Knowledge Base Wiki

Rìvole ò Rivolè -pronunsia:- (Rivoli an italian) a l’é un comun ëd 49.861 abitant ^[1] dla Sità metropolitan-a 'd Turin.

A podrìa derivé da "le rìvole", visadì "ël pòst con ij cit ri". Vàire dij sò abitant a lo s-ciamo "Rivolè", ch'a podrìa vnì da "ij rivolèt".

J'element pì antich dla sità a son doj ròch a copele, un a la Cassin-a Possèt e l'àutr al Truch Monsagnasch. As consìdero preistòrich, ma a l'han ij sòlit problema ëd datassion dij ròch a copele, e gnun a peul dì ch'a sio nen, pr'esempi, mach medioevaj. Col dël Truch Monsagnasch a l'ha ëdcò un valor ëstòrich për tuta l'archeologìa piemontèisa, ën essend ëstàit ël prim ròch a copele dël Piemont dont a sia parlasse, ant j' At dla Regia Academia dle Siense ëd Turin, con n'artìcol ëd G. Piolti dël 1881 ^[2].

Ël castel a l'é stàit na residensa sabàuda e adess a l'é la sede d'un dij pì important Musé d'Art Contemporanea d'Italia.
La colin-a andova as pògia l'edifissi dël castel a l'é d'orìgin morénica, ch'a veul dì ch'a l'é dl'época dla fin dl'era glacial. La costrussion dël castel as fà daté al sécol X-XI. A l'é stàit insendià e sachegià durant l'assedi fransèis dël 1706. Dël 1984 a l'han comincià a ristruturelo për felo diventé un musé.

Ël sìndich a l'é Andrea Tragaioli (dal 2019).

Rìvole a l'é gemelà con:

• Kranj, Slovenia
• Montélimar, Fransa
• Mollet del Vallès, Spagna
• Ravensburg, Gërmania

• Sit istitussional