Wikiversity

Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.

Warschau (Pools: Warszawa) ies de hoofsjtad van Pole. Mèt 1 726 600 (2014) inweunersj ies 't ouch de groatste sjtad van 't land. Warschau liegk aan de Weichsel in de provincie Mazovië.

Warschau woort veur 't ièrsj vermeld in 1241. Doe waor 't nog mer e klein vössjersjdörpke. Warschau waor ièrsj de hoofsjtad van 't vorstedom Mazovië. In 1596 verplaatsjde de Poolse keuning zien residentie van Krakau nao 't centraler gelege Warschau.

In de jaore 1655-1660 woort de sjtad bezat door de Zjwede, die allerlei kosbaarhede mètnaome nao hun vaderland.

In d'n Twiède Waereldoorlog woort de sjtad groatendeils verwoes. Nao d'n oorlog haet me 't centrum in de ouw sjtiel herboewd. Tegewoordig sjteit de sjtad op de Waerelderfgoodlies van UNESCO. De restauratie neump me ouch waal: 't wónder van Warschau.

't Centrum van de ouw sjtad ies de Rynek, de mert, umgeve door kleurige hoezer, die tösje 1949 en 1963 minutieus herboewd woorte onder leijing van 'ne Russische arsjitek. Ouch ander sjtraote en 'n deil van de ouw umwalling (met 't bastion Barbakan) woorte hersjtèld.

Aan de rand van de ouw sjtad liek 't Keuninklik Paleis en de aan keuning Sigismund III Wasa opgedrage gedènkzuul. Sigismund waor de keuning dae Warschau es hoofsjtad koos.

Ten weste van de ouw binnesjtad ies nao de Twiède Waereldoorlog e nuuj centrum geboewd. Dit deil van de sjtad haet hoag, modernistische geboewe en breij sjtraote, dèks mèt vrieliegkende trambane. Hie liek ouch 't Paleis veur Cultuur en Weitesjappe, e kolossaal boewwerk in stalinistische sjtiel. 't Woort geboewd tösje 1952 en 1955 en waor e gesjènk van Stalin aan de sjtad.

• Officieel website van Warschau
• Warschau bie Wikivoyage

Commons: Warszawa – Media gerelateerd aan dit óngerwerp