Knowledge Base Wiki

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

De naas is 'n orgaan det veural deentje veure aomhaoling en 't ruke.

Bie de meiste gewèrveldje zitj de naas inne midde op 't gezich of aan 't ènj vanne snoet. In 'n naas zitte bieje meiste bieëster twieë naasgater. Aomhaole gebäörtj veurnamelik dore naas. De naas haet daobie es specifieke functie de lóch te reinigen en te verwurme veurdet die nao de lónge geitj.

De nate naas van zougdere deentj ouch veure richting vanne lóchstroum te bepaolen en maak daodoor de räökzin ouch richtingsgeveulig. Kaajreceptoren inne hoed reagere mit groeate geveuligheid oppe aafkeuling door verdamping ane kantj wo de lóchstrouming 't sterkste is.

Inne naas kónne zich ónger angere de volgendje aafwiekingen en aandeuninge veurdoon:

• Anosmie, e gebraek aan räökzin.
• Vestibulitis nasalis, óntstaeking vanne veurhaof vanne naas.
• Bie 'n erg verkaadjheid kónne de bieholdjes vólloupe mit naassliem en verstop waere. Es die hiedoor gaon óntstaeken is spraok van 'n bieholdjeóntstaeking (sinusitis). Dees kan chronische waeren en döks is den 'n operatie nuuedig.
• Naaspoliepe, meistes goodaerdig meh toch ouch hinjerlik, es gevolg van allergie of langdoerige infecties wie bieholdjeóntstaekinge.
• Aventoe kan zich inne naas- en bieholdjes kanker óntwikkele.
• In 't geval van 'n permanente naasverstopping kan 't 'nen inkele kieër nuuedig zeen veure naassjelpe chirurgisch te verkleinen of gans eweg te haole. Dees operatieve ingrepe staon bekèndj es conchareductie en turbinectomie.

't Behanjele van aandeuningen ane naas behuuertj toet 't wirkveldj vanne otorinolaryngologie, de tak vanne genaeskónde die zich specialiseertj inne bäövelste lóchwaeg.