LabLynx Wiki

Un eclipse es un astronomico evento que ta ocurri cuando temporalmente oscurecio un astronomico objeto o un espacial nave al pasa na el sombra de otro cuerpo o cuando ta pasa otro cuerpo entre ello y el espectador. Conocio como un sizigia este alineacion de tres maga celeste objeto. Un eclipse el resultao de un ocultacion (completamente oculto) o un transito (parcialmente oculto). Ta ocurri un "profundo eclipse" (o "profundo ocultacion") cuando ta queda un chico astronomico objeto detras de uno mas grande.

Mas frecuentemente usao el termino eclipse para describi con un solar eclipse (cuando ta cruza el sombra del Luna con el superficie del Tierra) o un lunar eclipse (cuando ta entra el Luna na el sombra del Tierra). Sin embargo, puede tambien ele referi a tal maga evento mas alla del sistema Tierra–Luna, por ejemplo un planeta entrando na el sombra proyectao por uno del de suyo maga luna, un luna pasando por el sombra proyectao por el de suyo planeta anfitrion, o un luna pasando por el sombra sombra de otro luna. Tambien puede un sistema de dos maga binario estrella con un eclipse si ta cruza el plano del orbita (del de suyo maga constituyente estrella) con el posicion del observador.

Para el maga especial caso de maga solar y lunar eclipse, ta pasa lang este mage durante un "estacion de maga eclipse", el dos maga vez del año cuando ta cruza el plano del orbita del Tierra alrededor del Sol con (a) el plano del orbita del Luna alrededor del Tierra y (b) el linea definio por el maga plano de interseccion acerca del Sol. Ta depende el tipo de solar eclipse que ta ocurri durante cada estacion (total, anular, hibrido, o parcial) del maga aparente tamaño del Sol y el Luna.

Si, na un paralelo universo, ta queda na el mismo plano el maga orbita del Tierra (alrededor del Sol) y del Luna (alrededor del Tierra), entonces ay pasa maga eclipse cada mes. Mas especificamente, hay un lunar eclipse a cada lleno luna, y un solar eclipse a cada nuevo luna. Y si perfectamente circular ambo maga orbita, cada mes sera cada solar eclipse el mismo tipo. Pero de vuelta na el de kanaton universo, ni planar ni circular el maga orbita (mira con el maga ley de si Kepler), poreso hinde comun el maga eclipse.

Visible el maga lunar eclipse de todo el nocturno mitad del Tierra. Sin embargo, el maga solar eclipse, particularmente el maga total eclipse que ta ocurri na un particular punto del superficie del Tierra, son maga muy raro evento que puede queda separao por manada decada.

Derivao el termino del antiguo griego ἔκλειψις (ékleipsis), que ta significa "el abandono", "el caida" o "el oscurecimiento de un celeste cuerpo", al de suyo vez derivao del verbo ἐκλείπω (ekleípō), que ta significa "abandona", "oscurece" o "deja de existi", un combinacion del prefijo ἐκ- (ek-) —del preposicion ἐκ (ek) "fuera (de)"— y el verbo λείπω (leípō) "queda ausente".

Para dos maga objeto na el espacio, extensible un linea del primero al segundo. Ay bloquea este ultimo objeto con cierto cantidad de luz emitio por el primero, creando con un region de sombra alrededor del eje del linea. Por lo general, ta move este maga objeto entre si y con respecto al de ellos entorno, ansina que ay barre el resultante sombra con un region del espacio, pasando por cualquier particular lugar del region durante un fijo intervalo lang. Visto de tal ubicacion, conocio como un eclipse este evento de sombreao.

Por lo general mas o menos na forma de disco el transversal seccion del maga objeto involucrao na un astronomico eclipse Dividio na tres maga parte el region del sombra de un objeto durante un eclipse:

• El umbra (latin para "sombra"), dentro del cual ta cubri el objeto completamente con el fuente de luz. Para el Sol, este fuente de luz es el fotosfera.
• El antumbra (del latin ante "antes, frente a" y umbra) extendiendo más alla del punta del umbra, dentro del cual ta queda el objeto completamente frente al fuente de luz, pero es demasiado chico para cubri conele por completo.
• El penumbra (del latin paene "casi" y umbra) dentro del cual ta queda el objeto parcialmente lang frente al fuente de luz.

Ta ocurri un total eclipse cuando ta queda el espectador dentro del umbra, un anular eclipse cuando ta queda el espectador dentro del antumbra y un parcial eclipse cuando ta queda el espectador dentro del penumbra. Durante un lunar eclipse, aplicable el umbra y penumbra lang, kay ta queda mucho mas alla del Luna el antumbra del sistema Sol–Tierra. Analogamente, el aparente diametro del Tierra, desde el punto de vista del Luna, es casi cuatro maga vez mayor que el del Sol y, por lo tanto, hinde puede produci con un anular eclipse. Ansina mismo aplicable el maga mismo termino para describi con maga eclipse na otro maga sistema, p.ej. el antumbra de Deimos cruzando con Marte, o Fobos entrando na el penumbra de Marte.

Ta ocurri el primer contacto cuando ta comenza el disco del eclipsante objeto a incidi primero na el fuente de luz; el segundo contacto cuando ta move el disco completamente dentro del fuente de luz; el tercero contacto cuando ta comenza ele a aleja del luz; y el cuarto o ultimo contacto cuando por fin ta deja ele del disco del fuente de luz por completo.

Para maga esferico cuerpo, cuando mas chico que el estrella el eclipsante objeto, el longitud (L) del sombra (na forma de cono) del umbra es —

donde R_s es el radio del estrella, R_o el radio del eclipsante objeto y r el distancia desde el estrella hasta el eclipsante objeto. Para el Tierra, na promedio igual L a 1.384Plantilla:E km, mucho mas grande que el lunar semimayor eje de 3.844Plantilla:E km. Ansina puede el umbral cono del Tierra envolve completamente con el Luna durante un lunar eclipse. Si ta tene el objeto oculto con un atmosfera, sin embargo, posible el refraccion, de parte del luminosidad del estrella, na el volumen del umbra. Ta ocurri esto, por ejemplo, durante un eclipse del Luna por el Tierra, produciendo con un tenue y rojizo iluminacion del Luna (del terrestre punto de vista) incluso durante el totalidad.

Na el Tierra, ta move el sombra proyectao durante un eclipse aproximadamente 1 km/sec. Ta depende esto del ubicacion del sombra na el Tierra y el angulo na el que ta move.

Ta ocurri un ciclo de maga eclipse cuando separao, por un cierto intervalo de tiempo, maga eclipse na un serie. Ta ocurri esto cuando ta forma el maga orbital movimiento del maga cuerpo con maga repetitivo armonico patron. Un particular instancia es el saros, cuyo resultao es un repeticion de un solar o lunar eclipse cada 6.585,3 maga dia, es deci, un poco mas de 18 maga año. Debio a que hinde esto un entero numero de maga dia, visible maga sucesivo eclipse de maga diferente parte del mundo. Na un periodo saros hay 239.0 maga anomalo periodo, 241.0 maga sideral periodo, 242.0 maga nodical periodo y 223.0 maga sinodico periodo. Masquen hinde ta dale el orbita del Luna con maga exacto entero, bastante cercano a maga entero el maga numero de maga orbital ciclo para dale con un fuerte similitud para maga eclipse espaciao a maga intervalo de 18.03 maga año.

Posible un eclipse involucrando con el Sol, el Tierra y el Luna, cuando ta queda ellos na un recto linea lang, permitiendo con el ocultacion de uno detras de otro, visto desde el tercero. Kay inclinao el orbital plano del Luna con respecto al orbital plano del Tierra (el ecliptica), posible el maga eclipse cuando cercano el Luna al interseccion de este dos maga plano (el maga nodo) lang. Ta alinea dos maga vez al año el Sol, el Tierra y el maga nodo (durante un estacion de maga eclipse) y puede maga eclipse ocurri durante un periodo de aproximadamente dos maga mes alrededor de este maga tiempo. Hay entre cuatro y siete maga eclipse na un natural año, que ta repeti segun cuanto ciclo de maga eclipse, como un saros.

Entre 1901 y 2100 hay el maximo de siete maga eclipse na:

• cuatro maga (penumbral) lunar y tres maga solar eclipse: 1908, 2038.
• cuatro maga solar y tres maga lunar eclipse: 1918, 1973, 2094.
• cinco maga solar y dos maga lunar eclipse: 1934.

Excluyendo con el maga penumbral lunar eclipse, hay un maximo de siete maga eclipse en:

• 1591, 1656, 1787, 1805, 1918, 1935, 1982 y 2094.

Como observao desde el Tierra, ta ocurri un solar eclipse cuando ta pasa el Luna por delante del Sol. Na cuanto al tipo de solar eclipse, ta depende esto del distancia del Luna al Tierra durante el evento. Ta ocurri un total solar eclipse cuando ta cruza el Tierra con el umbral parte del sombra del Luna. Cuando hinde ta llega el umbra al superficie del Tierra, parcialmente oculto lang el Sol, dando lugar a un anular eclipse. Ta ocurri un parcial solar eclipse cuanto ta queda el observador dentro del penumbra.

El magnitud de un eclipse es el fraccion del diametro del Sol cubierto por el Luna. Para un total eclipse, firme mayor o igual a uno este valor. Na maga anular y total eclipse, el magnitud de un eclipse es el razon entre el maga angular tamaño del Luna y el Sol.

Maga solar eclipse son maga relativamente breve evento, visible na el totalidad lang, a lo largo de un relativamente estrecho pista. Na el maga mas favorable circunstancia, puede un total solar eclipse durante 7 maga minuto, 31 maga segundo, y visible ele a lo largo de un pista de hasta 250 km de ancho. Sin embargo, mucho mas grande el region donde observable un parcial eclipse. Ay avanza el umbra del Luna hacia el este a un velocidad de 1.700 km/h, hasta que hinde ta cruza ya con el superficie del Tierra.

Durante un solar eclipse, tiene vez puede el Luna cubri perfectamente con el Sol kay el aparente tamaño es casi lo mismo como el del Sol como visto del Tierra. Un total solar eclipse es de hecho un ocultacion mientras que un anular solar eclipse es un transito.

Cuando observao na maga punto del espacio distinto del terrestre superficie, eclipsable el Sol por maga cuerpo distinto del Luna. Ta inclui dos maga ejemplo con (1) el observacion, por parte del tripulacion de Apolo 12, del eclipse del Sol por el Tierra na 1969 y (2) el observacion, por parte del espacial sondeo Cassini–Huygens, del eclipse del Sol por Saturno na 2006.

Ta ocurri maga lunar eclipse cuando ta pasa el Luna a traves del sombra del Tierra. Posible esto durante un lleno luna lang, cuando ta queda el Luna na el otro lado del Tierra del Sol (i.e. por el noche). Hinde como un solar eclipse, observable un lunar eclipse desde casi todo un hemisferio. Por este razon mucho mas comun observa con un lunar eclipse a un cierto ubicacion. Ta dura un lunar eclipse mas tiempo, tardando cuanto horas na completa, mientras que na manada situacion ta promedia el totalidad mismo entre unos 30 maga minuto y mas de un hora.

Hay tres maga tipo de maga lunar eclipse: penumbral, cuando ta cruza el Luna con el penumbra lang del Tierra; parcial, cuando ta cruza el Luna parcialmente con el umbra del Tierra; y total, cuando ta cruza el Luna por completo con el umbra del Tierra. Incluso durante un total lunar eclipse, sin embargo, hinde completamente oscuro el Luna. Ta entra el umbra el solar luz, refractao a traves del terrestre atmosfera, y ta proporciona con un tenue iluminacion. Al igual que na un ocaso, ta tende el atmosfera a dispersa mas fuertemente con el luz con maga mas corto longitud de onda, por lo que ta tene el iluminacion, del Luna por el luz refractao, con un rojo tono, ansina que frecuentemente incuntrao el frase "luna de sangre" na el maga descripcion de tal maga lunar evento durante todo el registrao historia de maga eclipse.

Registrao el maga solar eclipse desde el antigüedad. Utilizable el maga fecha de maga eclipse para el datacion de maga historico registro. Por ejemplo, ta registra un sirio tablilla de barro, na el ugaritico idioma, con un solar eclipse que ya ocurri el 5 de marzo de 1223 AEC, mientras que ta argumenta si Paul Griffin que ta registra un piedra na Irlanda con un eclipse el 30 de noviembre de 3340 AEC. Gracias al uso por parte del maga astronomo del maga registro de maga babilonico eclipse, mayoritariamente del aca-13 siglo AEC, ta tene kita con un factible y matematicamente consistente explicacion para el griego hallazgo de el tres maga lunar medio movimiento (sinodico, anomalistico, draconitico) con un precision de aproximadamente un parte na un millón o mejor.Plantilla:Fix/category^{[clarification needed]} Ta remonta el maga chino historico registro de maga solar eclipse a mas de 3000 maga año, y utilizao este maga para medi con el maga cambio na el velocidad de rotacion del Tierra.

Si Anaxagoras el primer persona na dale con un cientifico explicacion sobre el maga eclipse. Ademas ya declara ele que ta brilla el Luna por el reflejao luz del Sol.

Na el aca-5 siglo EC, ya explica cientificamente si Aryabhata con el maga solar y lunar eclipse na el de suyo tratao Aryabhatiya. Ya dale ele con el mismo explicacion como si Anaxagoras, masquen tambien ya inclui el explicacion de si Aryabhata con el brillo del maga planeta. Ademas, ya explica si Aryabhata con el maga eclipse na maga termino de maga sombra proyectao por, y cayendo sobre, el Tierra. Ya proporciona si Aryabhata con el computo y el tamaño del parte eclipsao durante un eclipse. Tan preciso el maga indio computacion que ya incuntra el frances cientifico del aca-18 siglo si Guillaume Le Gentil, durante un visita a Pondicherry (ahora Puducherry), India, que corto na 41 maga segundo lang el maga indio calculo del duracion del lunar eclipse del 30 de agosto de 1765, mientras que largo na 68 maga segundo el maga astronomico carta de Le Gentil.

Na el aca-17 siglo, ya publica el maga europeo astronomo con maga libro con maga diagrama explicando paquemodo ocurri el maga lunar y solar eclipse. A fin de difundi con este informacion a un mas amplio publico y disminui con el miedo al maga consecuencia del maga eclipse, ya imprimi el maga librero con maga folleto explicando con el evento, utilizando con o el ciencia o el astrologia.

Antes de que bien entendio el maga eclipse, ya tiene un mucho mas temible connotacion na torno a este (y otro) maga aparentemente inexplicable acontecimiento. Ya tiene muy considerable confusion con respecto al maga eclipse antes del aca-17 siglo, kay hinde descrito (de modo muy preciso o cientifico) el maga eclipse hasta que ya proporciona si Johannes Kepler con un cientifico explicacion para el maga eclipse a maga principio del aca-17 siglo. Tipicamente na el mitologia, el comun entendimiento fue que un eclipse fue un variacion u otro de un espiritual batalla entre el Sol y el maga maligno fuerza o el maga espiritu del maga tiniebla. El fenomeno del desaparicion aparente del Sol fue un muy temible espectaculo, para quien hinde ya entende con el ciencia del maga eclipse, o para quien ya apoya con, y ya cree na, el idea de maga mitologico dios. Ya venera manada antiguo religion con el Sol como un principal deidad, y segun algun maga eclipse como el solar dios abrumao por maga maligno espiritu.

Por ejemplo, na el nordico mitologia, postulao que ya tiene un lobo nombrao si Fenrir na constante busqueda del Sol, y un eclipse es un exitoso devoracion del divino Sol por si Fenrir. Segun otro maga nordico tribu, ya tiene dos maga lobo, si Sköll y si Hati, que ansina mismo ya busca y ya devora con el Sol y el Luna, respectivamente.

Na el mayoria de maga mitologia y maga religion, visto el maga eclipse como maga señal del ira del maga dios y un presentimiento de peligro, ansina que na manada situacion, ya altera el gente con el de suyo maga accione na un esfuerzo por disuadi que desata el maga dios con el de ellos ira. Na el hindu religion, por ejemplo, ta canta el gente con maga religioso himno para proteccion del maga maligno espiritu del eclipse, y ta rehusa mucho gente con comida (durante un eclipse) para evita con el maga efecto de maga dicho maligno espiritu. Si ta vivi ellos na el India mismo, ta lava el maga hindu na el Rio Ganges, considerao como un espiritual purificador, inmediatamente despues de un eclipse para alivio del maga maligno espiritu. Na el temprano judaismo y cristianismo, visto algun maga eclipse como maga señal desde Dios, o un muestra del grandeza de Dios o incluso un señal del ciclo de vida y muerte. Sin embargo, visto maga mas ominoso eclipse, como un luna de sangre, como un divino señal de que pronto ay destrui Dios con el de ellos maga enemigo.

Imposible maga eclipse na Mercurio y Venus por falta de ningun satelite. Sin embargo, visto desde el Tierra, puede este maga planeta transita sobre el cara del Sol. Ta ocurri maga transito de Venus na maga par separao por un intervalo de ocho maga año, pero ta ocurri cada par de maga evento menos de un vez a un siglo. Segun NASA, ay ocurri el proximo para de maga transito de Venus el 10 de diciembre de 2117 y el 8 de diciembre de 2125. Mucho mas comun el maga transito de Mercurio, ocurriendo 13 maga vez cada siglo, en promedio.

Na Marte, posible maga parcial solar eclipse (maga transito) lang, kay hinde suficientemente grande ninguno del de suyo maga luna, na el de ellos maga respectivo orbital radio, para cubri con el disco del Sol visto desde el superficie del planeta. Pero hinde posible lang sino comun el inverso situacion —maga eclipse del maga luna por Marte— y ta ocurri maga ciento cada terrestre año. Hay tambien maga raro ocasion cuando ta eclipsa Fobos con Deimos. Hay maga fotografia de maga marciano eclipse, y desde el marciano superficie y desde el orbita.

Ta tene el maga gaseoso gigante con manada luna y ansina ta mostra con maga frecuente eclipse. Ta involucra el maga mas llamativo con Jupiter, que ta tene con cuatro maga grande luna y un bajo oblicuidad del ecliptica, ansina que mas frecuente maga eclipse cuandoquiera ta atravesa este maga cuerpo con el sombra del mas grande planeta. Ta ocurri el maga transito con el mismo frecuencia. Comun el vista del maga mas grande luna proyectando con maga circular sombra sobre el maga cima del maga nube de Jupiter.

Predecible con precision el maga eclipse del maga galileano satelite por Jupiter un vez que conocio el de ellos maga orbital elemento. Durante el decada de 1670, descubierto que ya ocurri este maga evento unos 17 maga minuto mas tarde de lo esperao cuando ya queda Jupiter na el oculto cara del Sol. Ya deduci si Ole Rømer que ta causa este retraso el tiempo necesario para que ta viaja el luz de Jupiter al Tierra. Gracias a este hecho ya estima el maga europeo por primer vez con el velocidad del luz.

Tambien usao el momento del maga eclipse de maga joviano satelite para calcula con el longitud de un observador sobre el Tierra. Con el conocimiento (de antemano) del previsto hora na el que observao un eclipse na un estandar longitud (como Greenwich), calculable el horario diferencia mediante preciso observacion del local hora del eclipse. Ta dale el horario diferencia con el longitud del observador kay ta corresponde cada hora de diferencia a 15° alrededor del ecuador del Tierra. Ya usa, por ejemplo, si Giovanni Domenico Cassini na 1679 con este tecnica para remapea con Francia.

Na el tres maga otro gaseoso gigante (Saturno, Urano y Neptuno) ta ocurri maga eclipse na algun maga periodo lang del órbita del planeta, debio a que ta tene ele con un mas alto orbital inclinacion entre el maga orbita del luna y el orbital plano del planeta. Ta tene el luna Titan, por ejemplo, con un orbital plano inclinao alrededor de 1.6° al orbital plano de Saturno. Pero ta tene Saturno con un axial inclinacion de casi 27°. Ta cruza el orbital plano de Titan con el linea de vision hacia el Sol na dos punto lang a lo largo del orbita de Saturno. Kay el orbital periodo de Saturno es de 29.7 maga año, posible un eclipse aproximadamente cada 15 maga año lang.

Pluton, con el de suyo satelite mas grande proporcionalmente, Caronte, es tambien el sitio de manada eclipse. Ya ocurri un serie de tal maga mutuo eclipse entre 1985 y 1990. Ya llega este maga diario evento al maga primer preciso medicion del maga fisico parametro de ambo maga objeto.

Ta consisti un binario estelar sistema na dos maga estrella que ta orbita alrededor del de ellos comun centro de maga masa. Ta queda el maga movimiento de ambo maga estrella na un comun orbital plano na el espacio. Cuando muy estrechamente alineao este plano con el ubicacion de un observador, ta mira este observador con el maga estrella pasando frente a si. El resultao es un tipo de extrinsico variable estelar sistema llamao un eclipsante binario.

Ta iguala el maximo luminosidad de un eclipsante binario sistema con el suma del maga contribucion de luminosidad del maga individual estrella. Cuando ta pasa un estrella frente al otro, ta disminui el luminosidad del sistema (del punto de vista del observador). Ta volve el luminosidad al normalidad un vez que hinde alineao ya el dos maga estrella.

El primer eclipsante binario estelar sistema descubierto fue Algol, un estelar sistema na el constelacion Perseo. Normalmenta ta tene este estelar sistema con un visual magnitud de 2.1. Sin embargo, cada 2.867 ta disminui el magnitud 3.4 durante mas de nueve maga hora. Ta causa esto el paso del mas tenue miembro del pareja frente al mas brillante estrella. Ya introduci si John Goodricke na 1783 con el concepto de que ya causa un eclipsante cuerpo con este maga variacion de luminosidad.

Sol - Luna - Tierra: Solar eclipse | anular eclipse | hibrido eclipse | parcial eclipse

Sol - Tierra - Luna: Lunar eclipse | penumbral eclipse | parcial lunar eclipse | central lunar eclipse

Sol - Fobos - Marte: Transito de Fobos na Marte | Maga solar eclipse na Marte

Sol - Deimos - Marte: Transito de Deimos na Marte | Maga solar eclipse na Marte

Otro maga tipo: Maga solar eclipse na Jupiter | Maga solar eclipse na Saturn | Maga solar eclipse na Urano | Maga solar eclipse na Neptuno | Maga solar eclipse na Pluton

• Eclipse de si Mursili
• Lista de maga solar eclipse na el aca-21 siglo
• Transito de Venus