Knowledge Base Wiki

Apple is 1976 vun Steve Jobs un Steve Wozniak (Ökelnaam „Woz“) in de Garasch vun Jobs sien Öllern grünnt wurrn. För dat Startkapitaal harrn se Jobs sien VW-Bulli un Wozniak sien Hewlett-Packard Taschenreekner verköfft.

Steven Paul Jobs un Stephen Wozniak klabastern den eersten Reekner in de Slaapstuuv vun Job sien Öllern in Los Altos ut un maken dor 1976 den Apple I, de för 666 US-Dollar verköfft wurrn is. 1980 is Apple Computer in en Aktiensellschop ümwannelt wurrn un de fröhere Partnerschop mit de beiden Firmengrünner un Ron Wayne güng toenn.

Nadem Apple I nich so goot ankamen weer, keem de Spood mit den Apple II, den se mit dat Geld vun den Verkoop vun den Apple I produzeert harrn. Düsse Reekner is bet 1985 knapp twee Millionen maal verköfft wurrn.

In't Johr 1984 hett Apple den Macintosh, (Afkörtt: Mac) präsenteert. De Mac weer de eerste bruukbare Reekner mit een Muus un een graafsche Böversiet. De Mac hett en Paket vun brukbaren Programmen: Mac Write, en Schriefprogramm; Mac Paint, en Programm to'n Malen un Verännern vun Biller, de Taschenreekner un vele annere. Annere Anbeders hebbt för de Mac Programmen maakt, de bet hüüt verköfft warrt, to'n Bispill Word un Excel vun Microsoft.