Wikiversity
Tonsi
![](https://upload.wikimedia.org/wikipedia/commons/thumb/b/ba/Atheismsymbol_endorsed_by_AAI.svg/220px-Atheismsymbol_endorsed_by_AAI.svg.png)
Ateisme nopo nga okon ko iso agama nga iso kotumbayaan do aiso Kinoringan. Kotumbayaan diti kopisulak do teisme, iri no tu kotumbayaan di monorimo do iso Tuhan. Sundung pia do kotumbayaan aiso Tuhan diti haro no mantad id zaman kuno, miagal ko maso zaman jahiliah, nga id abad ke-19, nokoingkakat oo ateisme sabaagi iso kotumbayaan om ralan momusorou, aasil mantad kobulunun tongo pakar momusorou do momoros aiso Tuhan miampai huyadan diolo kondii. Tokoh-tokoh ateisme it bobos otutunan nopo nga miagal ko ii Friedrich Nietzsche (1844–1900), om nogi ii Karl Marx (1818–1883).
Hogot "Atiesme" naanu mantad boros Yunani ἄθεος (atheos), ii kirati do "Aiso Kinoringan (Tuhan)". Hogot diti gunoon do tinimungan di au otumbayaan do kaharaan Kinoringan it sasambaaon do tinimungan majoriti id iso-iso kinoyonon. Miampai koburuon do "Kosinggawaan pomusarahan" om kritikan kumaa agama, pomogunoon hogot diti lobi spesifik om oulud. Abad ke-18 nopo nga timpu di kumoiso haro tulun mangakun sabaagi Aties, om Revolusi Perancis nopo nga kaantakan kumoiso id kiwaa sokodung mantad politik kumaa pomusarahan diti.
Huyadan di monokodung do atiesme naanu maya ponginsamakan sajara, falsafah om sosial. Iso mantad ogumu rasional di au mangakun do ki-Kinoringan nopo nga aiso emprikal, kobolingkahangan koinggoritan om kobolingkahangan logikal.
Ginumu tulun di kikotumbayaan ateis au okiro sabab koimbulayan do ateisme diti nopo nga mogisusuai. Pogintangan taang global kohompit subjek diti nindalan do Gallup International. Aasil pogintangan diti iti naanu id toun 2015 nakaanu do 11% mantad 64,000 responden mangakun do yolo nopo nga poimponu songulun ateis, om pogintangan gulu it nokoindalan id toun 2012 nakaanu do 13% responden mangakun do songulun ateis. Tumanud nogi do pogintangan diti, tanah Eropah om Asia Kosilaon nopo nga kinoyonon di kiwaa ginumu tulun di mangakun sabaagi aties do bobos togumu. Id toun 2015 nogi, soginumu 61% mogigion id pogun Cina mangakun sabaagi ateis. Tumanud pogintangan "Eurobarometer", soginumu 20% mogigion id European Union (EU) nokoboros do au otumbayaan kumaa kinorohingan toi ko nunu nopo entiti do sambaon.
Friedrich Nietzsche nopo nga iso mantad ogumu ahli falsafah it mongunsub kopio do kotumbayaan ateisme, miampai boros do "Napatai no oo Kinoringan" (Jerman: Gott ist tot). Boros diti nogi ii nakaanu pinagagang do tongoulun kotonobon maso di. Ahal nogi ii nosiliu sabaai kinotumpuhon do kosimbanan do umat-umat mantad id kotonobon. Au no di berorientasikan Kristian.
Pounayan ateisme
- Montok huyadan do kaharaan Kinoringan, sukuo Tuhan
Sabaagi iso korotian, atiesme nga kiwa pounayan toi ko huyadan di kouhup popotolinahas do kotumbayaan ingga kinoringan. Pounayan-pounayan di nopo nga kagal id siriba:
- Kaharaan Kinoringan au kogonop do kriteria kaharaan
Aiso tinan do kinoringan di milo opurimanan do deria om au nogi otorimo do nunu nopo mesin-mesin. Mantad di, kaharaan Kinoringan di kotumbayaan do tulun ginumuan nopo nga khayalan no. - Koinggoritan id pomogunan
Kobolingkahangan do koinggoritan om karaatan it nadadi id pomogunan popokito do kinoringan miampai sundu takawas dau au otopot. Ahal di popoimbulai do poguhatan, "sokiro nopo do otopot kopio haro Kinoringan nga nokuro tu haro koinggoritan om karaatan id pomogunan?" - Kobolingkahangan Logikal
Poguhatan "Haro nangku sundu do Kinoringan momorun do watu di bobos awagat gisom ii Kinoringan kondii nga au kakakat?". Poguhatan diti popokito do kosunduan ii haro id Kinoringan au kaanu kosimbar do logik. - Teori Pragmatisme
Winorun di tulun oo Kinoringan sabaagi iso medium kouludan sosial di osonong om torigi montok monoguang do kapataion om koinggoritan. - Aiso kopionitan
Haro ribu-ribu agama id pomogunan om monikid agama di kiwaa imej Kinoringan kondii om misulak miampai iso om iso. Kodung otopot do haro iso kinoringan do bobos aadil om koilo, kowowoyoo diti au adadi.
Faktor-faktor koimbulaian ateisme
Koimbulaian do atiesme nopo nga iso fenomena sosial it nadadi id masyarakat moden. Faktor-faktor koimbulaian dau nopo nga miagal id siriba:
- Koburuon Teknologi om Sains
Miampai koburuon teknologi, au nodi tongoulun sumondiu do sundu di haro id Kinoringan montok monoguang do koinggoritan. Koilaan id gana sains kaanu monimbar do ogumu pogutan tongoulun kokomoi alam semesta ii digulu nopo nga nuru do Kinoringan sabaagi medium sisimbar. - Korotian Sosial-Progresif
Korotian sosial progresif momoros do adat om norma id suangmasyarakat nopo nga iso ahal di kaaanu sumimban tumanud kapamanahan timpu. Lobi-lobi po, tinimungan diti manaandak do nilai kawawagu om monginraat do nilai-nilai di laid. Miampai pomusarahan do agama nopo nga iso mntad kompenen masyarakat di milo sumimban, om tulun di kiwaa po goos migit do agama nopo nga tulun di kiula "konservatif" iso nilai negatif id tinimungan koulunan di dondo. - Faktor Moraliti
Otumbayaan oo aties do moral au nuru kiharo mantad kopurimanan di modosi do neraka om lumansan do koposion id syurga. Tinimungan aties otumbayaan do kaanu oo tulun momonsoi ahal di osonong toi ko araat miampai au nuru kiwaa Kinoringan toi ko syaitan.
Intangai nogi
- Agama
- Kotumbayaan
- Tuhan
Sukuon
- ↑ "Atheist Zone". Pinoopi mantad sanḏad ontok May 18, 2023. Linoyog ontok May 23, 2023.
- ↑ "PDF of the Secular Nation article "A Conventioneer's Delight! Pt 5 of 5"" (PDF). Pinoopi mantad sand̠ad (PDF) ontok 2008-11-21.