Knowledge Base Wiki

國際音標（粵拼：gwok3 zai3 jam1 biu1；英文：International Phonetic Alphabet），又叫萬國音標，通常用英文縮寫 IPA（可以借入粵語做粵拼：aai1 pi1 ei1），係語言學一套方便標示全世界每種語音嘅標音符號。佢嘅特色係一隻符號（或者叫做字母）祇代表一隻語音或音素，同時用附加符號來表示唔同環境嘅音變。噉語言學家就可以用爾套系統來比較唔同語言嘅發音。佢係全球語言學家嘅共同標準。

喺現實世界，人往往會攞文字寫低自己講嘅嘢，但人平時生活用嘅文字同自然語言一樣，或多或少噉有啲混沌^[1]，例如

• 聲呢隻漢字喺廿一世紀初嘅廣東話可以有兩隻音－聲sing1／聲seng1；
• 而英文都係一樣，例如cake（蛋糕）同century（世紀）雖然頭嗰隻字母都係c，但佢哋頭嗰個音查實幾唔同^{[註 1]}；

因為噉，語音學工作者就製定咗 IPA 爾套標準。IPA 最大特徵係極之精確，IPA 有一拃文字符號可以用嚟寫低講嘢嘅聲（標音），而且隻隻符號都淨係會對應一隻音，同時每隻音亦淨係對應一隻符號，仲會用「[]」嚟括住記嘅音（用意在於向睇嘅人強調返串符號係寫緊 IPA）。當研究語音學嘅人睇到一串IPA符號嗰陣，唔會有「吖，呢個符號有兩個可能嘅音喎，到底寫嘢嗰個人想表達嘅係呢個音定嗰個音？」嘅問題^[1]。

例字詞：

—英文同葡文傳統上慣咗用羅馬字寫，而標準官話傳統上慣咗用漢字寫，但無論用嘅文字系統係乜，IPA 都會用同一套符號寫嗰隻語言出嚟，方便語音學研究免受文字系統嘅特性干擾。

廣東話例子：

• 原句（掕住粵拼嘅漢字）：叉燒包好食caa1 siu1 baau1 hou2 sik6；
• 唔標調嘅 IPA：[tsʰaː siːu̯ paːu̯ hou̯ sɪk]

上例用中括弧，表示用咗嚴式標音，即係標語音而唔係音素，所以係標[tsʰ]而唔係一般字典見到嘅ts。

• 粵語寬式國際音標
• 樂譜

• 中文版本的國際音標表