Type a search term to find related articles by LIMS subject matter experts gathered from the most trusted and dynamic collaboration tools in the laboratory informatics industry.
| Repubbleche Democrateche d'u Congo | |
|---|---|
| Giustizie - Pace - Fatije
| |
 | |
| Date amministrative | |
| Nome comblete | Repubbleche Democrateche d'u Congo |
| Nome ufficiale | République démocratique du Congo |
| Lènghe ufficiale | Frangese |
| Capitale | Kinshasa (9.000.000 ab. / 2008) |
| Politiche | |
| Forme de governe | Repubbleche Semi-Presidenziale |
| Presidente | Félix Thisekedi |
| Capo di Governo | Jean-Michel Sama Lukonde |
| 'Ndipendenze | 30 sciùgne 1960 |
| Trasute jndr'à l'ONU | 20 settèmmre 1960 |
| Superficie | |
| Totale | 2.345.410 km² (12º) |
| % de le acque | 3,3% |
| Popolazzione | |
| Totale | 100.000.000 ab. ( ) (21º) |
| Denzetà | 24 ab./km² |
| Nome de le javetande | Template:AggNaz/Repubbleche Democrateche d'u Congo |
| Sciugrafije | |
| Continende | Africa |
| Fuse orarie | UTC +1, UTC +2 |
| Economie | |
| Valute | Franco congolese |
| PIL (nominale) | 46,491 milione de $ (2005) (78º) |
| PIL pro capite (nominale) | 774 $ (2005) (177º) |
| ISU (2005) | 0,411 (vasce) (168º) |
| Consume energetiche | 0,011 kWh/jav. anne |
| Varie | |
| Codece ISO 3166 | CD, COD, 180 |
| TLD | .cd |
| Prefisse tel. | +243 |
| Sigle autom. | CD |
| Late de guide | Destre (↓↑) |
| Inne nazionale | Debout Congolais |
| Feste nazionale | 30 sciùgne |
 | |
'A Repubbleche Democrateche d'u Congo (pure canosciute cumme Congo Belga, Congo-Kinshasa e Congo-Léopoldville, già Zaire) jè 'nu State de ll'Africa Cendrale. Confine a nord cu 'a Repubbleche Cendrafrecane, a nord-est cu 'u Sudan, a est cu l'Uganda, 'u Ruanda, 'u Burundi ed 'a Tanzania, a sud cu ô Zambia e l'Angola, a ovest cu l'oceane Atlàndeche ed 'a Repubbleche d'u Congo.
Da 'u 1971 ad 'u 1997 ère ufficialmènde canosciute cu 'u nome de Zaire.
|
Pe approfondimende, 'ndruche 'a vôsce Regne d'u Congo. |
'A vanne ca porte ôsce 'u nome de Repubbleche Democrateche d'u Congo jè populate da cirche 10.000 anne. 'Mbrà 'u VII ed 'u VIII sèchele ce se 'nzediarene tribbù bantu proveniènde da ll'attuale Nigerie. Quèste popolazziune honne date luèche a 'nu certe numere de regne, ca jndr'ô XIV sèchele fùrene aunifecate jndr'ô putende Regne d'u Congo, ca jndr'ô soje mumende de masseme spannamènde condrollave 'nu territorie ca se spannève da ll'Oceane Atlàndeche a ovest fine ad 'u jume Kwango a est, e da 'u jume Congo a nord fine ad 'u jume Kwanza a sud.
Jndr'ô XV sèchele le Purtughese trasèrene n'cundatte cu 'u Regne d'u Congo. 'Nu esplorature veneziane ad 'u servizie d'u Purtugalle, Alvise Cadamosto, ha tracciate jndr'ô XVI sèchele 'na prime mappe d'a reggione, ca fu cchiù nnande esplorate jndre 'nu mode cchiù sistemateche e cartografate da lle 'nglise Henry Morton Stanley, ca resalì le 'ndere tracciate d'u jume Congo.
'U Regne d'u Congo sopravvisse ad 'u cundatte cu lle Europee pè deverse sèchele, passanne a timbe alterne d'a sfere de 'nfluenze d'u Purtugalle a quèdde de le Olanne e viceverse. 'A fine d'u regne ha state formalizzate d'a Conferenze de Berlino d'u 1884-1885, jndre cui 'a reggione ha state assignate ad 'u re d'u Belge Leopoldo II.
|
|
Pe approfondimende, 'ndruche 'a vôsce State Lìbbere d'u Congo. |
Leopoldo ha fatte d'u paise 'nu State 'ndependente cumme 'na soje proprietà personale, e lle diede 'u nome de State Lìbbere d'u Congo, pigghanne pè sé 'u titole de Sovrane d'u Congo. 'A popolazziune d'u luèche ha state 'mbiegate specialmènde jndr'à raccolte de caucciù. Quèste produziune ha fatte 'a fortune de Leopoldo, ca n'onore d'u Congo ha fatte quagghià assaje edifice a Bruxelles e a Ostenda.
Jndr'ô XIX sèchele ce fùrene episodie de viulènze da parte de quacche mercenarie ad 'u nservizie d'u Sovrane. Seconne alcune fonde, 'a mortalità e le crimine arrevarene a toccà levèlle ìrtieme jndre chidde periode. Nascettere accussì vôsce de proteste: n'particulare, l'Associaziune pè 'a reforme d'u Congo (CRA), funnate jndr'ô 1904 da 'u sciornalìste 'nglise E.D. Morel, ha date vite a 'nu granne movimènde de opinione ca coinvolse migliaie de crestiáne sije jndr'à ll'Europe ca jndr'à lle State Aunìte, e a cui se aunìrene pure personalità cumme Mark Twain, Sir Arthur Conan Doyle ed 'u diplomateche bretànneche Roger Casement, ca jndre 'nu rapporte avève cundannate le metode pratecate jndr'ô Congo. 'A strutture guvernative d'ô State Lìbbere parève assaje inadeguate a lle dimenziune d'u Paise, oramaje fore da 'u condrolle, sicaccussì jndr'ô 1908 Leopoldo II ha fatte trasè 'u Congo jndr'ô novere de le colonie belghe, renuncianne a 'nu 'mbratecabbele possesse private.
|
|
Pe approfondimende, 'ndruche 'a vôsce Congo Belga. |
'U Congo Belga devende accussì 'na colonie vère e proprie. Quiste fatte ha date origgene a 'nu forte afflusse de colone da ll'Europe, ca se 'nzediarene prengepalmènde sus 'a coste. Jndr'ô 1924 'a Società de le Naziune affide ad 'u Belge cumme mannate 'u Ruanda-Urundi ca venne aunìte ad 'u Congo e ne devende 'a settime provinge; 'a colonie avève oramaje 'nu territorie spannutìsseme e ricche de resorse boschive, giacimènde de diamande, avorie e otre.
Ô state belghe s'ète occupate n'prime istanze de applicà polìteche de 'ndervènde pè 'u quagghiamènde de aeropuèrte, ferrovie, strade. 'A grannèzze d'u territorie d'u bacine d'u jume Congo da condrollà porte a decentralizzà le strutture amministrative. Alcune esponende de le innumerevole etnie congolese, 'mbrà cui Simon Kimbangu, se opposere a ll'attività d'a putènze coloniale belghe, mendre otre gruppe rumasere assaje fedele a lle europee.
Cu l'avvende de le 'ndipendenze africane causate da lle 'mbossebiletà de le putènze europee de mandenè costosissime 'mbere coloniale, 'a situazione devende sembre cchiù grave e le uerre 'ndestine se moltiplicarene. 'U Belge non ge tenève cchiù 'a capacità de gestì derettamènde 'nu territorie accussì spannùte e comblesse.
██ Guverne naziunale (Léopoldville)
██ Guverne rivale (Stanleyville)
██ State d'u Sud Kasai (Autonome)
██ Katanga (de facto 'ndependente)
Jndr'ô 1959, dope avè lassate 'u paise pè fuscènne d'a priggiune, Patrice Émery Lumumba, une de le protagoniste d'a uerre pè le 'ndependenze d'u paise, decide ccu pigghie parte ad 'a Conferenze de Bruxelles sus 'u Congo (20 scennàre - 20 febbrare 1960), riuscenne a 'mborse cumme une de le protagoniste de prime chiane.
Temenne 'na uerre de 'ndependenze cumme quèdde ca angore asckuàve l'Algerie, 'u guverne decise ccu se retire, congedenne le 'ndependenze ad 'u Congo 'u 30 sciùgne 1960. Lumumba devende 'u prime ministre. A ll'inizie jidde ha valutate 'a possibilità de trasfurmà 'u Congo jndre 'nu state federale, coerentemènde cu 'a comblessità demografeche ed etneche d'u territorie, me quèste ipotese ha state cchiù nnande lassate pè difficoltà de carattere polìteche-militare.
Jndr'ô stesse timbe l'esercite, ad 'u cui cumanne èrene rumate ufficiali belghe, se fece accussì 'ngasinate ca 'na granne vanne d'u personale de ìrte grade preferì ccu se retire, stivacánne le 'mbalcature amministrative de ll'esercite, sembre cchiù n'mane a caporione d'u luèche.
Jndr'à lle stesse anne spinde autonomisteche se manifestavane jndr'ô bacine minerarie d'a provinge de Katanga, represse jndr'ô sangue da 'u guverne 'ndependentiste.
'U guverne belghe 'nvie le proprie truppe pè proteggere le connaziunale ca retrasèvane proprie mendre Lumumba se revolgeve a ll'ONU. 'A questione se 'nzerì jndr'ô sciùeche d'a uerre fridde e State Aunìte, cu le proprie multinaziunale economeche, e URSS, cu le proprie multinaziunale polìteche, tendarene ccu lusinghe 'u Congo. Lumumba parève cchiù oriendate verse l'allineamènde cu l'Aunìone Sovieteche, ma l'ingovernabbiletà d'u Congo ha fatte n'mode ca l'esercite pigghiasse 'u sopravvènde. Emerse 'u colonnelle Mobutu, ca fece arrestà e condannà a muèrte Lumumba. Quiste riuscì jndre 'nu prime timbe a fuggì, ma, pigghiate de nuève, fu 'nfine giustiziate jndr'ô scennàre 1961.
Mobutu restituì 'u putere jndr'à lle máne de Kasavubu e, dope 'nu periode de transizione duranne 'u quale 'u Paise avève viste 'nu prime dispiegamènde de truppe de le Naziune Aunìte ('a missione MONUC), jndr'ô luglie d'u 1964 Kasavubu costituì 'nu guverne de aunità naziunale. A Moise Ciombe (o Tshombé), ca jndr'ô passate ère state une de le leader d'a secessione d'u Katanga, ha state affidate 'u combite de guidà 'u guverne.
'Mbrà Tshombe e Kasavubu s'ète apìrte 'na uerre polìteche pè 'a leadership d'u Paise, ca ha purtate a 'na sostanziale inattività sije sus 'u fronde economeche ca sus a quidde d'u condrolle 'nderne. L'amministrazione Johnson, nuèvemende preoccupate da le disordine ca, oltre a potè fà accumenzà 'na nuève crise 'ndernazionale - n'concomitanze cu 'a escalation jndr'ô Vietnam - ca ère assolutamènde da evità, avrebbe, a soje mode de vedè, apirte le puèrte a 'na 'nfiltraziune sovieteche. Pè quèste raggione 'u guverne statunitense decise de rivolgerse nuèvemende a Mobutu, ca 'u 25 novèmmre d'u 1965 spodestò Kasavubu.
Mobutu Sese Seko, già cápe de state maggiore de ll'esercite jndr'ô 1961, arrive a pigghià jndre picche timbe 'u putere assolute. Jndr'ô 1965 destituì Joseph Kasavubu, cápe de state oramaje prive de ogne putere, facènne accumenzà 'nu regime longhisseme e caratterizzate da 'nu forte culte d'a personalità e da ambiziune assaje granne jndr'à polìtche estere. Già jndr'ô 1965, cu l'esecuzione de cinghe ministre d'u soje guverne accusate de ìrte tradimènde (eseguite jndr'ô stadie de Kinshasa/Leopoldville e trasfurmate jndre 'nu macabre spettachele), Mobutu mostre 'u soje mode de 'ntendere le cose: ogne atta guvernative o giudiziarie ha dda esse presendate ad 'u popule cumme dimostrazione de putènze d'ô State.
Assunde 'u titole ufficiale de Marescialle-Presidente, cu putere assolute, Mobutu organizze 'nu proprie partite uneche, 'u Movimènde Populare d'a Rivoluzione (MPR), cu 'u combite de dà 'na nuève fazze culturale ad 'u Paise, basate sus 'a tradiziune e sus a le consuetudene d'u luèche. Jndr'ô 1971 ô State jè ribattezzate "Zaire", repigghianne andìche toponomasteche. Jndr'ô stesse periode 'u Laghe Alberto ha state ribattezzate "Laghe Mobutu Sese Seko". 'U cristiánesime fu fortemènde avversate da 'ô state, a vandagge d'u tradiziunale animisme.
Mobutu 'mbose a totte le zairese de pigghià 'nu nome tradiziunale tribbale: jidde stesse se renominò Mobutu Sese Seko Koko Ngbendu Wa Zabanga ("Mobutu 'u uerriere ca scè de vittorie n'vittorie senze ca nisciune ô pòte fermà"). Jndr'ô stesse timbe 'u guverne devende angore cchiù nettamènde autoritarie, e jndr'ô 1969 'na revolte studentesche fu represse jndr'ô sangue.
Jndr'à polìteche estere Mobutu strinse relaziune assaje bbuène cu 'a Romanie de Nicolae Ceauşescu, soje amice personale, ma riuscì pure a pigghià 'a simbatie de le State Aunìte. Amande de le evènde granniuse, 'u 30 ottommre 1974 organizze a Kinshasa 'u cchiù famuse 'ngondre d'a storie d'u puggilate, 'u "Rumble in the Jungle" jndre cui se sfidarene Muhammad Ali e George Foreman. Jndr'à lle anne uèttande Mobutu devende alleate d'a Frange. Cu 'a fine d'a uerre fridde, ca Mobutu avève ausate pè dà ad 'u soje paise 'u ruole de "aghe d'a bilange" jndr'ô continende africane, 'a crise polìteche 'nderne se fece sembre cchiù granne. Jndr'ô 1990 Mobutu se rassegne ad accettà 'a presenze de 'nu Parlamènde multipartiteche ad 'u proprie fianghe e a condividere 'u putere cu 'u presidente d'u Parlamènde stesse.
|
|
Pe approfondimende, 'ndruche 'a vôsce Prime uerre d'u Congo. |
Ma quiste non ge resolse 'a crise, ca 'nfine ha state decise da l'attache de forze rebelle ruandese ed ugandese coalizzate sutte 'u cumanne de Laurent-Désiré Kabila. Jndr'ô 1996 le soje forze fùrene sopraffatte da 'u nemice e Mobutu, oramaje stanghe e malate, avètte da fuggì jndr'ô Marocco, addò morì jndr'ô 1997.
Jndr'ô 1997, 'u generale Laurent-Désiré Kabila, vittoriuse jndr'à uerre civile, se proclamò Presidente assolute, guvernanne pè decrete e 'nstauranne ad 'u putere 'u proprie clan pè pigghià 'u puèste de chidde d'u soje rivale oramaje muèrte. Kabila rediede ad 'ô Zaire 'u nome de Congo, repigghianne 'a vècchie bandiere d'ô State Lìbbere, cu quacche piccele cangiaminde.
|
|
Pe approfondimende, 'ndruche 'a vôsce Seconne uerre d'u Congo. |
Jndr'ô 1998, ribelle Tutsi, organizzate jndre gruppe armate, accumenzarene 'na dure uerre condre le faziune fedele ad 'u presidente Kabila, spalleggiate da le esercite de Angola, Namibia e Zimbabwe. 'Na "uerre mundiale africane", cumme jè state definite, ca vide combatterse sus ad 'u territorie congolese le esercite regolare de ben sèje Pajèsere pè 'u condrolle de le ricche giacimènde de diamande, ore e coltan d'u Congo oriendale. 'U Congo s'ète accussì acchiate scucchiáte jndre 'na vanne oriendale condrollate da le ribelle e 'na occidentale angore n'máne a le truppe de Kabila. Se penze ca sonde state almènde 350 mile le vittime derette de quiste conflitte, 2 miglione e mmienze cundanne pure le muèrte pè carestie e malattie causate da 'u conflitte.
Jndr'ô 2001 Kabila fù assassinate. 'U puèste soje fù pigghiate da 'u figghie trendènne Joseph Kabila.
|
|
Pe approfondimende, 'ndruche 'a vôsce Conflitte d'u Kivu. |
Da 'u 2004 ad 'u 2008 se aprì 'na grave crise 'mbrà 'u guverne e le ribelle de Laurent Nkunda jndr'ô Kivu Nord e jndr'ô Sud Kivu. Pure ce ha state siglate 'nu trattate de pace a scennàre, a fine ottommre 2008 'u Conflitte d'u Kivu jè reaccumenzate n'otra vote jndre totte 'a soje putènze, vedenne pure le 'ndervènde d'u Fronde de Lìbberaziune d'u Ruanda, de 'na missiune ONU ('a MONUC), de le reggionale Mai-Mai, e de le esercite stranierie de Angola e Zimbabwe.
Le prime eleziune multipartiteche jndre 45 anne, previste pè l’abbrìle 2006, sonde condinuate fine ad 'u luglie pè avè fine cu 'u ballottagge d'u 31 ottommre 2006 'mbrà Jean-Pierre Bemba e Joseph Kabila, ca s'ète concluse cu 'a vittorie de Kabila.
'U 25 novèmmre 2008 l'Osservatorie pè le Diritte Umane HRW accusave 'u guverne de Joseph Kabila de avì soppresse deliberatamènde cchiù de 500 oppositure polìtece da 'u 2006.
'A Repubbleche Democrateche d'u Congo condinue a vivere jndre 'nu clime assaje 'ngasinate. Ce da 'na parte 'a vanne occidentale d'u paise, addò jè combrese pure 'a capitale Kinshasa, non g'ète cchiù luèche de scondre e manifestaziune violènde, jndr'à lle provinge oriendale stè angore 'a presenze de bande armate, de milizie non guvernative, de ex-militare e de gruppe tribbale, le quale effettuane 'ngursione e razzie cu conseguènde massacre de civile.
Nonostande quèste situazione jndr'à Repubbleche Democrateche d'u Congo 'a cchiù granna vanne de le muèrte non g'ète causate da le viulenze d'u conflitte n'corse jndr'ô paise africane, me chiuttoste d'a malnutriziune e da le evitabbele disage dovute ad 'u collasse de le strutture sanitarie. Se cunde ca 'a crise ca s'acchie jndr'à Repubbleche Democrateche d'u Congo accide 38.000 crestiáne ogne mise, 4.000.000 da ll’inizie d'u conflitte.
|
|
Pe approfondimende, 'ndruche 'a vôsce Conflitte de l'Ituri. |
Dope 'nu anne de relative stabbiletà, jndr'à ll'autunne d'u 2008 sonde esplose n'otra vote le scondre 'mbrà l'esercite regolare (FARDC) e le milizie d'u CNDP (Congrès National pour la Défense du Peuple) d'u generale Laurent Nkunda (tutsi filo-rwandese), scondre ca honne provocate cchiù de 250.000 sfollate jndr'ô Nord Kivu e jndr'à lle provinge confinande. Jndr'ô scennàre d'u 2009 le vanne n'uerre honne 'mbrovvisamènde acchiate 'nu accorde, pure a cause d'a sostituzione de Laurent Nkunda cu 'u soje luèchetenènde Bosco Ntaganda, accorde n'seguite ad 'u quale jè scattate 'na operazione congiunde FARDC/CNDP/Esercite Rwandese condre 'u FPLR (foreascìte hutu) 'nzign'ô Laghe Edoardo (Nord Kivu).
Nonostande 'u fragele accorde 'a situazione reste comungue assaje tèse, sije a cause d'u condinuamènde de le operaziune militare, sije piccé le avvenimènde de lle urteme mise honne dimostrate le 'ngapacetà de le FARDC (e d'a MONUC) de mandenè l'ordene jndr'à ll'Est d'u paise, 'ngoraggianne deversi raggruppamènde minore ccu condinue 'a uerre armate condre 'u Guverne Cendrale. Jndr'ô detritte de l'Haut Uélé jè condinuate (novèmmre 2008) l'attività de le ribelle ugandese d'u LRA, ca honne attaccate deverse cendre urbane de medie dimenziune (Dungu, Doruma, Faradje) provocanne 'a fughe de cirche 100.000 sfollate. Pure jndre stu case jè scattate 'na operaziune congiunde FARDC/UPDF (l'esercite ugandese) condre le ribelle, ca ha avùte fine 'u 14 màrze 2009 senze resultate concrete pè 'a sicurezze d'a reggione (se segnalane 'nfatte nuève attacche d'u LRA). 'A MONUC, ca tène jnr'à RDC cirche 17.000 effettive, jè rumaste tagghiate fore sije d'a gestione d'a crise sije da le operazione andi-uerriglie ca sonde state organizzate a ll'inizie d'u 2009. Jè n'corse 'nu reposiziunamènde de alcune reparte da ll'Ituri e da otre reggione ritenute relativamènde tranguille verse 'u Kivu e l'Haut Uélé.
|
|
Pe approfondimende, 'ndruche 'a vôsce Sciugrafije d'a Repubbleche Democrateche d'u Congo. |
'A Repubbleche Democrateche d'u Congo, tène 'nu territorie assaje chianeggiànde, cu spannùte chianure e palude, grazzie ad 'u bacine d'u jume Congo ca tète ìerte l'umidità; le vanne monduose non ge sonde assaje elevate, cu l'eccezziune d'u monde Ruwenzori (5119 metre), e sus a totte 'a catène monduose presente ad est. Jndr'ô sud-est se iacchiene le monde Mitumba, cu ìrtezze ca non ge sonde assaje elevate.
'U jume Congo (chiamate pure Zaire) nasce cchiù o mène jndr'ô punde de 'ngondre 'mbrà 'a catène de le monde Mitumba e quèdde de le Rilieve Meridionale. D'apprime se spànne pè cchiù de 1000 km verse nord; cchiù nnande scìre verse ovest cu 'na granna curve e attraverse 'nu tratte chianeggiànde, addò 'a corrende rallènde e le sponde devendanne paludose; jndr'ô terze tratte se spànne jndr'à direziune sud-ovest verse l'oceane e pigghie le acque de granne affluènde. Jndre quiste tratte terminale vagne dò capitale, Kinshasa e Brazzaville, scenne de quote cu le cascate Livingstone e sfoce cu 'nu longhe estuarie jndr'à ll'Atlantiche.
Fatte 'na eccezziune pè 'a vanne de le ìrtechiane, 'u clime d'u paise jè calde-umide, cu temberature medie de cirche 27 °C jndr'à depressione cendrale e punde estreme n'febbrare, 'u mise cchiù calde n'assolute; sus a lle 1.500 m 'a medie scènne a 19 °C. Le precipitaziune pòtene arrivà 'a 'na medie annue de 1.520 mm ad 'u nord e 1.270 mm ad 'u sud, cu frequenze abbondande, 'mbrà abbrìle e novèmmre, a nord de l’equatore e, 'mbrà ottommre e másce, a sud.
Jndr'à maggioranze Gnure Bantu, scucchiáte jndre cirche 300 tribbù. Da segnalà n'particolare:
Le vianghe congolese, ca sonde assaje picche, date 'a situazione costantemènde 'ngasinate d'u paise sonde pratecamènde assende partènne da le anne '70.
Da sembre 'a lènga ufficiale d'u Congo Belga jè 'u frangese. Jèdde jè ausate cumme lènga etnicamènde neutrale e cumme lènga franghe de comunecazziúne 'mbrà le differende gruppe etneche d'u paise. Se penze ca le lènghe parlate jndr'à Repubbleche Democrateche d'u Congo sijane n'totale 242. De quèste, sulamènde 4 tènene ô status de lènghe naziunale fine da le timbe d'ô State Lìbbere: kikongo, lingala, tshiluba e swahili.
'U lingala jè state dichiarate lènga ufficiale de ll'esercite sutte Mobutu, ma da le rebelliune de ll'esercito jndr'à ll'Ovest se ause pure ô swahili.
|
|
Pe approfondimende, 'ndruche 'a vôsce Chièse cattoleche jndr'à Repubbleche Democrateche d'u Congo. |
Le cattoleche sonde 'a maggioranze (45%); ce stonne pure otre Crestiáne (Protestande - 35%, pè 'a maggioranze Avvendiste, e Kimbanguiste) e pure le Animiste (20%).
|
|
Pe approfondimende, 'ndruche 'a vôsce Provinge d'a Repubbleche Democrateche d'u Congo. |
'A Repubbleche Democrateche d'u Congo jè scucchiáte jndre provinge (prime d'u 1998: reggione). Le provinge (fatte eccezziune pè quèdde costituite da sule territorie urbane, cumme Kinshasa) sonde scucchiáte jndre destritte, a lòre vote costituite da territore.
L'artichele 2 d'a nuève costituziune d'u Congo d'u 2005 (artichele 2), trasùte n'vigore jndr'ô febbrare d'u 2006, prevede 'nu nuève scucchiamènde d'u paise jndre 25 provinge, a cui se aggiunge 'a cetate/provinge de Kinshasa. 'A nuève suddivisiune amministrative jè n'vigore da 'u febbrare 2009, pure ce rumane angore sus 'a carte.
L'ordinamènde fine ad 'u 2009 prevedève 'na suddivisiune jndre 11 provinge:
| N° sus 'a mappe | Provinge | Nome ufficiale | Popolazziune[1] | Aree (km²) | Cápeluèche |
| 1 | Bandundu | Bandundu | 5.201.000 | 295.658 | Bandundu |
| 2 | Basso Congo | Bas-Congo | 2.835.000 | 53.920 | Matadi |
| 3 | Equatore | Équateur | 4.820.000 | 403.292 | Mbandaka |
| 4 | Kasai Occidentale | Kasai-Occidental | 3.337.000 | 154.742 | Kananga |
| 5 | Kasai Oriendale | Kasai-Oriental | 3.830.000 | 170.302 | Mbuji-Mayi |
| 6 | Katanga | Katanga | 4.125.000 | 496.877 | Lubumbashi |
| 7 | Kinshasa | Kinshasa | 7.500.000 | 9.965 | Kinshasa |
| 8 | Maniema | Maniema | 1.246.787 | 132.250 | Kindu |
| 9 | Kivu Nord | Nord-Kivu | 3.564.434 | 59.483 | Goma |
| 10 | Oriendale | Oriental | 5.566.000 | 503.239 | Kisangani |
| 11 | Kivu Sud | Sud-Kivu | 2.837.779 | 65.070 | Bukavu |
'A nuève costituziune d'u 2005, oltre ad 'u cangiamènde d'a suddivisiune amministrative, prevede l'istituziune de 'nu sisteme bicamerale comboste da 'nu senate e da 'na Assemblee naziunale. L'esecutive, 'nderamènde de nomine presidenziale, rumane comboste da 60 crestiáne e jè cumannate da 'nu prime ministre.
L'economije d'u Congo jè n'crise, nonostande 'a terre tène resorse, cumme miniere de diamande, sfruttate da fonde esterne. Da 'u 1970 ad 'u 2005 'u PIL d'u Congo jè crisciùte cu 'nu tasse negative d'u 3%, quèste fatte vole segnefecà ca 'a soje situaziune economeche stè pésceranne de anne n'anne.
Pè arte congolese se idendifeche 'a produziune 'ngluse jndre 'na vanne spannùte ca combrende 'u Congo, sije quidde 'nu timbe definite Leopoldville sije quidde Brazzaville, 'u Gabon, 'a vanne meridionale d'u Camerun e quèdde settendrionale de l'Angola, delineate pè affinità stilisteche, pè motivaziune artisteche e pè aunità lènguisteche.[2]
Jndr'à ll'arte congolese sonde presènde alcune caratteristeche funnamendale, 'mbrà le quale:
Jndr'à ll'ambite de ll'arte congolese se distinguone 'nu munne de corrènde associate a lle vare popule ca jàvitane jndre vanne caratteristeche:
'A foreste pluviale recopre 'na granna vanne d'u vascechiane d'a Repubbleche Democrateche d'u Congo e condène 'na granna varietà de specie, alcune de quèste rare ed endemiche, 'mbrà quèste ô scimpanzé, 'u bonobo, 'u gorilla de mundagne, l'okapi ed 'u rinoceronde vianghe. Cinghe de le parche naziunale d'u paise sonde combrese jndr'ô patrimonie de l'umanità de ll'UNESCO: 'A uerre civile ha seriamènde danneggiate le condiziune economeche e assaje dependente de le parche honne abbandunate 'a fatije. Totte cinghe le site sonde elengate jndr'ô patrimonie n'perichele. Jndr'à ll'urteme sèchele 'a RDC devendate 'u cindre prengepàle de quidde ce jè chiamate 'u prubblème d'u bushmeat, conziderate une de le perichele ambiendale cchiù granne, n'picche parole conziste jndr'à cacce de anemale selvateche cu trappole effettuate pè raggione alimendàre.
'A foreste pluviale d'a RDC non g'ète fitte cumme quèdde d'a Guinea, le specie cchiù diffuse sonde le àrvule d'a cola, le palme da uègghie, varie specie de Ficus e de Coffea, assaje diradate sonde le piande de legne pregiate cumme 'u mogane e l'ebane. 'A foreste pluviale se 'nderrompe a sud peà lassà 'u puèste, sus a le rilieve, ad 'a savane ed a lle steppe. 'A savane caratterizze pure le rilieve ca circunnane 'a depressione d'u bacine d'u Congo, sus a lle mundagne occidentale se iacchene stuezze de foreste luènghe 'u corse de le jume. Jndr'à vanne finale d'u Congo sonde diffuse le mangrovie e le palme d'u genere Phoenix spinosa, jndr'à lle vanne cchiù 'nderne jè coltivate 'a palme da uègghie.
Particolarmènde varie e abbondante jè 'a faune, 'mbà cui nuje putìme acchià 'u lione, l’elefande, 'u leoparde, ô scimpanzé, 'u gorilla, 'a giraffe, l’ippopotame, 'a zebre,'u bufale e 'nu munne de specie de rettile e de acìdde; 'nu munne sonde pure le 'nzette, assaje de le quale portature de malattie endemiche, cumme 'a mòschele tse-tse ed 'a zanzane Anopheles, ca trasmette 'a malarie.
Uicchimedie Commons tène files multimediale sus Repubbleche Democrateche d'u Congo
Wikiatlas tène 'na vôsce d'atlande su Repubbleche Democrateche d'u Congo| Condrolle de autorità | VIAF (EN) 134864542 · ISNI (EN) 0000 0001 2289 9107 · LCCN (EN) n80061022 · GND (DE) 4067357-1 · BNF (FR) cb13339496v (data) · J9U (EN, HE) 987007548188405171 · NDL (EN, JA) 00574550 |
|---|
LIMS forum content by LIMS forum members is licensed under a Creative Commons Attribution-NonCommercial-ShareAlike 4.0 International License. Based on a work at www.limsforum.com.
