Bioinformatics Wiki

De kobbn (Araneae) zyn de gekendste orde uut de klasse kobbeachtign (Arachnida). 't Zyn geleedpôotign woavan dat er à peu près 50.000 sôortn beschreevn zyn. Over hêel de weireld leevn d'r kobbn uutgezounderd in de zeie. Zêekobbn zyn verwant an kobbeachtign moa 't zyn gin kobbn.

Lik al de kobbeachtign hen kobbn acht pôotn. Under lyf bestoat uut e stevig kopborststik (cephalothorax of prosoma) en een achterlyf (abdomen of opisthosoma).

Kobbn en gin antennes lik insectn moa wel pedipalpn of kort palpn, beweeglikke anhangsels an de mounddêeln met e tastfunctie. By de vintjes speeln z'ook e rolle lik secundair geslachtsorgoan.

Ip 't kopborststik hen de kobbn 3×2 of 4×2 oogn. Z'hen twi cheliceern of gifkoakn, die hol zyn en woamee dan ze verteirende sappn kunn inspeitn by prooibêestn en dikwils ook vergif. By vele kobbn wordn de cheliceern ook gebruukt vo mee te knabbeln. Sommigte kobbn zuugn under prooi hêlegans uut woadeure dat er allêne moa vel overbluuft.

In 't achterlyf liggn 't herte, de loungn, 't grotste dêel van 't verteiriengskanoal en d'orgoann vo de vôortplantienge.

Vele kobbn moakn by de jacht gebruuk van e kobbenette. Kobbn zyn zounder uutzounderienge vlêeseters en roofbêestn die levende prooin vangn. De mêeste sôortn bluuvn klêene en leevn van insectn, moa grottere sôortn pakkn ook klêene knoagbêestn, veugels en reptieln.

De vôortplantienge gebeurt via eiers, die dikwils in een eicocon wordn ofgezet mor ook soms meegedreegn wordn deur 't wuuvetje. Soms wordt 't vintje achter de poarienge ipg'eetn deur 't wuuvetje. Uut d'eiers kommn d'r klêene post-embryo's, die mor achter d'êeste vervellienge ip klêene kobbetjes trekkn. Ze moetn nog verschillige kis vervelln vo dan ze volwassn zyn.

Ofbeeldiengn die ier by passn ku je vien in de categorie Araneae van Wikimedia Commons.