Type a search term to find related articles by LIMS subject matter experts gathered from the most trusted and dynamic collaboration tools in the laboratory informatics industry.
Albert Bedane (1893- 8 d'Janvyi 1980) 'tait un Jèrriais tchi fut r'connu pouor aver abrié des gens duthant l'Otchupâtion d'Jèrri.
I' fut né en 1893 à Angers en France mais li et ses pathents r'muîtent en Jèrri en 1894. Duthant ses jannes ans, i' pratitchait du sport: lé boxe, l'alanchie, la course et la gamme dé balle. I' trouvit un don pouor souongni les maux des joueurs dé balle qu'il' apprêciaient. Ayant êtudié don, i' d'vînt mâsseux d'mêtchi.
Duthant la Preunmié Dgèrre Mondiale i' sèrvit dans l'régînment des Hampshires en Înde et en Sibéthie où'est qu'il apprînt un brîn d'Russe. Quand i' tchittit l'armée en 1920 i' doctrinnait dans la Milice Rouoyale dé Jèrri. I' d'vînt un citouoyen Britannique d'vant la Cour Rouoyale en 1921.
Ses offices 'taient à 45 Lé Long Bouët, Saint Hélyi. Au mais d'Juîn 1940, sa femme Clara, eune Angliaîche, et lus fil'ye Valerie fûtent êvacuées en Angliétèrre (sa femme mouothit là en 1944), mais Albert restit. Viyant qu'il avait du run dans la grande maîson où'est qu'i' d'meuthait et travaillait au Long Bouët, il offrit du run là ès êcappés: d's escliaves Russes auve tchi qu'i' mênageait d'commeunitchit atout lé p'tit d'Russe qu'il avait apprîns en Sibéthie; un prisonnyi d'dgèrre Français; des cheins chèrchis par l's Allemands (coumme Francis L'Sueux); et eune Juive, Mary Richardson.
Missis Richardson, eune Hollandaise, 'tait la bouonnefemme d'un cap'taine èrtithé, Edmund Richardson, un Angliais du Lincolnshire. Les Richardsons démeuthaient à 8, Overseas Flats, la Rue du Di, pas bein liain d'siez Albert Bedane. Lé 25 d'Juîn 1943 Missis Richardson fut accompangnyie siez l'photographyi épis au College House où'est qu'les Allemands lyi fîtent eune entréveue pouor explyitchi qu'ou s'n'allait êt' r'muée dans un camp. En èrvénant siez lyi à seule fîn d'râmasser dé tchi, ou drissit siez Albert Bedane tchi la muchit dans san ch'lyi. Ou restit huit mais dans l'ch'lyi, épis pouor les préchains 22 mais ou d'meuthait dans eune pétite chambre à haut, s'èrmuchant dans l'ch'lyi quand d's allemands v'naient chèrfouoilli. Juste dévant la Libéthâtion au mais d'Mai 1945 ou r'allit siez lyi à la Rue du Di à seule fîn d'souongni san bouonhoumme tchi 'tait malade.
Au mais d'Mar 1966 l'gouvèrnément Soviétique baillit des mouontres en or ès cheins tch'avaient abrié des citouoyens Soviétiques duthant l'Otchupâtion - Albert Bedane 'tait iun d'ches r'chéveurs.
Lé 4 dé Janvyi 2000 i' fut r'connu coumme Juste parmi les nâtions par l's autorités d'Israël - ch'est l'seu citouoyen Britannique honothé d'même pouor chein qu'i' fit dans du tèrritouaithe Britannique.
En 2004 la Vîngtaine d'la Ville, auve l'Héthitage dé Jèrri, pliaichit eune pliaque sus la muthâle du site d'la maîson d'Albert Bedane dans l'Long Bouët. La pliaque fut dêvouailée par Messire Philip Bailhache, Bailli d'Jèrri l'6 d'Dézembre.
LIMS forum content by LIMS forum members is licensed under a Creative Commons Attribution-NonCommercial-ShareAlike 4.0 International License. Based on a work at www.limsforum.com.
