Type a search term to find related articles by LIMS subject matter experts gathered from the most trusted and dynamic collaboration tools in the laboratory informatics industry.
El coeficiente Gini, índiz Gini o ratio Gini ye una midida de dispersión estadística creada cola intención de representar la distribución d'ingresos de los habitantes d'una nación, y ye la midida usada davezu pa medir la desigualdá. Foi desarrollada pol estadísticu y sociólogu italianu Corrado Gini, y espublizada na so obra de 1912 Variabilità e mutabilità (Variabilidá y mutabilidá)[1].
El coeficiente de Gini mide la desigualdá ente valores d'una distribución de frecuencies (por exemplu, niveles d'ingresos). Un coeficiente Gini de 0 (ó 0%) espresa la igualdá perfecta, na que tolos valores son iguales (por exemplu, cuando toles persones de la muestra reciben los mesmos ingresos). Un coeficiente de 1 (ó 100%) indica una desigualdá máxima ente los valores (por exemplu, cuando ún tien tolos ingresos y los demás nun tienen dengún). Ye posible alcontrar valores mayores de 1 pal coeficiente si hai persones que representen una contribución negativa al total (por exemplu, si tienen deudes -ingresos negativos-). En grupos grandes, sicasí, ye perdifícil alcontrar valores cercanos o superiores a 1.
Esti coeficiente foi propuestu por Gini como una forma de midir la desigualdá d'ingresos o de riqueza. Nos países de la OCDE, a finales de la década del 2000, y teniendo en cuenta l'efectu redistribuidor de los impuestos y les transferencies dende l'esterior, el coeficiente Gini movíase ente'l rangu del 0,24 d'Eslovenia y el 0,49 de Chile. Los países africanos teníen los mayores coeficientes pre-impuestos en 2008-2009, con un máximu en República Sudafricana, que'l so coeficiente estimábase ente 0,63 y 0,70, que baxaba al 0,52 al tener en cuenta los programes d'asistencia social y al 0,47 al incluyir nel coeficiente los impuestos. El coeficiente pa los ingresos mundiales en 2005 sitúase, según los diversos estudios, ente 0,61 y 0,68.
Hai delles cuestiones a tener en cuenta a la hora d'interpretar esti coeficiente. Asina, el mesmu valor puede dase con curves de distribución perdiferentes, y hai que tener tamién en cuenta a la hora de valoralu la estructura demográfica. Los países con un avieyamientu de la población o con munchos nacimientos tien un coeficiente previu a impuestos creciente magar que la distribución d'ingresos ente los adultos que trabayen remanezca constante. Pa intentar afinar el conceptu los académicos tienen desarrollao más d'una docena de variantes del coeficiente[2].