Type a search term to find related articles by LIMS subject matter experts gathered from the most trusted and dynamic collaboration tools in the laboratory informatics industry.
Una galassia es un conjuntu d'estrellas, nubis e gas, pranetas, polvu cósmicu, materia oscura y nirgía uníus gravitatoriamenti con una estructura más o menus definía. La palabra «galassia» procedi de los griegus, los cualis atribuían la nacencia d'una galassia a las gotas de lechi esparramás en el universu pola diosa Hera mientras alimentaba al infanti Hercules.[1] La cantidá d'estrellas que forman una galassia es enormi y varía dendi las galassias enanas, con 107, hata las galassias gigantis, con 1014 estrellas.Prantilla:Cita requerida Formandu parti d'una galassia existin subestructuras comu las nebulosas, los cúmulus estelaris y los sistemas estelaris múltiplis.
Históricamenti, las galassias s'án clasificau d'acuerdu a la su forma aparenti (morfología visual). Una forma común es la galassia elíptica que, comu lo indica el su nombri, tié el perfil luminosu d'una elipsi. Las galassias espiralis tién forma circular pero con estructura de brazus curvus envueltus en polvu. Galassias inusualis se llaman galassias irregularis y son, normalmenti, el resultau de perturbacionis provocás pola atración gravitacional de galassias vecinas. Estas interacionis entri galassias vecinas, que puén provocal la husión de galassias, puén inducil l'intensa nacencia d'estrellas. Finalmenti, tenemus las galassias pequeñas, que carecin d'una estructura coherenti y tamién se las llama galassias irregularis.
Según estudius publicaus en 2016, s'estima qu'existin al menus 2 billonis e galassias (dos millonis e millonis) en el universu observabli, estu es, diez vecis más de lo que se creía anteriormenti.[2] La mayoría las galassias tién un diámetru entri cien y cien mil parsecs y están usualmenti separás por distancias del orden d'un millón de parsecs. El espaciu intergalácticu está compuestu por un tenui gas cuya densidá meya no supera un átomu por metru cúbicu.Prantilla:Cita requerida Una hartá las galassias están dispuestas en una jerarquía d'agregaus, llamaus cúmulus, que a la su vezi puein formal agregaus más grandis, llamaus supercúmulus. Estas estructuras mayoris están dispuestas en hojas o en filamentus rodeaus d'inmensas zonas de vacíu en el universu.
S'especula que la materia oscura constituyi el 90 % la massa en la mayoría las galassias. Sin embargu, la naturaleza d'esti componenti no está demostrá, y de momentu apareci solu com'un recursu teóricu pa sustental l'estabilidá observá en las galassias. La materia oscura hue propuesta inicialmenti en 1933 pol astrónomu suizu Fritz Zwicky, pues la rotación observá en las galassias indicaba la presencia d'una gran cantidá de materia que no emitía lus. Sin embargu, existin una hartá otras galassias además la nuestra. ¡Son tantas que aún no amus puíu contaglas a toïtas! El Telescopiu Espacial Hubble observó una cucufati porción del espaciu duranti 12 días y descubrió 10,000 galassias, de tós los tamaños, formas y coloris.
Argunas galassias tién forma d'espiral comu la nuestra. Tién brazus curvaus que hazin que paezcan molinetis. Otras galassias son lisas y tién forma d'óvalu. Se las denomina galassias elípticas. Tamién existen galassias que no tién forma ni d'espiral ni d'óvalu. Son de forma irregular y paecen manchas. La lus que nusotrus guipamus de cá una d'estas galassias provieni de las estrellas en el su interior.
A vezis las galassias s'acercan demasiau y se chocan entri sí. La Vía Láctea argún día colisionará con Andrómeda, el su vecinu galácticu más cercanu. Esti eventu tendrá lugar drentu de cincu mil millonis d'añus. Las galassias son tan grandis y están tan expandías en los extremos que, manqui se choquen entri sí, los pranetas y los sistemas solaris a menú no llegan a colisional.
En 1610, Galileo Galilei usó un telescopiu pa estudial la cinta lechosa en el cielu nocturnu llamá Vía Láctea, y descubrió que está compuesta por una inmensa cantidá de pequeñas estrellas.[3] En el año 1755, Immanuel Kant teorizó sobri l'estructura y las agrupacionis d'estrellas en el tratau Historia general la naturaleza y teoría del cielu, basau en un lavutu previu de Thomas Wright. Kant afirmaba que la Vía Láctea era un sistema formau por milis de sistemas solares comu'l nuestru, agrupaus en una estructura d'orden superior, de características similaris a las de los sistemas pranetarius, sensiblementi plana, de forma elíptica, en movimientu de rotación al reor d'un centru y regías pola mesma mecánica celesti. Tamién supusu que, pol puntu de vista dendi el que observamus la Vía Láctea y pola densidá d'estrellas visiblis qu'agrupa, el nuestru sol s'encuentra en el su mesmu planu y forma parti d'ella.[4] Dendi un planteamientu completamenti teóricu, Kant afirmó qu'era lógicu suponel l'existencia d'otrus pranetas y satélitis orbitandu al reor d'otras estrellas, y que debían existil otras «Vías Lácteas» separás a distancias d'un orden e magnitud comparabli al su vastu tamañu. Según el su razonamientu, estas galassias o universus isla teóricus serían visiblis dendi la Tierra comu nubis ovalás de lus tenui, sin que huera posibli distinguil las estrellas individualis drentu d'ellas. Kant las identifica con ciertus tipus e nebulosas, que Pierre Louis Maupertuis describió comu «pequeños lugaris cuya lus es sólu una mijina mayor que la oscuridá del espaciu celestial, toäs ellas con el aspectu d'elipsis más o menus abiertas, peru cuya lus es una hartá más débil que cualquier otra que conozcamus en el cielu».[5]
Hacia el final del sigru XVIII las galassias no avían síu descubiertas. Charles Messier compiló un catálogu (catálogo Messier) que contenía 103 objetus astronómicus que él denominó «nebulosas y cúmulus d'estrellas», seguíu más tardi pol catálogu elaborau por William Herschel, con hata 2.514 nuevus «objetus e espaciu profundu». En 1845, Lord Rosse construyó un nuevu telescopiu y que le permitió distinguil las «nebulosas» elípticas de las circularis. Esti telescopiu permiti guipal de manera parcial pa puel distinguil en argunas d'estas «nebulosas» huentis puntualis individualis de lus, confirmandu de manera parcial las anterioris conjeturas de Kant.
En 1917, Hebert Curtis avía observau la nova S Andrómeda, en la «nebulosa» de Messier M31. Buscandu en los registrus fotográficus, encontró otras 11 novas y observó que, en promeyu, estas novas eran 10 órdenis e magnitud más débilis que las ocurrías en la nuestra galassia. Comu resultau d'esta observación pú predecil que dichas novas se debían encontral a una distancia de 150.000 parsecs. Hebert se convirtió en un célebri defensor de la hipótesis de «universus isla», que sostenía que las «nebulosas espiralis» eran realmenti galaddias independientis.
En 1920 ocurrió el gran debati entri Harlow Shapley y Heber Curtis en tornu a la naturaleza de la nuestra galassia, las «nebulosas espiralis» y la dimensión del universu. Pa defendel la afirmación de que M31 era una galassia externa, Curtis argumentaba que las líneas obscuras observás en dicha «nebulosa» eran similaris a las nubis e polvu que s'observan en la nuestra, Vol. 5 (1925). Usal un nuevu telescopiu le permitió a Edwin Hubble resolvel las partis exterioris d'argunas «nebulosas espiralis» comu colecionis d'estrellas individualis. Más aún, Hubble pú identifical en esas estrellas argunas variablis cefeidas y éstas le permitun estimal la distancia a ichas «nebulosas»: estaban demasiau alejás para sel parti la Vía Láctea. En 1936, Hubble organizó un sistema de clasificación de galassias que entoavía es usau en los nuestros días: la secuencia de Hubble.
El primer intentu de describil la forma que tié la Vía Láctea hue llevau a cabu por William Herschel en 1785, contandu cuidadosamenti el númeru d'estrellas en distintas regionis del cielu. En 1920 Kapteyn, usandu un refinamientu de la técnica empleá por Herschel, sugirió l'imagin d'una pequeña galassia elipsoidal (15 kiloparsecs de diámetru), con el Sol cerca del centru. Con un métodu diferenti, basau en la distribución de cúmulus globularis, realizau por Harlow Shapley, emergió una imagin radicalmenti distinta: un discu planu con un diámetru aproximau de 70 kiloparsecs y con un Sol alejau del su centru. Nengunu los dos análisis tomó en cuenta la absorción la lus y el polvu interestelar presentis en el planu galácticu. Robert Julius Trumpler tomó en cuenta estus efectus en 1930, estudiandu cúmulus abiertus y produciendu l'imagen qu'actualmenti s'acepta de la nuestra galassia: la Vía Láctea es una galassia espiral con un diámetru aproximau de 30 kiloparsecs.
En 1944 Hendrick van de Hulst preíju que, debíu a la presencia d'idrógenu interestelar, puría detectalsi l'emisión de microondas de 21 cm de longol por parti d'esti gas. Esta radiación, detectá en 1951, á permitíu realizal mejoras en el estudiu la dinámica de galassias, en tantu que no es bloqueá pola presencia de polvu. El efectu Doppler pué usalsi pa estudial el movimientu d'esti gas en la galassia. Con la mejora de los radiotelescopius s'án puíu trazal nubis e gas d'idrógenu en otras galassias.
En 1970, Vera Rubin hizu un estudiu sobri la velocidá de rotación las galassias. El resultau d'esti y otrus estudius es que la massa conjunta las estrellas, polvu y gasis detectaus en una galassia es insuficienti pa sostenel la velocidá de rotación la mesma. Pa explical esta discrepancia s'á postulau l'existencia de materia obscura, inobservabli, pero cuya massa contribuya con la gravedá necesaria para mantenel las velocidáis e rotación observás.
A partil de 1990, con el telescopiu espacial Hubble y otrus telescopius espacialis, que cuentan con cámaras sensiblis al infrarroju, ultravioleta, rayus X y rayus gamma, el estudiu de galassias á mejoradu sustancialmenti.
La nuestra galassia, la Vía Láctea, perteneci a un Grupu Local d'unas cuarenta y seis galassias dominás pola Vía Láctea y la Galassia d'Andrómeda. Esti cúmulu s'encuentra en el límiti d'un «súper conglomerau» que comprendi casi cincu mil galassias. El súper cúmulu, a la su vezi, perteneci a otra enormi concentración e galassias reunías en massas compactas y suavis.
En Commons ai conteníu multimedia sobre Galassia.
LIMS forum content by LIMS forum members is licensed under a Creative Commons Attribution-NonCommercial-ShareAlike 4.0 International License. Based on a work at www.limsforum.com.
