Knowledge Base Wiki

籃球，又係一種由兩隊參與嘅球類運動，每隊派出5個球員，目的係將波射入對方球籃攞分，而且要阻止對方攞波同攞分。球員可以將波向任何方面傳、投、拍或者運，但係要受到下列規則嘅限制。

籃球比賽嘅形式有好多款，就以而家流行嘅街頭三人籃球為例，係3打3嘅比賽，更加講究個人技術。當今普遍認為最高水平嘅籃球比賽係俗稱NBA嘅美國國家籃球協會。

籃球係由一個加拿大籍嘅美國麻省青年會學院牧師奈斯密夫博士喺1891年發明。由於嗰度有一個又長又凍嘅冬季，極之唔啱打美式足球或者棒球咁嘅室外運動，於是有人就叫奈斯密夫博士發明一種可以喺室內玩嘅運動，奈斯密夫博士唔希望佢發明嘅運動會好似美式足球噉咁易受傷，亦覺得好似足球咁可以透過大力嘅射門增加入球機會並唔係咁好，於是就發明咗籃球，並有13條規則。

籃球喺1904年列入奧運嘅表演項目，而到咗1936年柏林奧運，更成為正式項目。至於女子籃球就要到1976年蒙特利爾奧運先至成為項目之一。

• 球場（Play court）：長28米，闊15米。
• 線（Lines）：線闊5厘米，要清晰可見、顏色相同（推薦係白色）
• 邊界線：邊界線包括兩條底線（End lines，比較短嗰邊）同埋兩場邊線（Side lines，比較長嗰邊），邊界線並唔係場地嘅一部分。所有障礙物應該距離邊界線至少2米。
• 中線（Centre line）：中線係經過兩條邊線嘅中點，同底線平行嘅線段。中線兩邊凸出邊線15厘米。
• 中圈（Middle circle）：中圈係喺球場嘅正中，圓心至圓環外邊緣嘅長度係1.80米。如果中圈內部要油顏色，就應該同限制區嘅顏色一樣。
• 半圈（Semicircles）：半圈嘅圓心至圓環外邊長度係1.80米，圓心位於罰球線嘅中點。
• 罰球線（Free-throw lines）：罰球線應該同底線平行，距離底線內邊最遠5.80米，長度係3.6米。罰球線中點應該同兩條邊線嘅中點喺同一條想像中嘅直線上。
• 禁區（Restricted areas）：禁區係由底線、罰球線同兩條一端由底線發出，端點距離底中點3米遠，一端距離底線中點3米遠，一端同罰球線端點相連嘅線段同埋佢包圍而家嘅區域組成。呢啲線，包括底線，都係禁區嘅一部分。限制區嘅顏色可以同其他區域唔同，但應該同中圈一樣。
• 三分投籃區（Three-point field goal area）：三分投籃區係球場上除咗靠近對方個籃嘅一個區域以外嘅全部區域，佢係由以下嘅線包圍：
  • 兩條垂直喺底線嘅線段，佢嘅一端係位於底線上而且距離底線中點6.25米（NBA係7.24米）。另一端就同個籃嘅圓心位於同一條平行於底線嘅想像線上，線長1.575米。
  • 一條以個籃圓心做圓心，半徑6.25米的半圓弧，佢嘅端點同上面所講嘅兩條線段嘅端點重合。
  • 呢三條線加埋就叫做三分線。

喺籃球入面，球員嘅位置大致上分成以下呢五種：

• 控球後衛
• 得分後衛
• 小前鋒
• 大前鋒
• 中鋒

呢啲分類都係基於戰術嘅調配，籃球規則冇任何定明，因此有時都會出現雙塔（雙中鋒）、三後衛之類嘅情況。基本上，呢啲位置都係同球員嘅身高有關，後衛嘅身形一般都比較高，而較矮嘅球員，一般都係擔任前鋒。

喺一場比賽入面，球證會首先喺中圈入面進行跳波，只要有其中一方嘅跳球球員拍到個波，場波就會開始。球員要用一切合法嘅方法，將個波放入籃。籃球規則講明，球員只可以用手打波，但唔可以用拳打，而蓄意用下肢掂波更加係違例。有波嘅球員必須令到個波郁先可以帶波走，只可以單手拍波，而傳球同埋投籃就可以用雙手。

正規嘅球賽共分做四節，每一節10分鐘（NBA係12分鐘），如果唔可以喺法定時間入面贏波，就會進行加時，每節加時有5分鐘，如果重未分得出勝負，就會再加時，直到分出勝負為止。

比賽入面，每隊要喺24秒內進攻，如果未能夠喺24秒內將個波投入或者掂到對方球籃，就係違例，對方可以得到控球權。

球員投籃，成功嘅話一般都係2分，如果喺三分區（即係三分線以外）投籃成功嘅話，就會得到3分，而喺罰球情況下成功嘅會有1分。

有時雙方球員會同時爭奪（手掂住）籃球，又或者喺籃球規則中未能判斷控球權誰屬嘅情況下，球證會判雙方球員跳波。以往跳波會喺最近嘅中圈或者罰球圈進行，由2003年開始，國際籃球規則開始採用球權輪替法，以加快比賽節奏。

國際籃球規則入面，犯規係指同對方球員嘅非法身體接觸或者違反運動道德嘅行為，每次被判犯規嘅球員都會記低，每個球員容許有5次個人犯規（NBA係6次），而個人犯規包括以下幾種：

侵人犯規

• 定明球員唔可以任何唔正常姿態（超出佢嘅垂直空間），去阻止對方球員前進，或者使用激烈嘅動作。常見嘅個人犯規有：
  • 阻擋
  • 撞人
  • 背後非法防守
  • 阻撓
  • 非法掩護
  • 非法用手
  • 推人
  • 罰則：如果被判侵人犯規，除咗犯規球員要被記低一次個人犯規外，對方更加可以按唔同情況得到控球權或者罰球機會。

雙方犯規

• 喺某啲情況下，雙方球員會為咗爭奪位置而引起激烈嘅動作，就係指侵人犯規嘅動作。裁判就會判雙方球員一次雙方犯規，即每人一次個人犯規，然後按輪換發球法決定發球權。

違反運動道德犯規

• 當球員犯規嚴重粗野，又或者球員防守時並唔係針對籃球而係進攻球員，咁樣好容易導致受傷，球證可判斷為違反運動道德犯規。
  • 罰則：如果被判違反運動道德犯規，會被記低做違反運動道德犯規，呢種犯規同時係個人犯規，但兩次違反就唔可以喺同一場比賽再參與比賽。除此之外，對方亦會得到罰球並之後有控球權。

技術犯規

• 係指所有球隊人員，包括球員、教練同其他註冊人員嘅非接觸性犯規。規則中定明，所有人唔可以對球證無禮、要服從球證嘅判決、唔可以拖延時間、唔可以騷擾對方球員、扣籃球員除咗安全理由之外唔可以掛喺籃上之類，新嘅規則更定明球員唔可以故意跌底以博取對方犯規，亦都係技術犯規嘅一種。
  • 罰則：如果被判技術犯規，會被記低做技術犯規，呢種犯規同時係個人犯規。除此之外，對方會得到罰球並之後有控球權。

打交

• 係針對喺球場入面球員以外嘅隨隊人員嘅打架行為嘅規則，違反者會被逐離場。

• 國際籃球協會（FIBA）

• NBA

• NBA News