LIMSwiki

Les Êtats d'Jèrri est l'parlément d'Jèrri.

Lé Président:

Lé Bailli

53 membres êlus:

Des membres tchi n'ont pon l'drouait d'voter:

Histouaithe

Nou n'peut pon dithe exactément quand tchi' qu'Les Êtats fûdrent êtablyis. Mais j'savons tch'il' existaient au tchînzième siècl'ye, et probabliément longtemps d'vant chu temps-là étout. D'après La Chronologie de Jersey, oulle existait en 1497. Lé 28 d'Octobre dé ch't' année-là, L's Êtats fîdrent des règl'yes au sujet d's êcoles St. Mannelier et St. Anastase. I' n'pathaît pon y'aver grand'chose par êcrit tchi peut nouos donner la date dé lus originne. Charles Lé Tchêne, dans san "Constitutional History of Jersey", nouos dit qué les r'cords des Êtats c'menchîtent en l'année 1602 mais tch'il' avaient 'té dêtruits d'vant ch'la dans un feu.

Les Êtats ont changi avaû les siècl'yes comme Jèrri li-même, car aut'fais i' 'taient constitués difféthemment tch'i' n'lé sont achteu. Par exempl'ye, les 12 Juges (Jurés-Justiciers) siégeaient dans L's Êtats aussi bein qué sus L'Banc d'Justice dans La Cour Rouoyale, et ch'tait ieux tch'étaient nommés à la tête des difféthents Conmités.

Les douze Recteurs dé l'Île y prannaient lus pliaiche étout et les douze Connêtabl'yes et les Députés tchi sont êlus par châque pâraisse.

Les Mêssieux d'La Couronne 'taient là étout, mais ouaithe tch' i' fûssent tchiquefais d'mandés d'donner lus opinion officielle sus la légalité dé tchique proposition d'vant La Chambre i' n'avaient pon l'drouait d'voter. Moussieu l'Bailli est l'Président d's Êtats et ouaithe qué lé Lieut'nant-Gouvèrneux sait pèrmîns d'siégi (sans voter) à côté du Bailli, san siège est tchiques pouces pus bas qué l'chein du Bailli.

Lé 12 dé Juilet 1919 les Êtats votîtent la louai tchi pèrmettait ès femmes tch'avaient au mains 30 ans l'drouait d'voter. L'êlection d'un Juge en 1920 fut la preunmié êlection ès Êtats dans tchi les femmes pûtent voter aînchîn. En 1924, la louai pèrmînt ès femmes d'lus mett' sus les rangs pouor Députée, mais ch'fut la Danme Ivy Forster tchi d'vînt la preunmié Députée êlue.

Les Êtats ont veu un tas d'changements d'pis la dreine dgèrre et l'Otchupâtion et sustout d'pis 1948, car lé 29 d'Avri 1947 les gens fûdrent învités à voter dans les Salles Pârouaîssiales pour ou contre la r'forme d's Êtats, et 64 pour chent votîdrent en faveur, et 36 pour chent contre. Lé 17 Févri 1948, la r'forme fut adoptée par Les Êtats mêmes. Auprès les r'formes, les Juges fûdrent rempliaichis par douze Sénateurs, et les Recteurs n'avaient pus l'drouait d'siégi dans L's Êtats, et les v'là don mîns à la porte étout, et rempliaichis par les vîngt-huit Députés êlus par châque pâraisse. Les Connêtabl'yes y sont tréjous mais y'a même cèrtaines gens tchi veulent les fliantchi à la porte étout. Lé Douoyen siège et peut pâler mais pas voter. Y'a, don, chînquante-trais membres êlus; douze Sénateurs (six êlus touos les trais ans), à ch't heu vîngt-neu Députés d'pâraisse êlus touos les trais ans et les douze Connêtabl'yes tchi, ieux étout, sont êlus par lus pâraisses pouor eune période dé trais ans.

Les Jurés-Justiciers sont êlus par un Collège Êlectoral à ch't heu à la pliaiche d'êt' êlus par lé peupl'ye. Ch'tait l'pus grand honneu pour un Jèrriais d'êt' êlu Juge par les vouaix dé toute l'île auprès d'longues années d'sèrvice comme Connêtabl'ye ou d'tchique aut' poste, mais ch'n'est pus la même chose.

Lé système des conmités tch'avait duthé d'pis 1524 fut aboli en 2005 quand l'système minnistéthiel fut întroduit auve l'êlection par l's Êtats du preunmié Chef Minnistre épis l's aut's minnistres pouor gouvèrner l'Île.

Langues

L'Français et l'Angliais sont acouo les deux langues officielles dans l's Êtats et jusqu'ès preunmiéthes années du vîngtchième siècl'ye nou ouïyait touos les d'bats en Français. Nou fait tréjous la priéthe en Français et tchiques phrases dé cérémonie. Y'a acouo d's amendements ès louais en Français faits en Français et les votes pour ou contre fûtent exprînmés en Français jusqu'à l'întroduction d'vot'tie êlectronnique.