Clinfowiki

A lince (generu Lynx Kerr, 1792) hè un felinu appartinendu à a sottufamiglia di i Felinae. Si distingue faciule da l'altri felini da u so visu inquatratu di barbisgi longhi, e so orechje triangulare terminendu si da un ciuffu di peli neri è u so corpu à a coda corta è à e zampe longhe. Di più, ùn hà ch'è 28 denti, invece di 30 cum'è tutti l'altri felini.^[1]

In core di 'ssu periodu, a tassonumia di e lince hà subitu numerose variazione, è i differenti tassoni sò stati cunsiderati cum'è sottuspezie o spezie sient'è u periodu. Dapoi a fine di u seculu XX, quattru spezie sò state ricunnusciute cum'è tale : a lince canadiana (Lince canadensis), a lince eurasiatica (Lince lince), a lince iberica (Lince pardinus) è infine a lince rossa (Lince rufus). U caracale, chì si assumiglia morfulugicamente à una lince, hè à longu statu classificatu in u generu Lynx è hè sempre chjamatu "lince di u desertu".

E lince, chì stanu solu in l'emisferu nordu, anu per ambiente priferitu a furesta boreale. Cunsiderate cum'è spezie largamente sparte, eccituatu a lince iberica, minacciata in modu seriu, facenu parte di i rari felini chì a so pupulazione hè stabile. Ancu si elli accupavanu una piazza impurtante in a mitulugia amerindiana, e lince eranu guasi scunnisciute in Europa, induve elli avianu a riputazione di esse bestie feroce.

E lince anu una struttura fisica assai cunnuscitoghja è ponu difficilmente esse cunfusi incù i felini appartinendu à altri generi, fora di podarse u caracale. U so corpu hè caratterizatu da una dimarchja ondulata, datu i membri pustiriori assai sviluppati, chì sò una particularità di 'ssu generu, chì i felini anu più sviluppata a parte anteriore di u corpu. L'anche sò longhe è i pedi sò maiori riguardu à u restu di u corpu. Hè un'adattamentu sviluppatu per marchjà annantu à a neve : l'anche longhe permettenu di cullucà si più faciule annantu à un mantu zeppu di neve è i pedi assai larghi funziuneghjanu cum'è racchette cù u fine di ùn ficcà si micca in a neve. Di più, a larghezza di i rotulamenti ammurtisce u rimore di i passi è assicura una dimarchja silenziosa in tuttu. E lince eserciteghjanu una prissione assai debule annantu à a terra, ancu riguardu à l'altri carnivori : a lince d'Eurasia, difatti, eserciteghja trè volte menu prissione annantu à a terra ch'è u ghjattu selvaticu (Felis silvestris), è 'ssu valore hè stimatu trà 4,1 è 8,8 volte trà a lince di u Canada è u coiote (Canis latrans). L'impronta di a lince, più longa ch'è larga, richjama quella di u ghjattu casarecciu. A dispusizione di l'impronte hè guasi rettilinea, soprattuttu quandu l'animale avanza à u passu.

A coda hè corta, mozza è senza manichi. Ùn misura ch'è trà 20 è 25 cm di longu. E dimensione di u corpu varieghjanu sient'è e spezie, ma e prupurzione fermanu sempre listesse. U più grande ripprisintante di u gruppu hè a lince d'Eurasia, chì hè guasi duie volte più maiò ch'è l'altre spezie. U dimorfismu sissuale hè bellu marcatu : i masci sò, in media, un quartu più maiò ch'è e femine.

U numeru di machje è u culore di u pilame di a lince varieghjanu sient'è a spezia è a latitudine. I circadori ricunnoscenu quattru tipi di mantellu : pichjulatu, bracanatu, uniformu è à rusetta. Ogni campione hà una dispusizione particulare di i mutivi di u so pilame. Frà e quattru spezie di lince, a lince iberica hà una pilliccia assai pichjulata, quandu invece a lince canadiana ùn hà ch'è pocu è micca machje, soprattuttu perchè a so pilliccia longa hà tindenza à ricopre i mutivi di u pilame. In e rigione di u nordu, u pilame di a lince hè per u più grisgiu, quandu invece in e rigione di u sudu, tende di più ver' di u rossu. In generale, i buccelli, u corpu, l'internu di l'anche, u bavellu è l'attondu di l'ochji sò di culore crema. A lince canadiana è a lince eurasiana anu una pilliccia particularmente zeppa, soprattuttu à corpu in sù, induve u cuncintramentu di i peli hè di circa 9000 per cm² contru à 4600 annantu à u corpu.

A testa di e lince, di forma attundata è sustenuta da un collu cortu, hè dinù assai caratteristica. L'orechje sò triangulare, longhe è adurnate di ciuffe di capelli neri chjamate " pinnachji ". 'Ssi pinnachji d'orechje sò prisenti non solu ind'è e spezie di u generu Lynx, ma dinù ind'è u caracale, ind'è u ghjattu di a ghjangala è ind'è certe razze di ghjatti mansi. Hè pussibile ch'è 'ssa caratteristica serve à agguantà a direzzione di u ventu. I longhi peli annantu à i buccelli formanu una spezia di cullana. L'utilità di a forma di a faccia di e lince, in particulare e penne d'orechje, hà fattu l'ogettu di discussione trà i spicialisti. U zoologistu russiu Matjuškin sottulinia a similitudine incù u visu di a civetta, assai tondu è incù piccule penne addirizzate annantu à a testa 13 : i ciuffi intornu à i buccelli di a lince furmerianu una sorta d'antenna parabolica chì permetteria à 'ssi animali di catturà megliu i soni, quandu invece e piume migliurerianu a lucalisazione di i soni.

Cum'è tutti i felini, e lince anu una vista assai sensibile in e cundizione di debule luminusità è un'individuazione di i muvimenti assai pricisa. L'odoratu hè sviluppatu, ma ùn hè imprudatu ch'è per a cumunicazione interspecifica (per indettu per a marcatura di u territoriu) è mai per a caccia cum'è in u casu di i canidi. E mustacce si trovanu annantu à u muccichile, sopra à l'ochji, annantu à i buccelli è di paru à i pedi : cum'è per tutti i felini, sò un organu tattile assai sensibile.

E lince, s'ella hè necessaria, sò capace di nutà è sò saltadori di prima trinca, grazia à i so membri pustiriori particularmente adattati à u saltu. E lince cattive sò riesciute à scappà, per indettu, saltendu sopra a so sarrendula di trè o quattru metri di altu. Cum'è tutti i felini, e lince sò gattivi curridori di fondu. A so debule resistenza pò esse ligata à a piccula taglia di u so core : u pesu di u core di una lince ùn ripprisenta ch'è 3,4% à 6,4% di u so pesu tutale. E lince anu trè tipi d'andature : u passu, chì hè l'andatura a più usata, u trottu è u saltu.

Cum'è tutti i felini, e lince sò animali territuriali. U territoriu di u masciu cavalcheghja quellu di una o di parechje femine. Eppuru, i territorii, qualvoglia sia u sessu di u pruprietariu, anu e " zone neutre " induve ellu hè pussibile di circulà senza cunflitti: e limite di un territoriu sò à spessu furmate da 'sse zone neutre. E dimensione di u territoriu varieghjanu sicondu a densità di e prede è di e spezie di lince pigliati in cunsiderazione. In America Suprana, u territoriu di un masciu pò aghjunghje i 300 km². I masci ùn tullereghjanu micca a prisenza di campioni di listessu sessu attravirsendu u so territoriu, ma e femine sò e più vindittere di fronte à l'intrusione di i so paghjesi.

E marcature olfattivi, chì permettenu di signalà u pussessu di un territoriu, sò per u più rializati annantu à un puntellu chì si pò identificà faciule. Si tratta guasi sempre di lamapate d'urina è di tracce di granfiature. E marcature sò più frequenti à u centru di u territoriu ch'è à a so periferia.

I linci sò di regula sulitarii, fora di i femini incù i so chjuchi. I soli scontri trà i masci è i femini ani locu mentri u periudu di ripruduzioni, mentri u quali u masciu suvita a femina in tutti i so muvimenti.

Criaturi estremamenti difficile da vede, i linci sò raramenti sculunnati. In u parcu naziunali di Baviera, induva a linci d'Aurasia hè statu riintradutta, 10000 visitadori par annu imprestani un stradeddu à 300 metri di i loca di ripruduzioni di stu animali. U parcu, chì copri una superficia di 13000 ettari, aggronda sei linci risidenti è hè statu visitatu da 1,3 milionu di parsoni in u 1976. Eppuri, soli sei à ottu ussirvazioni sò signalati ogni annu.

E lince sò particularmente attive à l'abbrucata è à l'alba. Caccighjeghjanu per u più per via d'imbuscata è, cum'è a maiò parte di i felini, assuffucanu di solitu e so prede murdendu le à a gola, senza imprudà e so anche per acciaccà le. Quand'elle partenu in cerca di prede, ponu copre u so territoriu ancu annantu à parechji chilomitri. Chjappanu di regula una preda ogni dui o trè ghjorni. U tassulu di riescita à caccia varieghja à l'ingrossu da un campione à l'altru. Riguardu à a lince d'Eurasia, omu stima ch'è e femine accumpagnate di i so chjuchi riescenu à caccighjà in 60% à 70% di i casi, i masci in 40% à 60% è i ghjovani in 10% à 20% di i casi. Menu di vinti minuti si scolanu di solitu trà l'attaccu è a messa à morte di a preda. E lince ùn perseguiteghjanu a so preda annantu à più di dui centu metri ch'è in 1% à 5% di l'attacchi.

E lince manghjanu in pusizione inculiata partendu di e parte carnate di a preda, cum'è e cosce o e spalle, è lascendu da cantu u stomacu è i stintini. A pelle è i capelli sò rispinti à pocu à pocu mentre u pastu è a pelle rutulata compie à spessu per "ingutuppà" e parte di u corpu micca cunsumate. L'acelli sò spiumati. E lince ponu dinù traspurtà e so prede ver' di l'arburi affinch'è elle possinu manghjà in santa pace.

L'attacchi di e lince annantu à e mandrie di cervi favuriscerianu a dispersione di e mandrie di 'ssi ungulati, permittendu cusì una megliu ripartizione annantu à u territoriu. Quessa puderia dinù avè e cunsequenze benefiche annantu à a vegetazione, postu chì e buttature manghjate da u capriolu puderianu avè a pussibilità di sviluppà si, assicurendu un migliore equilibriu di l'ecusistemi.

Malgradu a prutezzione di a mamma, u tassulu di murtalità di i ghjovani hè altu. U ciclu di riproduzione di e lince hè sughjettu à grande variazione. Quellu di a lince di u Canada, per indettu, hè strettamente ligatu à quellu di a levra d'America (Lepus americanus) è a so pupulazione fluttueghja dunque circa ogni deci anni. Listessa, l'ossirvazione fatte annantu à a lince d'Eurasia mostranu ch'è, sient'è l'anni, sole 43% à 64% di e femine danu nascita à i chjuchi.

A staghjone di l'amori hà locu per u più à a fine di l'inguernu. Dopu à una "luna di mele" di uni pochi di ghjorni, u masciu volta à e so occupazione, quandu invece a femina parte in cerca di un aggrottu induve ella darà nascita à i so chjuchi dopu à una gistazione di circa dui mesi. S'occupa ella stessa di u so allevu è, una volta adulti, li impara à caccighjà. Chitteranu a mamma une poche di simane nanzu à a nascita di a prossima generazione è parteranu in cerca di un nuvellu territoriu : a dispersione, eppuru, si face à piccula scala, apposta chì i ghjovani si stallanu in i territorii prossimi da quelli di a mamma.

Ùn hè ch'è in rari casi ch'è e lince diventanu i vettori di a rabbia. Annantu à una migliaia di lince in Sluvacchia catturati o tumbati in deci anni, soli 0,6% eranu statu infettati da 'ssu vìrus. Di più, e lince ùn sviluppanu micca a forma aggressiva di a malatia è, s'elli ponu, attaccanu è tombanu e volpe (unu di i principali vettori di a rabbia). E morte duvute à a malatia ùn ripprisentanu ch'è un quartu di u tutale di e morte. I trè quarti di e morte d'adulti sò duvute à l'attività umane, ch'è ellu si agisse di a caccia è o di a caccia clandestina, o di a circulazione stradale. Ind'è i ghjovani, sò soprattuttu a fame è e malatie parassitarie chì decimanu a pupulazione (80% di e ghjovane lince d'Eurasia ùn aghjunghjenu micca l'età di a maturità sissuale). Eccituatu l'esseri umani, e lince anu pocu predatori naturali. Si tratta, sient'è e spezie, di l'orsi, di i lupi è di i puma. A lungevità hè di una quindecina d'anni in a natura è di una trentina d'anni in cattività.

1. ↑ 'Ss'articulu pruvene in parte da l'articulu currispundente di a wikipedia in talianu.