med transport på elva på grunn av dei strie straumane og stundom grunne grusparti. Frå Neuschwanstein-slottet, nær Füssen, kan ein få eit flott utsyn over Lechdalen.

Fleire gonger gjennom tidene har elvebreidda vore åstad for historiske hendingar.

• I 278 vann den romerske keisaren Probus eit slag mot invaderande burgundarar og vandalar, som hadde plyndra store delar av den romerske provinsen Rhaetia.
• Ved Lechfeld, ei steinslette mellom Lech og Wertach, nær Augsburg, vann Otto I av Det tysk-romerske riket eit slag over ungararane i august 955.
• I Slaget ved Rain i april 1632 vann Gustav II Adolf av Sverige eit slag og drap grev Johan Tzerclaes Tilly. Dei mykje frykta og respekterte hakkapeliitta frå Finland medverka i dette slaget.

Wikimedia Commons har multimedia som gjeld: Lech