Informatics Educational Institutions & Programs
Contegnud
![](https://upload.wikimedia.org/wikipedia/commons/thumb/1/1b/Nebel_in_der_Region_Rh%C3%B6n_01386.jpg/250px-Nebel_in_der_Region_Rh%C3%B6n_01386.jpg)
![](https://upload.wikimedia.org/wikipedia/lmo/thumb/7/7b/Scighera_milanesa.jpg/220px-Scighera_milanesa.jpg)
![](https://upload.wikimedia.org/wikipedia/commons/thumb/1/1e/Scighera_a_Milan.jpg/220px-Scighera_a_Milan.jpg)
La scighera (ciamada anca gheba, nebia o borda se la visibilità l'è sotta de 1 km, ghiberinna o nebiètta[1] quand che la visibilità a l'è pussee de 1 km ma de men de 10Km) a l'è on fenomen metereologich che l'è provocaa de l'evaporazion de l'aqua che la gh'è in del soeul o in d'ona distesa de aqua in superfis. A contatt con l'aria, el vapor de l'aqua al vegn pussee fregg e 'l se condensa in d'on aerosol formaa de gott piscininn che rifrang la lus del Sô e la fan vegnì d'on colô pannaa (bianch).
D'Inverna in de la pianura padana al capita despess che ghe sia la scighera, soratutt dopo che 'l cala o 'l leva su el Sô. In sti daree ann de scighera ghe n'è 'n poo de men respètt a on temp.
La scighera la sa forma minga domà in pianura ma anca in del fond di vall.
Meccanismi de formazion de la scighera
A gh’è du meccanismi de formazion de la scighera: [2]
- Scighera de irradiazion. I scighér de irradiazion se formen al soeul a caosa di inversadùr tèrmich de irradiazion che se fànn su quand che el soeul el se infrèggia per via de la radiazion terrèstra e se infrèggen anca in strat de aria arent a soeul.
I condizion bon de fa formà i scighér de irradiazion hinn: [2]
- Ciel serén, de manera che el sia possìbil on raffreddament a la svèlta del soeul per irradiazion ( effètt sèrra scars). -di condizion anticiclonich indoe gh’è de la scarsa ventilazion e di mòti verticàj discendent che pròvochen di inversadur tèrmich de subsidenza e sbassen l’altèzza de messedada a on strat arent al soeul;
-stagion invèrnal;
-velocità del vent tra 2 e 5 noeud bon de mes’cià assée l’aria de fàla infrèggià a contàtt cont el soeul, ma mingà tròpp de falà scaldà cont i strat de sora.
- Scighera de advezion. La scighera de advezion a l’è quèlla che la se ingenera quand che ona massa d'aria ùmeda e relativament calda la curr adasi adasi sora ‘na superfice pussée frèggia. On esempi tipich a l’è quèll che la briza de mar la pòrta de l’aria calda marittima e donca ùmeda sora la terraferma pussée frèccia. [2]
Vos correlaa
Riferiment
- ↑ Mario Giuliacci (2010). Manuale di meteorologia (in italian). Alpha Test, 517. ISBN 88-483-1168-7.
- ↑ 2,0 2,1 2,2 Mario Giuliacci (2010). Manuale di meteorologia (in italian). Alpha Test, 519-521. ISBN 88-483-1168-7.