LIMSwiki
Inhoud
![](https://upload.wikimedia.org/wikipedia/commons/thumb/8/89/Flag_of_WHO.svg/220px-Flag_of_WHO.svg.png)
![](https://upload.wikimedia.org/wikipedia/commons/thumb/c/c2/WHO_logo.svg/220px-WHO_logo.svg.png)
Die Wêreldgesondheidsorganisasie is 'n agentskap van die Verenigde Nasies met sy hoofkwartier in Genève, Switserland. Sy doel is om as koördineerder op te tree ter bevordering van internasionale openbare gesondheid. Die WGO (Engels: WHO – World Health Organisation) het op 7 April 1948 totstand gekom (7 April word ook as internasionale Wêreldgesondheidsdag gevier). Die WGO het tans 192 lidlande.
Organe, personeel en begroting
Die WGO se organe is die jaarlikse Wêreldgesondheidsvergadering, die Uitvoerende Raad met 34 lede en die Sekretariaat met die Direkteur-generaal (tans Tedros Adhanom van Ethiopië) en nege uitvoerende direkteure. Die WGO beskik daarnaas oor ses streekkantore.
Die WGO het tans 4 000 medewerkers, waarvan 1 500 in sy hoofkwartier werk. Die jaarlikse begroting het in die 2006/07 fiskale jaar VS$ 3,313 miljard beloop, waarvan VS$ 924 miljoen in die reëlmatige begroting (ledegelde van lidlande) en VS$ 2,398 miljard se vrywillige bydraes.[1]
Streekkantore
![](https://upload.wikimedia.org/wikipedia/commons/thumb/b/b3/World_Health_Organisation_regional_offices.svg/220px-World_Health_Organisation_regional_offices.svg.png)
Afrika; setel: Brazzaville, Republiek die Kongo
Westelike Pasifiek; setel: Manila, Filippyne
Oostelike Middellandse See; setel: Kaïro, Egipte
Suidoos-Asië; setel: Nieu-Delhi, Indië
Europa; setel: Kopenhagen, Denemarke
Amerikas; setel: Washington, D.C., VSA
Die WGO se streekkantore het hulle setels in die volgende stede:
- Brazzaville (Afrika)
- Washington, D.C. (Amerika)
- Nieu-Delhi (Suidoos-Asië)
- Kopenhagen (Europa)
- Kaïro (Oostelike Middellandse See)
- Manila (Westelike Stille Oseaan)
Die WGO strewe daarna om in steeds meer lidlande verteenwoordig te wees. Die WGO se lopende programme word deur sowat 200 koöperatiewe sentrums en navorsingsinstellings ondersteun.
Hooftake
![](https://upload.wikimedia.org/wikipedia/commons/thumb/6/60/World_Health_Organisation_headquarters%2C_Geneva%2C_north_and_west_sides_2007.jpg/220px-World_Health_Organisation_headquarters%2C_Geneva%2C_north_and_west_sides_2007.jpg)
Die WGO is teen die einde van die 1990's in organisatoriese opsig herstruktureer en konsentreer nou op 'n aantal hooftake soos
- die wêreldwye dokumentasie en inligting oor aansteeklike siektes, hulle oorsake en gepaardgaande sterfgevalle.
- die ondersteuning van Derde-Wêreldlande by die daarstelling van gesondheidsdienste, veral die handhawing en verbetering van gesondheid deur middel van goeie voeding, toegang tot drinkwater en voorsiening van benodigde artsenymiddels,
- die bevordering van mediese navorsing en
- die bestryding van Vigs.
Die klassifikasie van siektes en mediese diagnoses (International Classification of Diseases of ICD-10-kodering), gesondheidsregulasies (International Health Regulations, IHR), van geneesmiddels (Anatomical Therapeutic Chemical, ATC-kodering) asook fisiese gestremdhede (International Classification of Functioning, Disability and Health, ICF) val ook onder die WGO se beheer.
Direkteur-generaals
![](https://upload.wikimedia.org/wikipedia/commons/thumb/0/0b/Mukhisa_Kituyi%2C_Houlin_Zhao%2C_Tedros_Adhanom_Ghebreyesus_with_Sophia_-_AI_for_Good_Global_Summit_2018_%2841223188035%29_%28cropped%29.jpg/170px-Mukhisa_Kituyi%2C_Houlin_Zhao%2C_Tedros_Adhanom_Ghebreyesus_with_Sophia_-_AI_for_Good_Global_Summit_2018_%2841223188035%29_%28cropped%29.jpg)
Die Wêreldgesondheidsorganisasie is op 7 April 1948 gestig.[2]
- Tedros Adhanom (Ethiopië) sedert 1 Julie 2017
- Margaret Chan (Volksrepubliek China) 4 Januarie 2007 – 1 Julie 2017
- Anders Nordström (Swede) 22 Mei 2006 – 4 Januarie 2007 (waarnemend)
- Lee Jong Wook (Suid-Korea) 21 Julie 2003 – 22 Mei 2006
- Gro Harlem Brundtland (Noorweë) 21 Julie 1998 – 21 Julie 2003
- Hiroshi Nakajima (Japan) 21 Julie 1988 – 21 Julie 1998
- Halfdan T. Mahler (Denemarke) 21 Julie 1973 – 21 Julie 1988
- Marcolino Gomes Candau (Brasilië) 21 Julie 1953 – 21 Julie 1973
- Brock Chisholm (Kanada) 21 Julie 1948 – 21 Julie 1953
Verwysings
- ↑ (de) Der Fischer Weltalmanach 2007. Frankfurt am Main: Fischer Taschenbuch Verlag 2006, bl. 600
- ↑ (en) rulers.org: Rulers – International organizations O-W World Health Organization
Eksterne skakels
- (ar) (en) (es) (fr) (pt) (ru) (zh) Amptelike webwerf
- (en) "World Health Organization". Encyclopædia Britannica. Besoek op 16 Februarie 2021.