Type a search term to find related articles by LIMS subject matter experts gathered from the most trusted and dynamic collaboration tools in the laboratory informatics industry.
中醫學(Traditional Chinese medicine,簡稱「TCM」)係以中醫藥理論與實踐經驗為主體,研究人類生命活動中健康與疾病轉化規律同埋佢嘅預防、診斷、治療、康復同保健嘅綜合性科學。中醫學屬於全世界醫療體系中,傳統醫學(traditional medicine)嘅其中一分支,至今已經有幾千年歷史。
中國醫學體系嘅傳統醫學,包括中國漢族為主體嘅中醫學(日本、朝鮮同台灣亦有稱漢醫),日本嘅漢方醫學,朝鮮半島嘅東醫學(即今日韓國嘅韓醫學,朝鮮嘅高麗醫學)。
中醫學以中國哲學中嘅陰陽五行作為理論基礎,通過望、聞、問、切,四診合參嘅方法,探求病因、病性、病位、分析病機及人體內五臟六腑、經絡關節、氣血津液嘅變化、判斷邪正消長,進而得出病名,歸納出證型,以辨證論治原則,制定「汗、吐、下、和、溫、清、補、消」等治法,用中藥、針灸、推拿、按摩、拔罐、刮痧、氣功、食療、音療等多種治療手段,令人體達到陰陽調和而康復。
中醫具有完整嘅理論體系,佢嘅獨特之處,在於天人合一嘅整體觀同埋辨證論治。
響現今世界嘅醫療體系中,中醫學被歸類為替代醫學(Complementary and alternative medicine,CAM)中嘅一支而受到重視。世界衛生組織(WHO)響2002年5月26號發表咗「2002-2005年傳統醫藥研究全球策略」,邀請全球180幾個國家將替代醫學納入佢哋嘅醫療政策,並於2017年將傳統中醫學納入國際疾病分類(International Classification of Diseases,縮寫為ICD),代表中醫學受國際間認可[1]。
中醫學嘅價值之一在於方劑,藥方係醫者嘅經驗結晶。中醫學本身發展嘅過程即係實驗嘅醫學,尤其是係經過咗無數嘅醫家幾百年,甚至係上千年來嘅臨床人體實驗反覆使用,證實實際有效而被記載流傳下來嘅經方、時方等。直接面對病徵,掌握主證同兼證,選擇對證嘅方劑進行加減,不拘泥於理論,以治療疾病,呢個係中醫精髓辨證論治嘅本來面目。
中醫治療嘅積極面在於希望:可以協助恢復人體嘅陰陽平衡(即協助身體嘅自我調控機轉維持身體嘅恆定)。而消極面就係希望:當必須利用藥物來減緩疾病嘅惡化嗰陣,重能兼顧生命同埋生活嘅品質。呢個係中醫嘅優勢所在,亦都係中醫響現今世界嘅醫療體系中受到重視嘅原因之一。
一般來講,完整嘅中醫處方,至少包括四項以上:情治(情緒控制)方面嘅指導;戒口(飲食應注意的事項);運動嘅建議(游水、跑步、導引、氣功等);中藥嘅利用,或針刺、艾灸、推拿等。故此中醫響治療疾病嗰陣,係以身心合一嘅角度全盤考量。
相對於傳統嘅中醫,現代中醫嘅革新發明,值得加以關注嘅包括:小針刀,傳統藥物注射製劑,科學中藥等。