Knowledge Base Wiki

Tampereen kaupunki

País	Finlàndia
Superficia	687,9 km²
Populacion	204 337 (31-dec-2005)
Latitud	61° 30' N
Longitud	23° 45' È
Altitud	min 77 m, max 162 m

Tampere es una vila finlandesa situada dins lo sud-oèst dau país. Segonda ciutat de Finlàndia per òrdre d'importància, es un centre industriau (mecanica, automatisme, tecnologic (comunicacion, informatica) e universitari. La populacion de son aglomeracion èra de 330 000 abitants en 2017.

La vila foguèt fondada en 1779 per lo rèi suedés Gustav III (1771-1792) coma centre comerciau lòng dau canau Tammerkoski. Dins lo corrent dau sègle XIX, venguèt un centre industriau e una plaça economica importanta en Finlàndia. Au sègle seguent, foguèt lo centre de plusors eveniments politics importants, especialament durant lei grèvas de novembre de 1905. D'efèct, l'industrializacion i aviá entraïnat lo desvolopament d'un movement obrier fòrt que s'engatjèt dins lo camp dei Roges pendent la guèrra civila començada en 1917. Pasmens, en despiech de la mobilizacion de plusors miliers d'òmes, la ciutat foguèt presa per lei Blancs lo 6 d'abriu de 1918. Durant l'entre doas guèrras, aquela agitacion comunista entraïnèt la mesa en plaça d'un poder d'inspiracion faissista per tenir la populacion.

Après la Segonda Guèrra Mondiala, Tempere conoguèt un movement de creissença marcat per l'absorpcion progressiva dei vilas vesinas coma Messukylä (1947), Lielahti (1950), Aitolahti (1966) e Teisko (1972). En parallèl, leis industrias dau sègle XIX e de la premiera mitat dau sègle XX (textil, metallurgia...) comencèron de disparéisser. Foguèron remplaçadas per l'arribada d'activitats centradas sus lei tecnologias de l'informacion.