Knowledge Base Wiki

Phen'jan
평양 / 平壤
(Pyŏngyang)

Valdkund	Korejan Rahvahaliž-Demokratine Tazovaldkund
Eläjiden lugu (2017)	3,222,000 ristitud
Pind	1,747,7 km²
Telefonkod	+850−2xxx-xxxx
Aigvö	UTC+9

Phen'jan (Phönjan, Pjongjan) vai Pčönnän (kor.: 평양 / 平壤 Pyŏngyang [pʰjʌŋjaŋ] «avar ma», «kodikaz tahond») om KRDT:n pälidn, kaikiš järedamb lidn da kul'turkeskuz.

Legendan mödhe, eländpunktan aluz om pandud vl 2334 EME kuti Vangomson (kor.: 왕검성 / 王儉城). Se mainitase ezmäižen kerdan Kitain purtkiš kuti amuižen korejižen Kočoson-valdkundan pälidn. Kitain Han'-dinastii anasti valdkundad vl 108 EME i pani severzid-se sodaümbrikoid siš. Nannan-ümbrikon (kor.: 락랑국) keskuz sijazihe läz nügüdläšt Phen'janad. Kogurö-vankund anasti tahondad vl 313 i pani lidnad pälidnaks vl 427. Japonižen tobmuden aigan (1910−1945) nimitihe lidnad Heidzö (平壌), lugetihe ijeroglifoid japonaks.

Vspäi 1946 om tazostadud provincijha lidn, oiktanke alištusenke valdkundan tobmudele.

Lidn sijadase Tedongan-jogen da sen oiktan Pothongan-ližajogen randoil, 29 m ü.m.t. keskmäižel korktusel. Lidnfartaloiden territorii otab 315 km². Phen'janan avanport om Nampho 40 km suvipäivlaskmha orhal Tedonan jogensun da Pakuižen meren randoil.

Klimat om mussonine kaks'sezonine. Heinkun-elokun lämuz om +24,5 C°, vilukun — −6 C°, voden keskmäine lämuz om +10,6 C°. Paneb sadegid 933 mm vodes, vihm sezon oleskeleb heinkus-elokus (202..268 mm kus), kuiv sezon — tal'vku-keväz'ku (11..27 mm kus). Lämuden absolütine minimum — −26,5 C°, voib panda lujid pakaižid kaiken tal'ven aigan.

Phen'jan jagase 19 ümbrikho (구역 kujok) da 1 makundha (군 kun). Röunatab Hvanhe Pukto-provincijanke suves i Phönan Namdo-provincijanke pohjoižes.

Vn 2008 rahvahanlugemižen mödhe lidnan eläjiden lugu oli 3 255 288 ristitud. Enamba 4 mln ristituid elädas ezilidnoidenke.

Trolleibusad da tramvaid oma kundaližeks transportaks lidnas. Vspäi 1973 metropoliten radab (2 jonod, 16 stancijad, 22 km raudted).

Phen'janan rahvahidenkeskeine Sunan-lendimport (FNJ) sijadase 30 km pohjoižhe lidnan keskusespäi, tehtas reisid Kitain lidnoihe, Vladivostokha, mugažo KRDT:n pohjoižpäivnouzman lidnoihe, čarterreisid Makaoho, Inčhonha i erasihe Japonijan lidnoihe.