Knowledge Base Wiki

Lo sètge de Leningrad ò blocus de Leningrad se debanèt dau 8 de setembre de 1941 au 27 de genier de 1944 dins lo corrent de la Segonda Guèrra Mondiala. Opausèt l'armada sovietica que defendèt la vila a de fòrças alemandas e finlandesas.

Menaçada per l'avançada rapida deis Alemands au començament de la guèrra, Leningrad capitèt de resistir gràcias a la bastida d'unei linhas de defensas a l'entorn de la vila e au mandadís de renfòrç importants. Incapablas de la conquistar, lei fòrças de l'Axe demorèron alora en plaça per empachar son avitalhament e la ciutat foguèt tocada per una famina grèva. Pasmens, d'ivèrn, lei Sovietics capitèron d'i mandar de viures gràcias a de rotas prosivòrias bastidas sus lo lac Ladoga gelat. En revènge, leis ofensivas destinadas a rompre lo blocus mau capitèron fins a la fin de 1943. Lo sètge foguèt finalament levat lo 27 de genier de 1944 amb una ofensiva massiva d'unitats blindadas e d'artilhariá.

Lei 872 jorns de sètge s'acabèron donc per una victòria sovietica. Dins aquò, l'URSS i perdiguèt 460 000 soudats tuats ò dispareguts e un milion de civius. De son caire, l'Axe perdiguèt aperaquí 200 000 òmes.