LIMSwiki
En mitolojia germanica, Tor (o Thor, de norsce vea Þórr) es un dio ci, con sua martel, causa la tona e lampo e proteje umania. Lo es ance asosiada con tempestas, cuercos, e fertilia. Varias de esta dio aveni en engles vea como Þunor e deutx alta vea Donar. Tota nomes deriva de germanica vea reconstruida *Þunraz ("tona").
Tor es notada multe tra la istoria scriveda de la popla germanica, de la ocupa par la romanes de rejiones de Germania, a la estendes tribal de la periodo de migra, a sua popularia alta en la eda de vicinges, cuando, en la fas de la prosede de cristiani de Scandinavia, sinias de sua martel Mjölnir ia es portada e nomes personal con sua nom ia mostra sua popularia continuante.
Naras cual inclui Tor es sola atestada en norsce vea, car la mitolojia ia es xef arcivida en material islansce, con multe naretas en cual Tor es la eroe. En esta fontes, Tor ave a min 15 nomes, es descriveda como la sposo de Sif, la diva con la capeles oro, es la amor de la jotunn ("jigante") Jarnasaxa, e es jeneral descriveda como ave oios ferosa e capeles e barba roja. Con Sif, Tor ia es la padre de la diva e valkyria Þrúðr (Trud); con Jarnaxa, el es la padre de Magni; con un fem no nomida el es la padre de Móði (Modi); e el es la estrapadre de la dio Ull. Como la fio de Odin, Tor ave multe frates, incluinte Balder. Tor ave du servintes, Þjálfi e Röskva, usa un caro traeda par du capras Tanngrisnir e Tanngnjóstr, cual el come e alora revive, e ave tre abitadas Bilskirnir, Þrúðheimr, e Þrúðvangr. Tor porta un martel cual pote crase montes nomida Mjolnir, porta la sintur Megingjörð e gantos de fero Járngreipr, e posese la basto Gríðarvölr. La aventuras de Tor, incluinte sua mata sin fini de sua enemis e batalias con la serpente monstrin Jormungandr - e ambos sua moris en la avenis de Ragnarok - es rejistrada en multe mitos norsce.
En la periodo moderna, Tor continua es notada en folclor campanial tra Europa en paises en cual on parla linguas germanica. Tor es frecuente notada en nomes de locas e en nomes personal, spesial en Scandinavia. La dia de la semana - jovedi - es en la linguas germanica derivada de sua nom: En engles, lo es Thursday, de la engles vea Þūnresdæg ("dia de Þunor"). Tor ia inspira multe obras de arte e referes a Tor apare en cultur popular moderna. Como otra dios germanica, la adora de Tor es reviveda aora en relijios pagan nova.
