Trends in LIMS

Crim (rusce: Крым, ucrainsce: Крим, tatar de crim: Къырым, elinica antica: Κιμμερία) es un penisola locada a la costa norde de la Mar Negra en Europa este, cuasi completa ensircada par la Mar Negra e la Mar de Azov a la norde-este. La state de Crim es disputada: Lo es reclamada par Ucraina e es reconoseda como ucrainsce par la plu de otra paises, an si lo es controlada par Rusia seguente sua propri en 2014. Crim es locada sude de la rejion ucrainsce de Herson, a cual lo es liada par la istmo de Perecop, e ueste de la rejion rusce de Cuban, de cual lo es separada par la Streta de Certx, e liada par la Ponte Crim de 2018. La spina de Spit es locada a la norde-este, un banda streta de tera cual separa un sistem de lagones nomida Sivax de la Mar de Azov. Ultra la Mar Negra a la ueste es Romania, e a la sude es Turcia.

Crim o Taurici (Ταυρική, como lo es nomida de antica asta la periodo moderna temprana) ia es a la borda entre la mundo clasica e la stepe. Sua franje ia es colonida par la elinicas, la persianes, la romanes, la bizantianes, la gotos, la genovanes, e la osmananes, e a la mesma tempo, sua interna ia es ocupada par un colie cambiante de nomadas e imperos invadente de la stepe, como la cimerianes, la scitianes, la sarmatianes, la gotos, la alanes, la balgares, la hunes, la hazares, la ciptxaces, la mongoles, e la manada oro. Crim e la teritorios prosima ia es unida en la Hania Crim en la sentenios 15 a 18.

En 1783, Crim ia es proprida par la Impero Rusce como la resulta de la Gera Rusia-Turcia (1768–1774). Seguente la Revolui Rusce de 1917, Crim ia deven un republica autonom en la Uni Soviet. En la Gera Mundal Du, Crim ia es reduida a un oblast pos cual sua popla nativa intera - la tatares de Crim - ia es deportada Asia sentral, un ata cual ia es reconoseda como un jenoside. En 1954, Crim ia es transfereda a la Ucraina (ancora en la Uni Soviet).

Con la colasa de la Uni Soviet, Ucraina ia es reinstituida como un stato autonom en 1991, e la plu de la penisola ia es reorganizada como la Republica Autonom de Crim, en cuando la site de Sevastopol ia reteni sua state spesial en Ucraina. La 1997 Trata de Parti ia permete ce Rusia continua stasioni sua marina de la Mar Negra en Sevastopol. Ucraina ia estende la contrata de lua de Rusia per esta su la 2010 Trata de Harciv en intercambia per la continua de un desconta per gas natural de Rusia.

En febrero 2014, seguente la revolui ucrainsce de 2014 cual ejeta la presidente ucrainsce, Victor Ianucovitx, Rusia propri Crim pos un interveni par separadistes pro-Rusia e fortes militar de Rusia. Un referendo controversa en Crim, no legal par la constituis de Crim e de Ucraina, ia es presentada sur la caso de reuni con Rusia; sua resultas ia mostra suporta per reuni, ma la vota ia es boicotada par multe persones fidosa a Ucraina, e declarada nonlegal par governas de la mundo ueste e la Nasiones Unida. Rusia ia ajunta formal Crim a 18 marte 2014, enclui Crim e Sevastopol como la membros federal 84 e 85 de Rusia.