LIMSwiki
Catar (ofisial la Stato de Catar) es un pais en Asia ueste, ocupante un penisola peti (la Penisola Catar) a la costa norde-este de la Penisola Arabi. Sua sola frontera de tera es con Arabia Saudi a la sude; la resta de sua teritorio es ensircada par la Golfo Persian. Un braso de esta golfo separa Catar de la pais e isola visina Barain.
Pos la rena osmanian, Catar ia deveni un protejeda brites en la temprana de la sentenio 20, asta gania autonomia en 1971. Catar ia es renada par la Casa de Thani de la temprana de la sentenio 19: Xec Jassim bin Mohammed Al Thani ia es la fundor de la Stato de Catar. Catar es un monarcia erital, e sua xef de stato es Amir Xec Tamim bin Hamad Al Thani. On disputa esce on debe regarda lo como un monarcia constitual o asoluta. En 2003, la constitui ia es forte aprobada en un referendo, favoreda par cuasi 98%. En la temprana de 2017, Catar ia ave 2,6 milion abitores: 313 mil sitadanes catari e 2,3 milion sitadanes a stranjer.
Catar es un economia de revenu alta, suportada par la reservas tre de la plu grandes de mundo per petrolio e gas natural. La pais ave la revenu la plu alta de mundo per person. Catar es clasida par la Nasiones Unida como un pais de developa umana multe alta, e es jeneral regardada como la stato arabi la plu avansada per developa umana. Lo es un potiosa notable en la mundo arabi, e on ia reporta ce lo ia suporta alga grupos rebelante en la Primavera Arabi, e finansial, e par sua grupo global cresente de medias, Al Jazeera Media Network. Per sua grandia, Catar ave un influe nonproportial en la mundo e on ia identifia lo como un potiosa media. Lo va ospita la Copa de Mundo de FIFA de 2022, deveninte la pais arabi prima cual fa esta.
En junio 2017, en un alti de tensas esistente, Arabia Saudi, Barain, la Amirias Arabi Unida e Misre, entre otra paises de la Golfo Persian, ia aborta sua relatas con Catar, acusante lo de suporta e finansia terorisme e de manipula cosas interna de paises visina.
La area es sirca 11 437 cilometres cuadrida.
La site capital es Doha.
La lingua major es arabi.