LIMSpec Wiki

Magas
Магас (ven.)
Магас / Магате (ing.)

Lidnanznam	Flag
Valdkund	Venäma
Eläjiden lugu (2022)	15,279 ristitud
Pind	12,63 km²
Pämez'	Usman Aušev (kezaku 2020—)
Telefonkod	+7−8374-xxx-xxx
Avtokod	06
Aigvö	UTC+3 (MSK+0)

Magas (ven.: Мага́с, inguš.: Магас vai Магате) om Venäman lidn da lidnümbrik. Se om Ingušetijan Tazovaldkundan pälidn da openduzkeskuz, federacijan subjektan kaikiš noremb da kaikiš penemb administrativine keskuz.

Eländpunktan aluz om pandud vl 1994 kuti subjektan pälidn oigendamha Ingušetijan tobmuden pätandoid da tehmaha adminisrativižiden funkcijoiden mödhe. Nimituz om anttud polietnižen keskaigaižen Alanii-valdkundan Magas-pälidnan mödhe i znamoičeb «päiväižen lidn». Sauvomižen aigan löutihe 13 käpid, 43 kaumad i koume kaičenus paloin eländpunktad, läz kaik ned datiruišoiš edel meiden erad.

Magas sai lidnan statusad vl 2000. Vl 2010 lidnan pertišton uz' generaline plan om vahvištadud.

Magas šingotase valdkundaližil holitišil i üläopendusen aluzkundoil.

Lidn sijadase Sunž-jogen oiktal randal, 540..600 m korktusil valdmeren pindan päl, tazovaldkundan päivlaskmas, 500 metrad Pohjoižosetijan — Alanijan Tazovaldkundan röunaspäi. Tazovaldkundan kaikiš suremb Nazran'-lidn om nelläs kilometras lodeheze pälidnaspäi.

Magas om lidnümbrikon üks'jäine eländpunkt.

Vn 2010 kaiken Venäman rahvahanlugemižen mödhe kaikenaigaižiden eläjiden lugu oli 2 502 ristitud. Vl 2017 lidnan ristitišt oli 7 818 eläjad. Kaikiš suremb lidnan ristitišt om nügüd'.

Ingušan valdkundaline universitet^[1] (päkorpus) da Ingušan gumanitarine tedoinstitut Č. E. Ahrievan nimed^[2] sijadasoiš lidnas.

Edeližed lidnan pämehed oma Beslan Cečoev (viluku 2015 — sügüz'ku 2019), Ruslan Arsamakov (reduku 2019 — kezaku 2020).

Avtobusad da taksid ühtenzoittas lidnad Nazraninke. Om velotaksid likkumha lidnadme. Lähembaine raudtestancii radab Nazraniš kahesas kilometras. Federaline «Kavkaz»-avtote sijadase läz lidnad.

Federaline civiline Magas-lendimport^[3] (IGT / ИНШ / URMS, inguš.: Магаса Аэропорт, 333 tuh. passažiroid vl 2019) sijadase 30 km pohjoižpäivnouzmha lidnaspäi Sunž-lidnan röunal. Sišpäi tehtas reisid Moskvha. Rahvahidenkeskeine civiline Vladikavkaz (Beslan)-lendimport (OGZ / ВЛА / URMO, oset.: Дзæуджыхъæуы аэропорт, 705 tuh. passažiroid vl 2021) sijadase 22 km päivlaskmha lidnaspäi avtoteidme. Sišpäi tehtas reisid Moskvha, Piterihe i Stambulha.

• 
  Magas-lidnümbrikon administrativine sauvuz (2010)
• 
  Allei Ahmat-Hadži Kadirovan nimed, vn 2014 nägu
• 
  Ingušan valdkundaline universitet vl 2015 (päkorpus)
• 
  Alanan verai lidnan röunal i Magasan čuhundusen nägu (2015)
• 
  Prospekt Idris Zäzikovan nimed vl 2013

1. ↑ Ingušan valdkundaližen universitetan sait (inggu.ru). (ven.)
2. ↑ Ingušan gumanitarižen tedoinstitutan sait (ingnii.ru). (ven.)
3. ↑ Magas-lendimportan sait (airportmagas.ru). (ven.)

• Lidnümbrikon tobmuden sait (admmagas.ru). (ven.)