Informatics Educational Institutions & Programs
Zouk esas muzikala jenro qua pleesas precipue dum karnavalo en Antili, nome en Franca transmara departmenti Martinik e Guadelupa. Ol originis de Haitiana muzikala jenro compas dum la fino di la yari 1970a, e populareskis pos 1981, kun muzikala grupo Kassav'. La ritmo di zouk varias de 120 til 145 bati po minuto, kun emfazo en perkuto ed en sufl-instrumenti.
Segun Martinikana perkut-muzikisto Henri Guédon, dum la yari 1960a la vorto zouk referis loki ube populara muziki dansesis. La muzikala stilo nun konocata kom zouk aparis dum la fino di la yari 1970a, kun influi de Haitiana compas e kadans (ca lasta originis de altra Haitiana jenro, nomizita méringue. En 1980, Pierre-Édouard Décimus, muzikisto de la grupo Les Vikings de la Guadeloupe qua pleis kadans, unionis kun Freddy Marshall ed altra muzikisti e kantistino Jocelyne Béroard, por experimentar nova soni en la muziko quan li pleis. En 1980, Les Vikings de la Guadeloupe lansis lua duesma albumo Lagué mwen, en qua Jocelyne kantis en la koro di la kansono Soleil.
En 1981, Pierre-Édouard Décimus kontratis gitaristo Jacob Desvarieux, ilua fratulo e basisto Georges Décimus, e kantisto Jean-Philippe Marthély, e lansis l'unesma albumo di la bando Kassav'. La grupo komencis partoprenar spektakli ye la sam yaro, ed en 1982 kantisto Patrick Saint-Éloi ank eniris la bando. En 1983, la grupo lansis exitoza kansono Oh Madiana, ed en 1984, altra sucesoza kansono, Zouk la sé sèl médikaman nou ni.
