FAIR and interactive data graphics from a scientific knowledge graph
Aser es un alia de fero e carbono con fortia e resiste a frati bonida en compara con otra formas de fero. Par causa de sua tensa de rompe alta e custa basa, aser es un de la materias la plu comun fabricada en la mundo. Aser es usada en construidas, pontes, infrastrutur, utiles, barcones, trenes, autos, bisicles, macinas, aparatos eletrical, mobilas e armas.
Fero es sempre la elemento xef en aser, ma multe otra elementos pote es presente o ajuntada. Aseres nonosidinte, cual resiste corode e osidi, nesesa tipal un 11% plu de cromo.
Fero es la metal de base de aser. Dependente de la temperatur, lo pote ave du formas cristal (formas alotropo): cubo e sentrida a corpo e cubo e sentrida a fas. La interata de la alotropos de fero con la elementos de alia, prima carbono, dona a aser e fero moldida sua estende de cualias unica. En fero pur, la strutur cristal ave relativa poca resiste a la atomes de fero liscante a lado de lunlotra, e donce fero pur es multe formable. En aser, cuantias peti de carbono, otra elementos, e incluis en la fero ata como ajentes durinte cual preveni la move de deslocas.
La carbono en alias de aser tipal pote contribui a asta 2,14% de sua pesa. Variante la cuantia de carbono e multe otra elementos de alia, e ance la controla de sua composa cimical e fisical en la aser final (o como elementos disolveda, o como fases presipitada), impedi la move de la deslocas cual fa ce fero pur es formable, e donce controla e boni sua cualias. Esta cualias inclui la duria, la condui de tempera, la nesesa de recoce, la limita elastica, e la tensa de rompe de la aser resultante. La aumenta de la fortia de aser en compara con fero pur es sola posible par la redui de la formablia de fero.
Aser ia es produida en fornones basa tra miles de anios, ma sua usa industrial e a scala grande ia comensa sola pos cuando metodos plu eficas de produi ia es creada en la sentenio 17, con la introdui de la fornon alta e la produi de aser de crisol. Esta ia es segueda par la prosede de Bessemer en England en la media de la sentenio 19, e alora par la fornon de Siemens-Martin. Con la inventa de la prosede de Bessemer, un eda nova de aser produida en serie ia comensa. Aser mol ia recambia fero forjada. La statos deutx ia es la produores major de aser en Europa en la sentenio 19. La produi american de aser ia es sentrida en Pittsburgh, Bethlehem, Pennsylvania, e Cleveland asta la fini de la sentenio 20.
Refinas plu en la prosede, como la fabrica de aser par osijen fundal, ia recambia en la plu la metodos plu temprana par diminui plu la custa de produi e boni la cualia de la produida final. Oji, plu ca 1,6 bilion tones de aser es produida anial. Aser moderna es jeneral identifiada par grados diversa definida par organizas de normas variosa. La industria moderna de aser es un de la industrias de fabrica la plu grande en la mundo, ma ance un de la industrias la plu intensa en emete de enerjia e gases invernerial, contribuinte 8% de la emetes global. Ma, aser ance es multe reusable: lo es un de la materias la plu resiclida en la mundo, con un taso de resicli de plu ca 60% global.
