Bioinformatics Wiki

Dr Robert Maillart (* 6. Februar 1872 z Bärn; † 5. April 1940 z Gämf) isch e Schwiizer Bouingeniöör und Boumeischter gsi.

Dr Robert Maillart het z Bärn s Gymnasium psuecht und derno z Züri a dr ETH d Ingeniöörwüsseschaft studiert. Ane 1894 het er s Diplom vo dr ETH übercho.

Z’erscht het er bim Ingeniöörbüro Pümpin & Herzog z Bärn gschaffet und denn bim Töifbouamt vo dr Stadt Züri und bim Zürcher Büro Froté & Westermann.

Ane 1902 het er syni eigeti Boufirma ggründet, d Maillart & Cie. Jetz het er d Brugg vo Tavanasa übere Rhy bout. Vil Erfolg het er mit ere nöje Betonkonstrukzion für schwäri Techer gha, won er derzue Süüle mit dr Pilzform gmacht het. Mit dere Technik het er Fabrigge und anderi Gebäude i meerere Länder chönne plaane und boue.

Ane 1919 het dr Maillart z Gämf es nöis Ingeniöörbüru gründet. Mit däm isch er bsunders wäge de modärne Betonbrugge, won er im ganze Land gmacht het, bekant worde. Die Bouwärch sind ganz zwäckmässig für Staalbeton ustänkt, und grad drum het dr Maillart liechti und eleganti Forme fürse gfunde. Es baar drvo sind wägem innovatiyve Plaan und wäge yrere Schönheit als Marchschtei vo dr modräne Bougschicht wyt über d Schwiiz use berüemt und under Dänkmolschutz. Die bekannteschti isch d Brugg vom Salginatobel bi Schiers im Bündnerland. Die amerikaneschi Ingeniöörvereinigung het se as «World Monument» uuszeichnet.

Dr Robert Maillart isch Eeremitgliid vom Royal Institute of British Architects gsi.

Syni Schrifte, Plään und Fotine ligge hüt i dr ETH-Biblioteek z Züri.

• 
  Valtschielbrugg, Donat im Schams
• 
  Salginatobelbrugg bi Schiers im Prättigau
• 
  Arvebrugg bi Vessy im Kanton Gämf
• 
  Brugg übere Inn bi Zuoz
• 
  s Eidgnössische Chornhuus z Altdorf
• 
  Rossgrabebrugg bi Hindrfultige im Kanton Bärn
• 
  Thurbrugg bi Uzwil
• 
  e Fabrigg bi Wädenswil

• Bruno Meyer: Maillart, Robert. In: Historisches Lexikon vo dr Schwiiz.
• Robert Maillart – Betonvirtuose. Zürich 1998, ISBN 3-7281-2632-2
• Max Bill: Robert Maillart. Zürich: Artemis 1949
• David P. Billington: Robert Maillart and the Art of Reinforced Concrete. 1990, ISBN 0-262-02310-5

 Commons: Robert Maillart – Sammlig vo Multimediadateie

 Commons: em Robert Maillart sini Brugge – Album mit Multimediadateie

• Porträt vom Maillart vo dr ETH-Biblioteek