LIMSwiki
Ìnnici
La ISO è n'urganismu ntirnazziunali pâ difinizzioni dî standard, cumpostu di rapprisintanzi d'òrgani nazziunali, ca pruduci standard nnustriali e cummirciali a liveddu munniali.
È canusciutu cu noma diversi a secunna dî diffirenti lingui dî nazzioni ntê quali òpira: n Italia è chiamatu Organizzazione Internazionale per le Standardizzazioni, mentri lu nomu ngrisi, cchiù diffusu, è International Organization for Standardization. Nuddu di sti noma è n'acrònimu.
Puru siddu l'ISO s'autudifinisci comu urganizzazzioni nun cuvirnativa, la sò capacitati di stabbiliri standard ca addivèntanu liggi, attraversu accordi e trattati la rennni assai cchiù putenti di tanti ONG, e n pràttica aggisci comu cunzorziu cu lijami forti chî cuverni. Li participanti cumprènninu n'urganismu di standardizzazzioni p'ogni paisi mèmmiru e pi li principali curpurazzioni.
L'ISO cuòpira strittamenti câ Cummissioni Alittrutècnica Ntirnazziunali (IEC), ch'è rispunzàbbbili pâ standardizzazzioni di l'equipaggiamenti alèttrici.
Ginirarmenti li normi ISO vennu riciputi, armunizzati e diffusi n Italia di l'enti talianu UNI ca partècipa, n rapprisintanza di l'Italia, a l'attivitati nurmativa ISO.
L'urganizzazzioni veni nurmarmenti chiamata ISO. Lu tèrmini ISO nun è n'acrònimu, puru siddu assimigghia ô nomu ngrisi di l'assuciazzioni, "International Organization for Standardization", cumunimenti chiamata macari "International Standards Organization. Lu tèrmini diriva dû grecu isos, ca signìfica aguali. Siddu fussi n'acrònimu fussi OIS n talianu, IOS n ngrisi, OIN n francisi, e UNS n sicilianu quinni li sò funnatura sciggheru ISO comu furma accurzata univirsali.
Li standard ISO sunnu nummirati, e hannu nu furmatu dû tipu "ISO 99999:yyyy: Tìtulu" unni "99999" è lu nùmmiru dû standard, "yyyy" è l'annu di pubbricazzioni, e "Tìtulu" discrivi l'uggettu.
Tanti file mmàggini dî vari tipi di CD ùsanu l'estinzioni "ISO" a nnicari ca ùsanu lu filesystem standard ISO 9660. Virtuarmenti tutti li computer cu nu litturi CD-ROM ùsanu stu standard. Li DVD-ROM midemma ùsanu lu filesystem ISO 9660.
L'ISO e la lingua siciliana
La lingua siciliana è arricanusciuta di l'ISO cu dui còdici linguìstici (unu dî dui è cchiù ricenti di l'àutru): ISO 639-2 SCN e ISO 639-3 SCN.