Knowledge Base Wiki

El laurenciu ye un elementu químicu sintéticu, de símbolu Lr (antiguamente yera Lw) y númberu atómicu 103. Recibio'l so nome n'honor d'Ernest Lawrence, inventor del ciclotrón, un aparatu utilizáu pa descubrir dellos elementos radioactivos artificiales. El laurenciu ye un metal radioactivu, el decimoprimeru de los elementos transuránicos y, al tiempu, el caberu de los elementos de la serie de los actínidos. Neto que tolos demás elementos con númberu atómicu perriba de 100, la única forma de producilu ye bombardiando elementos más llixeros con partícules cargaes nún acelerador de partícules. Conócense anguaño doce isótopos del laurenciu. El más estable ye'l ²⁶⁶Lr, que tien una vida media d'once hores, magar que'l que más se utiliza, porque ye más fácil de producir a gran escala, ye'l ²⁶⁰Lr, que tien una vida media de 2,7 minutos.

Los esperimentos químicos tienen confirmao que'l laurenciu compórtase como un homólogu, más pesáu, del luteciu, y que ye un elementu trivalente. Esto permite clasificalu como'l primeru de los metales de transición del séptimu periodu. Por embargu, la so configuración electrónica ye anómala pa esta posición de la tabla periódica, una y bones tien una configuración s²p en cuenta de la s²d del so homólogu, el luteciu. Esto indica que'l laurenciu ye más volátil de lo esperable pola so posición na tabla periódica, teniendo una volatilidá comparable a la del plomu.

Nes décades de 1950, 1960 y 1970 dellos llaboratorios de la Xunión Soviética y los Estaos Xuníos reclamaron pa sigo la síntesis, en calidaes variables, del laurenciu. La prioridá del descubrimientu, y con ella la decisión del nome del elementu, foi reconocida pa los estauxunidenses pola Unión Internacional de Química Pura y Aplicada. En 1997, por embargu, reevaluose esta decisión, y magar que se-yos reconoció a estauxunidenses y soviéticos al empar el reconocimientu de la so síntesis, caltúvose'l nome del elementu.

• Wikimedia Commons tien conteníu multimedia tocante a Laurenciu.