FAIR and interactive data graphics from a scientific knowledge graph
Elio es un elemento cimical. Lo ave la simbol cimical He, numero atomal 2, e un peso atomal de sirca 4.002602. Lo ave 9 isotopos, sola du de cual es stable: 3He e 4He. 4He es la isotopo la plu comun. Elio es nomida un "gas nobil", car lo no misca normal en otra cimicas per formi composadas nova. Lo ave la punto de boli la plu basa ce tota elementos. Lo es la elemento du la plu comun en la universo, pos idrojen, e no ave un color o odor. Ma lo ave un brilia roja-orania cuando poneda en un campo eletrica. Astronomistes ia deteta la presente de elio en 1868, cuando sua spetro ia es identifiada en lus de la sol. Esta ia aveni ante ce lo ia es descovreda sur tera.
Elio es usada per pleni balones e airostatos car sua densia es plu lejera ca aira. Lo no arde, donce lo no es perilosa per esta usas. Lo es ance usada en alga tipos de ampolas. Umanas pote respira en elio: lo causa ce sua voses sona plu alta ca normal. An si esta pote es divertinte, lo es ance alga perilosa si on respira tro multe. Iposia pote fero o an mata on si on no es respirante aira normal, cual es esensal per vive. Ance, respira tro multe elio pote causa efetos durante a la cordas vosal.
Elio es creada tra la prosede de fusa nucleal en la sol e en stelas simil. En esta prosede (nomida la reata cadenal proton-proton - vide a destra), cuatro atomes de idrojen es fusada con lunlotra per formi un atom de elio. Sur tra, lo es creada par la dejenera natural de radioativia de elementos radioativa pesosa como torio e uranio. La particulas alfa emeteda par tal dejeneras es composada de nucleos de 4He.
Elio ia deveni rara sur tera. Si lo deveni libre en la aira, lo sorti de la planeta. No como idrojen, cual reata con osijen per formi acua, elio no es reatante, ma resta como un gas. Per multe anios pos la Ata de Elio de 1925, la SUA ia colie elio en un reserva de elio. Lo veni du posos en la area de la Planos Grande. A presente, plu elio es furnida par Catar ca par la SUA.
Alga organizas de rexerca ia presenta articles sur la raria de e nesesa per conserva elio. Esta organizas ia relasa sujestas tan temprana ca 1995 e tan tarda como 2016, urjente la governa de la SUA per conserva e reserva elio per la limitas natural de la cuantia de elio e la natur unica de la elemento. Per rexercores, elio es nonreponable car lo es esensal per produi temperatures multe basa. Elio a temperatures basa es usada en criojenia e alga aplicas de criojenia. Elio licuida es usada per fria alga metales a la temperatures estrema basa nesesada per supracondui, como un magnetes supraconduinte per imaji par resona magnetal.
