Clinfowiki

Un ajetivo es un parola cual parteni a un clase de cual sua membros altera nomes. Un ajetivo spesifa la cualias de la nom a cual lo refere.

Ajetivo veni de la latina (nōmen) adjectīvum "(nom) ajuntada", un tradui prestada de la elinica antica ἐπίθετον (ὄνομα) epítheton (ónoma) "(nom) ajuntada". En la tradision gramatical latina e elinica, car la ajetivos ia es infletada per jenero, numero e caso como la nomes (un prosede nomida declina), los ia es considerada un suspesie de nom. La parola cual es nomida nomes ia es nomida nomes sustantivo (nōmen substantīvum).

Jeneral, un ajetivo...

• apare en un formula nomin o como un predica de state,
• pote es intensida, e
• pote ave grados de compara e superioria.

Esemplos:

• La gato es grande.
• Nos no vole usa la auto vea.
• Me es multe corajida!
• El es plu ajil ca tu.

On ave alga tipos de ajetivos:

• ajetivo asoluta
• ajetivo verbal

Alga linguas no ave un categoria de ajetivos formal distinguida. En tal linguas, consetas de cualias es espresada o como nomes o como verbos.

En alga linguas, ajetivos altera sua forma per refleta la jenero, caso e cuantia de la nom cual los altera. Los es nomida acorda. Lo es comun en la forma de infletas a la fini de la parola, como en latina:

• puella bona (xica bon, nominativa femin singular)
• puellam bonam (xica bon, caso ojeto/acusativa femin singular)
• puer bonus (xico bon, nominativa masin singular)
• pueri boni (xicos bon, nominativa masin plural)

En la linguas celta, par contrasta, lenision de la consonante inisial marca la ajetivo con un nom fema singular, como en eres:

• buachaill maith (xico bon, masin)
• girseach mhaith (xica bon, femin)

Un distingui es comun fa asi entre usa atribual e predicativa. En cuando los nunca acorda en elefen e sempre acorda en franses, en deutx los acorda sola cuando los es usada atribual, e en magiar los acorda sola cuando los es usada predicativa:

• La bon (Ø) xicos. La xicos es bon (Ø).
• Les bons garçons. Les garçons sont bons.
• Die braven Jungen. Die Jungen sind brav (Ø).
• A jó (Ø) fiúk. A fiúk jók.