FAIR and interactive data graphics from a scientific knowledge graph

La Tunisìa è nu statu africanu di circa 10 miliuna d'abbitanti. Lu tirritoriu occupa na parti dâ costa miditirrania dû cuntinenti. Cunfina cu la Libbia a sud-est e l'Algirìa a ovest. A nord est è siparatu di la Sicilia dû canali di Sicilia. Ex culonia francisi, oggi si parra l'àrabbu e lu francisi; l'italianu è puru na lingua assai canusciuta pi via di la mpurtanti emigrazzioni tunisina in Italia e dû signali dâ tilivisioni italiana chi agghica nzinu ddà.

Cità mpurtanti sunnu Tùnisi, chi è la capitali; Sfax, Hammamet, Tozeur e li Gerbi, n'arcipèlagu oggi assai sfruttatu dû turismu.

Doppu la nnipinnenza n sequitu ô prucessu di deculunizzazzioni ca ntirissau tuttu lu cuntinenti africanu â mità dû XX sèculu lu Paisi canusciu nu piriudu di rilativa libbirtà sutta lu cuvernu di Habib Burghiba. Appoi Ben Alì lu diriggìu di manera dittaturiali. Ntô 2011 lu riggimi di Ben Alì s'appi a accapari e Ben Alì si n'appi a fujiri n Arabbia Saudita.

Attuarmenti la Tunisia attraversa nu piriudu di assistamentu puliticu. Nu parramentu avissi a ridìggiri na custituzzioni nova e àutri elizzioni avìssiru a siri urganizzati doppu la trasuta n viguri dâ custituzzioni.

Li rilazzioni di la Tunisia e dâ Sicilia sunnu di lonca data. Senza cuntari li guerri punichi, fu di la cità di Kairouan, di partìu lâ cunquista arabba dâ Sicilia ntô 827. Quarchi sèculu doppu, tra lu 1135, cunquista dê Gerbi, e lu 1159 li costi tunisini forru cuntrullati dî nurmanni di Sicilia. Oi l'emigrazzioni tunisina in Sicilia, chi si cumponi essenzialmenti di travagghiatura staggiunali e di piscatura (a Mazzara li tunisini sunnu circa lu 10% dâ pupulazzioni) custituisci na prisenza mpurtanti ntô tissutu sociu-ecunòmicu sicilianu.