LIMSwiki
Südäimišt
Lidnanznam![]() |
Flag![]() |
Valdkund | Peru |
Eläjiden lugu (2015) | 8,852,000 ristitud |
Pind | 2,672,3 km² |
![]() | |
Pämez' | Luis Kastaneda Lossio (2015—) |
Telefonkod | +51-(0)1 |
Aigvö | UTC−5 |
Lim (isp., keč. i aimar.: Lima [ˈlima]) om Perun pälidn da kaikiš suremb lidn. Se om Lim-provincijan administrativine keskuz, nece provincii ei mülü nimiččehe regionha.
Perun KSP:n kaks' koumandest tehtas Limas.
Istorii
Eländpunktan aluz om pandud vl 1535 vilukun 18. päiväl kuti Sjudad-de-los-Reies («Kunigahiden lidn» kätes ispanijan kelespäi). Sid' sijaližed eläjad nimitaškanzihe lidnad Rimak-jogen (isp. Rímac) da sen ümbriolijan tahondan mödhe.
Geografijan andmused
Lidn sijadase valdkundan keskusen suves, Tünen valdmeren suvipäivnouzmaižel randal, Andiden ezimägištol, 0-500 m korktusil. Lidnan keskuz sijadase 15 kilometras valdmerespäi.
Klimat om tropine neps. Päivesen keskmäine lämuz om +16..+22 C° vodes läbi. Minimaline enzne lämuz om +9 C°. Paneb sadegid 7 mm vodes, necen tagut voib nimitada klimat pehmdaks-ki letetazangišton. Nepsuz om luja, sikš miše vilu valdmerine Gumbol'dtan joksmuz tuleb Antarktikan randoidennopäi räkile sijile, i se kucub paksuid sumegid da pil'vištod. Lujad manrehkaidused oleldas (1687, 1746, 1940 voded).
Lim jagase 7 administrativižeks ümbrikoks. Ümbrikod alajagasoiš 43 rajonaks.
Eläjad
Vl 2015 eläjiden lugu om 8 852 000 ristitud. Perun kaikutte koumanz' ristit eläb Liman lidnaglomeracijas (9,7 mln v 2015).
Ristitišton enambuz oma vaugedverižed (kaks' videndest), mestizo (vaugedverižiden da indejalaižiden jäl'gelaižed, kaks' videndest) da azijalaižed (kümnendez'). Om enamba katoližen jumalankodikundan uskojid.
Transport
Avtobusad da kiruhavtobusad (El Metropolitano) oma kundaližeks transportaks. Vodespäi 2001 metropoliten radab lidnas (vspäi 2012 om 1 jono, 26 stancijad, 34 km raudted).
Kal'jao-port lugese erižeks eländpunktaks, hot' se om ümbärtud Lim-lidnal koumes polespäi. Se om järed kalatezport Suviamerikas. Raudte 535 km pitte oigendase randaspäi kaivuzidennoks, mugažo sidä kävutadas ozutamha turistoile.
Horhe Čavesan nimel nimitadud rahvahidenkeskeine civiline lendimport (LIM, 23,7 mln passažiroid i 370 tuh. jügutonnoid vl 2018) sijadase 11 km lodeheze lidnan istorižes keskusespäi. Sišpäi tehtas reisid Suviamerikan äjihe maihe da AÜV:oiden surihe lidnoihe, Madridha i Londonha, mugažo Perudme.
Irdkosketused
Suviamerikan pälidnad | ||
Asunsjon | Bogota | Brazilia | Buenos Aires | Džordžtaun | Karakas | Kito | Lim | Montevideo | Paramaribo | Santjago | Sukre | ||