FAIR and interactive data graphics from a scientific knowledge graph

Hierdie artikel handel oor die etniese groep. Vir die taal, sien Grieks.

Grieke
Totale bevolking:	ca. 14–17 miljoen[1]
Belangrike bevolkings  in:	Griekeland ~10,8 miljoen[2][3]  Verenigde State 1,3[4]–3 miljoen[5]  Siprus 650 000[6][7]  Duitsland 395 000[8]  Australië 378 300[9]  Verenigde Koninkryk 290 000–345 000[10]  Kanada 252 960[11]  Albanië 200 000[12]  Oekraïne 91 000[13]  Italië 90 000[14][15]  Rusland 85 640[16]  Brasilië 50 000[17]  Suid-Afrika 45 000[18]  België 35 000[19]  Frankryk 35 000[20]  Bulgarye 28 500[21]  Argentinië 20 000–30 000[22]  Peru 16 000[23]  Georgië 15 000[24]  Swede 12 000–15 000[25]  Switserland 11 000[26]  Kasakstan 10 000–12 000[27]  Roemenië 10 000[28]  Oesbekistan 9 500[29]  Armenië 6 000[30]  Oostenryk 5 000[31]  Hongarye 5 000[32]  Turkye 4 000[33][34][35][36]  Pole 3 400[37][38]  Sirië 1 500[39]  Chili 1 500[40]  Meksiko 1 500 gesinne[41]
Taal:	Grieks
Geloofsoortuiging:	Grieks-Ortodokse Kerk
Verwante etniese groepe:	Ander Indo-Europese volke

Die Grieke (afgelei van Latyn: Graeci, letterlik: "Griekstalige volke"; Grieks: Έλληνες, Éllines, [ˈelines], letterlik: "Hellene") is 'n Indo-Europese etniese groep en nasie inheems aan Griekeland en omliggende eilande, Siprus, Albanië, Turkye, Suid-Italië en ander streke. Hulle deel 'n gemeenskaplike Griekse kultuur, afkoms en praat Grieks as moedertaal. Grieke vorm die titulêre nasie van Griekeland, waar hulle omtrent 95% van die bevolking uitmaak. Die meeste Grieke is aanhangers van die Grieks-Ortodokse Kerk (98%).^[42]

Sedert die Antieke tydperk bewoon Grieke die kus van beide die Egeïese en die Ioniese See, waar die Griekse taal sedert die Bronstydperk gepraat word. Die Antieke Grieke het vroeg met hul stigting van kolonies rondom beide die Middellandse en die Swartsee begin en handel bedryf. Vroeë kulturele sentrums sluit in Athene, Sparta, Thebe, Thessaloniki, Alexandrië, Smyrna en Konstantinopel. Die Grieke is bekend vir hul bydraes tot kultuur, kuns, verkenning, letterkunde, filosofie, politiek, argitektuur, musiek, wiskunde, wetenskap en tegnologie, besigheid, kookkuns en sport. Die Griekse mitologie is een van die mees bekende en het die latere Romeinse mitologie sterk beïnvloed.

Wêreldwyd leef tussen 14 en 17 miljoen Grieke, veral in Griekeland (10,8 miljoen), gevolg deur die Verenigde State (tussen 1,3 en 3 miljoen), Siprus (650 000), Duitsland (395 000), Australië (378 000), die Verenigde Koninkryk (tussen 290 000 en 345 000), Kanada (252 960) en Albanië (200 000). Nadat Wes-Duitsland in die 1950's en 1960's sy grootste ekonomiese opswaai beleef het, die sogenaamde "Wirtschaftswunder", is Grieke saam met Turke en ander nasies van die Middellandse See genooi om in dié land te gaan werk en woon. Tans leef sowat 45 000 Grieke in Suid-Afrika, veral in groot stede soos Kaapstad, Johannesburg en Pretoria.

• Wikimedia Commons het meer media in die kategorie Grieke.