LIMSwiki

La Laura Antonelli, nóm 'd art dla Laura Antonaz (Pòla, 28 ad Nuvémbar dal 1941 - Ladìspuli, 22 ad Śugn dal 2015), l'è stada n'atōra itagliàna.

L'à catâ 'l sucès in dal 1973 faghénd la prutagunìsta dal film Malizia ad Salvatore Samperi par pò cuntinuàr in di an Stanta e Utànta cun la cumèdia alśēra a l'itagliàna. I dgìv'n ad lē ch'la gh'iva 'n grugn 'd àngil su 'n còrp da pcadōra^[1].

Nada in Ìstria quànd l'éra incóra itagliàna, dòp la secónda guèra mundiàla l'è custréta a lasàr al tèri in du l'éra carsùda par spatinàr cun la sò famìja a Nàpuli. Prima 'd tacàr a far l'atōra la mét a frut al sò diplòma in Educasiòṅ Fìśica faghénd l'insgnànta in un lìceo artìstic ad Róma. A vint-quàt'r an la sa spóśa cun Enrico Piacentini ma la 'l lasa dagnóra subìt par pò tacàr na relasiòṅ prima c'n al còmig Mario Marenco e pò, da 'l 1972 a 'l 1980, cun 'l atōr francéś Jean-Paul Belmondo cgnusû in dal set dal film ad Claude Chabrol dal 1972 Trappola per un lupo. Sèmp'r in c'l an lè la lavóra cun Lucio Fulci in dla cumèdia Nonostante le apparenze... e purché la nazione non lo sappia... All'onorevole piacciono le donne méntar 'l an prima l'à sunâ nuda al viulunsèl in Il merlo maschio ad Pasquale Festa Campanile.

In dal 1973 la dvènta famóśa muntànd insìma a na scalàmpia, ch'i sa vdìvan tut al mudàndi da 'd sóta, in Malizia. 'L an dòp la vins al „Glōb 'd Òr“ par la cumèdia ch'la tulìva in gir al gènar „Feuilleton“ Mio Dio, come sono caduta in basso! ad Luigi Comencini. I èṅ i an più bèi dla sò caréra parchè pò la gira di film par Luchino Visconti (L'innocente), par Mauro Bolognini (Gran bollito) e p'r Ettore Scola (Passione d'amore).

In di an Utànta la gira di film eròtic (La gabbia e La venexiana) e dal cumèdi ad caséta cuma Grandi magazzini, Rimini Rimini e Roba da ricchi.

In dal 1991 la tórna a lauràr cun Salvatore Samperi in Malizia 2000 ma la pelìcula l'è 'n diśàstar da 'l punt ad vista artìstic e cumersiàł. Dòp n'uperasiòṅ ad belésa andàda mâł ch'la gh ruìna la ghigna infiànd-'g-la, la nòt dal 27 'd Avrìl dal 1991 i gh càt'n in cà 36 gram 'd cucaìna e la Laura la finìs acsè in parśòṅ par siē dè. I tàcan di prucès ch'i vàn'n avànti par dimóndi an ch'i gh ruìnan la vita. In prim grâd i giùdas i la cundànan a tri an e siē méś par spać ad dròga pò in apèl, nóṿ an dòp, i la màndan libra dgénd ch'la tulìva la dròga par lē e minga par véndar-la.

Tacànd da i an Dumìla la patìs la depresiòṅ e l'è custréta a vìvar cun na pensiòṅ da fam, sincsènt euro a 'l méś. In tut al manéri la Laura la fà savēr ch'la n vōl briśa 'l ajùt dla Léǵ Bacchelli par gl'artìsta in daśgràsia ma ch'la vōl sōl èsar daśmindgàda. La mōr da par lē in dla sò cà 'd Ladìspuli a stanta-tri an par 'n infàrt^[2].

• 1964 - Il magnifico cornuto, regìa 'd Antonio Pietrangeli
• 1965 - Le sedicenni, regìa ad Luigi Petrini
• 1966 - Le spie vengono dal semifreddo, regìa ad Mario Bava
• 1966 - Scusi, lei è favorevole o contrario?, regìa 'd Alberto Sordi
• 1968 - La rivoluzione sessuale, regìa ad Riccardo Ghione
• 1969 - L'arcangelo, regìa ad Giorgio Capitani
• 1969 - Un detective, regìa ad Romolo Guerrieri
• 1969 - Venere in pelliccia (alias Le malizie di Venere), regìa ad Massimo Dallamano
• 1970 - Sledge (A Man Called Sledge), regìa ad Vic Morrow
• 1970 - Gradiva, regìa ad Giorgio Albertazzi
• 1970 - Incontro d'amore, regìa ad Paolo Heusch e 'd Ugo Liberatore
• 1971 - Gli sposi dell'anno secondo (Les mariés de l'an II), regìa ad Jean-Paul Rappeneau
• 1971 - Il merlo maschio, regìa ad Pasquale Festa Campanile
• 1971 - Senza movente (Sans mobile apparent), regìa ad Philippe Labro
• 1972 - Nonostante le apparenze... e purché la nazione non lo sappia... All'onorevole piacciono le donne, regìa ad Lucio Fulci
• 1972 - Trappola per un lupo (Docteur Popaul), regìa ad Claude Chabrol
• 1973 - Malizia, regìa ad Salvatore Samperi
• 1973 - Sessomatto, regìa ad Dino Risi
• 1974 - Peccato veniale, regìa ad Salvatore Samperi
• 1974 - Simona, regìa ad Patrick Longchamps
• 1974 - Mio Dio, come sono caduta in basso!, regìa ad Luigi Comencini
• 1975 - Divina creatura, regìa ad Giuseppe Patroni Griffi
• 1976 - L'innocente, regìa ad Luchino Visconti
• 1977 - Gran bollito, regìa ad Mauro Bolognini
• 1977 - Mogliamante, regìa ad Marco Vicario
• 1979 - Letti selvaggi, regìa ad Luigi Zampa
• 1979 - Il malato immaginario, regìa ad Tonino Cervi
• 1980 - Mi faccio la barca, regìa ad Sergio Corbucci
• 1981 - Passione d'amore, regìa 'd Ettore Scola
• 1981 - Il turno, regìa ad Tonino Cervi
• 1981 - Casta e pura, regìa ad Salvatore Samperi
• 1982 - Viuuulentemente mia, regìa ad Carlo Vanzina
• 1982 - Porca vacca, regìa ad Pasquale Festa Campanile
• 1982 - Sesso e volentieri, regìa ad Dino Risi
• 1985 - Tranches de vie, regìa ad François Leterrier
• 1985 - La gabbia, regìa ad Giuseppe Patroni Griffi
• 1986 - La venexiana, regìa ad Mauro Bolognini
• 1970 - Grandi magazzini, regìa ad Castellano e Pipolo
• 1986 - Rimini Rimini, regìa ad Sergio Corbucci
• 1987 - Roba da ricchi, regìa ad Sergio Corbucci
• 1990 - L'avaro, regìa ad Tonino Cervi
• 1991 - Malizia 2000, regìa ad Salvatore Samperi

• (EN) Filmugrafìa in s'l IMDb