LIMSwiki

Lignin mangrupa sanyawa kimia nu ilahar aya dina kai salaku bagian integral dina pinding sél tutuwuhan, utamana trahéid, serat silem, jeung skléréid. Sanyawa ieu téh kaasup sanyawa organik nu panglobana di alam sahandapeun selulosa. Kadar lignin dina kai, gumantung kana jenis jeung umur kaina, aya kira sapertilu nepi ka saparapat beurat garingna.

Lignin téh ngeusi sela-sela pinding sél antara komponén selulosa, hémiselulosa, jeung péktin, nyaéta pikeun nguatkeun pinding sél (antukna nguatkeun tutuwuhanana).

Ayana lignin téh penting pisan dina nyalurkeun cai dina watang tutuwuhan. Polisakarida dina pinding sél téh hidrofilik pisan, antukna nyerep cai. Tah, ayana lignin téh ngajadikeun aliran cai jadi leuwih éfisién.

Lignin téh hésé pisan diancurkeun, antukna pikeun tutuwuhan mah jadi taméng fisik pikeun ngalawan kuman nu narajang jaringan. Pikeun conto, inféksi ku fungi ngarangsang tutuwuhan pikeun ngagundukkeun leuwih loba lignin dina bagian anu kainféksi.

Kai nu loba ngandung lignin mah teuas, antukna jadi bahan baku nu hadé pikeun rupa-rupa larapan. Mun kaina dipaké suluh, lignin bisa ngahasilkeun énérgi leuwih loba batan bagian selulosana. Najan kitu, pikeun pabrik kertas mah lignin téh nyusahkeun, sabab hésé dileungitkeunana. Mun teu dikurangan/dileungitkeun ligninna, kertas nu dihasilkeun bakal kurang bérésih/bodas. Prosés ngaleungitkeun lignin tina pulp téh hésé, antukna nyerep biaya anu gedé dina prosés produksina.

Dina prosés kraft (chemical pulping ngagunakeun sulfit jeung sulfat), lignin dikaluarkeun tina pulp kai mangrupa sulfat. Sulfat lignin ieu boga sababaraha mangpaat:

• Dispersan dina larapan semén kinerja luhur, formulasi olah cai, jeung ontan tékstil
• Aditif dina industri olahan minyak bumi jeung bahan kimia pikeun tatanén
• Bahan baku pikeun sababaraha bahan kimia, misalna vanili, DMSO, étanol, kapang torula, gula silitol, jeung asam humat

Panalungtikan ngeunaan guna lignin sacara komersil munggaran dipigawé ku Marathon Corporation di Rothschild, Wisconsin (USA), taun 1927. Produk munggaranana nu kira bisa nguntungkeun nyaéta agén leather tanning. Usaha kimia lignin Marathon kiwari katelah LignoTech USA, Inc., nu dipimilik ku pausahaan Norwégia, Borregaard.

Lignin téh makromolekul nu massa molekulna leuwih ti 10.000 amu, watekna hidrofobik jeung aromatik. Molekulna diwangun ku rupa-rupa ulangan substruktur anu polana acak.

• Lignin, Wikipédia édisi basa Inggris (3 Agustus 2006)

• Biosynthesis pathway of lignin Archived 2005-12-27 di Wayback Machine
• The Lignin Institute Archived 2006-08-20 di Wayback Machine