Practical Applications of a SDMS (Scientific Data Management System)
"ညီႏညွတ်ရေꩻအကျောင်ꩻ ၇-ပါꩻ"၁။ ခမ်းထီ ယံကညီႏညွတ်လꩻဝင်ꩻအကျောင်ꩻနောဝ်ꩻ- အရပ်သား သမာထိတွမ်ႏ ကထွာခွန် ယံထီꩻသင်ꩻလွောင်ႏဗူႏလွဝင်ꩻနောဝ်ꩻမꩻ၊ တွမ်ႏယားကုဲမွုန်းစီꩻကန်ꩻ၊ ခွန်တွမ်ႏအရပ်သား သမာထိ၊ ဗြဟ္မစိုရတရာꩻလိစ်ꩻပါꩻ အွဉ်ႏဒင်ႏလွဝင်ꩻလောင်းတဲင် ကထွာခွန်လဲ့ စောင်ꩻသျောက်ထွားထိန်ꩻသိမ်ꩻတီ ခမ်းထီဖေႏကငိမ်ꩻချံꩻသာႏယာႏ၊ ကထွာကျောင်ꩻအူꩻဘုရာꩻတကာႏသီးလဲ့ ကလိုႏမာꩻဖေႏ ခွန်ကထိန်ꩻသိမ်ꩻထွားတီဖေႏ ခမ်းထီယို ဝွတ္တရာꩻဖေႏကြေႏနောဝ်ꩻမꩻ ညီႏညွတ်ရေꩻထွာနော၊ သမာထိလိုꩻတန်တွမ်ႏခွန် ယံကလွောင်ႏဗူႏဝင်ꩻလꩻလꩻ၊ နောဝ်ꩻမꩻ ညီႏညွတ်ရေꩻထွာ၊ ညီႏညွတ်ရေꩻထွာမꩻ ခမ်းထီသာႏယာႏနော။ ၂။ ကထွာအရပ်သားလဲ့ ရန်ႏသူႏမီႏပေါႏပေါက်တဲင် ဒေါ့ꩻဟွုန်ဗာႏမွိုင်င် ကောထိင်ꩻသား၊ ကောထိန်ꩻသားလဲ့ ယံကထူႏဗာႏမွိုင်င်အရေꩻ၊ ဗြဟ္မစိုရတရာꩻ ၄-ပါꩻ အွဉ်ႏဒင်ႏအရပ်သားလောင်းနဝ်ꩻမꩻ အရပ်သားပစ္စေꩻဥစ္စာႏလဲ့ တွမ်ႏခွန်ပစ္စေꩻဥစ္စာႏ ပီပီဝင်ꩻ၊ မဲ့ꩻအဆုတ်ယုတ် မဲ့ꩻအသုမ်ꩻတေင်၊ ထိန်ꩻနွောင်ꩻင်ꩻဖေႏဗာႏ ရန်ႏသူႏအွိုးအရပ်သားလောင်းနော။ ၃။ ကထွာခွန်လဲ့ ကထီႏအရပ်သားတင်ꩻလှဲနောဝ်ꩻ မတ်ဗာႏနှဲးပိုသွီႏယာႏ၊ ဖူးသွီႏယာႏ၊ ဝေးသွီႏယာႏလွဉ်းဉ်း၊ မတ်ဗာႏနှဲး လိုꩻတလမ်းချင်ႏ၊ တနားဟွိုန်ꩻချင်ႏနဝ်ꩻမꩻ ခမ်းထီညီႏညွတ်နော။ ၄။ ကထွာအရပ်သား ပါꩻတဖြာꩻနဝ်ꩻ မီႏဒင်ႏထွူလိုꩻတန်တဲင်ခါ အမျာꩻတင်ꩻလှဲ ယံဖေႏကရိုႏသေႏဗာႏ နှဲးနီဖါလမ်းကိုနော၊ ကထွာလဲဉ်းလိုꩻတန် စီႏရင်ႏပေါင်ꩻမာꩻ မီႏတရွို့ꩻ မီႏမာꩻတမွေးတောဝ်းတဲင် ကထွာအရပ်သား လိုꩻသေလိုꩻဒါႏ ဖေႏသတိဖေႏဉာဏ်ႏဗာႏ၊ ထဲမ်ကိုစွဲးကိုဖေႏဗာႏ၊ ကထွာလိုꩻတန် သိညာႏနေား၊ နီသွꩻနီခွဒွါႏရင်ꩻင်ꩻ၊ ထာꩻဒေါ့ꩻထာꩻဖြောဝ်ႏ တွမ်ႏထာꩻမာꩻ မီႏတမွေးတောဝ်းတဲင် လိုꩻယေန်အကိုနဝ်ꩻ ယံဖေႏသတိဗာႏလိုꩻတန်၊ ကထွာလိုꩻတန်လဲ့ သမာဓိ(ထိ)ကဒေါ့ꩻဖေႏနီနောဝ်ꩻ မီႏမွေးလဲ့ ထူႏနေးနာႏဗာႏ၊ ခွေထွာဆွူလိုꩻတန် ပါꩻမှဲꩻငေါဝ်းလဲ့ ခွေတနာႏတောဝ်း၊ သꩻတဖြောဝ်းတွမ်ႏ မာနထောင်ႏလွာႏ တွမ်ႏမာꩻမွုန်းတောဝ်းနောဝ်ꩻမꩻ ခမ်းထီသာႏယာႏ-ညီႏညွတ်ငိမ်ꩻချံꩻနော၊ ထထီႏမွူးလဲ့ ပွိုင်ႏဝါႏထောက်၊ ဝါႏထောက်လဲ့ ပွိုင်ႏထထီႏမွူး၊ နီစွိုး တိဉ်ႏညီꩻဝင်ꩻနော။ ၅။ နီအရပ်သားတင်ꩻလှဲ ကဒင်ႏခါꩻ ယံဖေႏကထွားထိင်ꩻ တင်ꩻလှဲကထွာ လိုꩻတန်တဖြာꩻနောဝ်ꩻ အမီႏဟော်ꩻတရာꩻ မီႏသွဉ်သင်ဆုမ္မꩻ လိုꩻအမျာꩻတဲင် ယံဖေႏလိုꩻအမျာꩻ ကနာႏခံႏဗာႏ အငေါဝ်းနော၊ ယံဖေႏကရိုꩻသေႏဗာႏ ပါꩻကထွာလိုꩻတန်နဝ်ꩻမꩻ ကထွာနီခွန်တွမ်ႏအရပ်သား ညီႏညွတ်သာႏယာႏရေꩻ ထွာနွောင်ꩻဆွူ၊ မီႏတရိုႏသေႏတောဝ်း နီခွန်၊ မီႏတနာႏတောဝ်း နီခွန်ငေါဝ်းနဝ်ꩻ မှဲꩻခါလဲ့ ခမ်းထီသာႏယာႏနွောင်ꩻတောဝ်းနော တင်ꩻလှဲဟွေး။ ၆။ အားလုံးအချက်ကပါဒါႏ ဆကီယို တွမ်ႏခွန်တွမ်ႏလိုꩻအမျာꩻ နေးနာႏလွဉ်ထွူတဲင် ကထွာရဟန်ꩻသင်္ဃာႏ ကထိန်ꩻစောင်ꩻဒါႏ သိက္ခာႏပုဒ်တောႏ ၂၂၇ ပါꩻနဝ်ꩻ တကာႏထာꩻမာꩻ မီႏတမွေးတောဝ်းလဲ့ ယံကဆုမ္မꩻသွဉ်သင် ဟော်ꩻပျော်ꩻဖေႏ တကာႏနော၊ တခုဲႏဟွုန်ဗာႏတဝ်း တရာꩻနဝ်ꩻလဲ့ ယံဖေႏကဟွုန်ဗာႏ၊ ကဟွုန်ဗာႏလဲဉ်းတရာꩻနဝ်ꩻလဲ့ ယံဖေႏကတိုꩻပွာꩻထဲင်းင်း၊ ချွစ်သဲင်ꩻဝေႏနေႏယျ၊ ယံကလꩻချံꩻသာႏ၊ တကာႏအရင်ꩻ၊ ယံသညင်ꩻ ပသာဖေႏ၊ ဒေဝါႏခမ်းထို၊ မဂ်ဖိုလ်ႏနိဗ္ဗာန်ႏ၊ ယံလꩻမန်ႏန်ႏဩ။ ၇။ သင်္ဃာႏတောႏလဲ့နောဝ်ꩻ၊ ခွန်လဲ့နောဝ်ꩻ၊ တကာႏအမျာꩻလဲ့နဝ်ꩻ ထွားချာဒျာႏ နမ်းကျင်ꩻတရာꩻ ပရင်ꩻပရာꩻနောဝ်ꩻမꩻ၊ ယံဖေႏကဲ့ꩻရဲ့ꩻဗာႏမွုန်းတောဝ်းလွဝင်ꩻနောဝ်ꩻမꩻ ညီႏညွတ်ရေꩻထွာနော၊ နမ်းကျင်ꩻတရာꩻ တအဲဉ်ထောဝ်းနောဝ်ꩻ ဆုမ္မꩻသွဉ်သင်စွဉ်ႏပါꩻလဲ့ ငေါဝ်းလွီးတဟွမ်တောဝ်းနော။[၁][၂][၃]
အာႏကွိုꩻ
