Effects of the storage conditions on the stability of natural and synthetic cannabis in biological matrices for forensic toxicology analysis: An update from the literature

31°40′0″N 118°30′0″E / 31.66667°N 118.50000°E / 31.66667; 118.50000

  提示：呢篇文講嘅唔係鞍山。

馬鞍山
马鞍山市
花雨廣場路口街景
----
簡稱：馬
花名：詩城、鋼城
標語：聚山納川 一馬當先[1]
馬鞍山位置圖
國	中華人民共和國
省	安徽
地級政區	地級市
轄下一級政區	3區、3縣
設市時間	1956年10月12號
市長	左俊
市委書記	魏堯
政府駐地	雨山區太白大道2008號
地理
總面積	4049[2] km²
市區面積	704[2] km²
城市化率(2016)	66.49[3]%
人口
總人口(2016)	227.6萬人[3]
戶籍人口(2016)	229.35萬人[3]
市區(2016)	106.87萬人[3]
人口密度	562.11人/km²
民族	漢族
官方語言	普通話
本地語言	吳語、淮語
註	人口密度用總人口計總面積得出。
經濟
GDP(2016)	1493.76億元人民幣[3]
人均GDP	30437[3]
市區人均GDP	38142[3]
時間
時區	中國時區（UTC+8）
識別信息
電話區號	+86 (0)555
郵政編碼	243000
車牌	皖E
象徵
市樹	香樟[1]
市花	桂花[1]
友好城市
咸美頓、伊勢崎、昌原、阿間達·地·利、高嘉華、吉獅堡、特拉尼攀特拉、薩帕拉[4]
網站： 馬鞍山市府

馬鞍山（粵拼：maa5 on1 saan1；普通話拼音：Mǎ'ānshān）係安徽東部嘅地級市，叫馬鞍山市，係長江南岸嘅工業都市。西北面係滁州同合肥，西南面係蕪湖，東面係南京。

1956年設市，總面積4049平方公里，2012年總人口230萬，市府駐雨山區。馬鞍山係中國十大鋼鐵基地之一。

馬鞍山地方離南京好近，六朝時係畿輔，係京都要地，稱爲「金陵屏障、建康鎖鑰」，所以南北朝到唐宋都有好多名公巨卿、賢達雅士來過呢度。比如李白嘅《望天門山》、劉禹錫嘅《陋室銘》、王安石嘅《遊褒禪山記》都喺呢度寫成。今日馬鞍山西南邊嘅採石磯係稱爲「長江三大磯之首」嘅有名斷崖，上面起嘅太白樓係長江四大樓閣之一，相傳李白船上醉酒，想去撈水中月結果浸死喺呢處，因此有好多人來呢度追思李白，呢度打過採石之戰，係金朝海陵王遠征南宋時打嘅。

到咗近代，馬鞍山地方係長江南岸歷史幾耐下嘅煤炭、鐵礦產地，從長江口向上行船240公里左右就到。1930年代呢度通鐵路，開發出淮南煤田以及鐵礦，之後日本侵華，佢哋想搶馬鞍山嘅礦產。不過喺二戰當中產業設備都破壞曬，直到1953年馬鞍山先恢復返，之後喺中共嘅五年計劃之下急速發展。馬鞍山亦都產硫磺同石灰，因此除咗鋼廠，亦有水泥廠。1954年馬鞍山升爲縣級政區，1956年10月12號設馬鞍山市。

相傳楚漢相爭到最後，西楚霸王項羽畀劉邦韞咗喺垓下，四面楚歌，霸王別姬之後，敗退和縣烏江（馬鞍山境內），請船伕渡佢匹座騎烏騅馬去江東，之後佢話無面見父老，自刎烏江。佢匹愛馬見主人死咗，於是跳落江陪佢去，啲人搵返匹馬嘅馬鞍，將馬鞍葬喺附近嘅山來紀念，是爲「馬鞍山」。又有一種講法，係箇馬鞍化成山，所以呢帶啲山箇樣似馬鞍。

春秋戰國時，呢度畀吳國、越國、楚國統治過。秦朝時屬丹陽郡。東晉咸和四年（329年），因為衣冠南渡，喺南陵僑置當塗縣（舊當塗縣喺安徽懷遠），永和元年（345年）喺牛渚（而家採石）僑置豫州。南梁天監元年（502年）喺採石置南丹陽郡。

隋開皇九年（589年）當塗縣治搬去姑孰，之後無逳過。北宋太平興國二年（977年）喺姑孰設太平州，轄地有當塗、蕪湖、繁昌。元朝改名太平路，明朝至正十五年（1355年）太平路改名太平府，一直延續到民國，民國廢除府，當塗直屬安徽。

1954年2月17號喺金泉鄉嘅基礎上設馬鞍山鎮，屬當塗，係縣級政區，呢個係第一個以「馬鞍山」做名嘅政區。1955年8月設馬鞍山礦區，屬蕪湖專區。1956年10月12號從當塗分出做省轄市。

• 1956年10月12號，安徽省蕪湖專區當塗縣分出部分（馬鞍山礦區、採石鎮）成立馬鞍山市（1市）
  • 11月18號，當塗再畀多忽（1市）
    • 26號，設郊區（1區）
• 1958年5月21號，馬鞍山降級，併入蕪湖專區。
  • 10月22號，馬鞍山恢復地級，兼且拼入蕪湖專區嘅當塗縣、和縣、含山縣（1市3縣）
    • 28號，設馬鞍山區、向山區、採石區、郊區（4區3縣）
  • 11月，當塗畀噉啲去蕪湖專區蕪湖市（4區3縣）
• 1959年3月22號，和縣同含山合併爲和含縣（4區2縣）
  • • 23號，當塗、和含畀咗蕪湖專區（4區）
• 1961年6月21號，馬鞍山區、採石區併入郊區（2區）
  • • 27號，向山併入郊區（1區）
  • 7月3號，蕪湖專區和含縣畀咗部分去郊區（1區）
  • 12月15號，蕪湖專區當塗縣畀咗部分去郊區（1區）
• 1962年9月，郊區分割爲金家莊區、採石區、向山區（3區）
• 1963年6月，金家莊、採石、向山各出部分做郊區（4區）
• 1964年4月，郊區畀咗部分去去蕪湖專區當塗縣（4區）
  • 10月17號，金家莊、採石、向山再次合併到郊區（1區）
• 1969年4月16號，郊區分出部分做馬鞍山區、採石區（3區）
• 1972年3月27號，蕪湖地區當塗縣畀咗部分去郊區（3區）
• 1975年9月9號，馬鞍山區分割成四新區、花山區，採石區分割做雨山區、向山區（5區）
• 1978年7月1號，郊區畀咗部分（船山石灰礦山）去江蘇省鎮江地區鎮江市（5區）
• 1979年10月8號，郊區併入向山（4區）
  • 12月14號，四新區改名爲金家莊區（4區）
• 1983年9月6號，向山重新分出郊區（5區）
  • 10月8號，宣城地區嘅當塗縣畀返來，當塗畀咗部分去蕪湖市郊區（5區1縣）
• 1984年10月29號，郊區併入向山（4區1縣）
• 2001年7月1號，向山分入去金家莊、花山、雨山（3區1縣）
• 2004年5月29號，當塗畀咗部分入雨山（3區1縣）
• 2011年7月14號，巢湖市含山、和縣返咗來，和縣畀咗部分去蕪湖市鳩江區（3區3縣）
• 2012年9月5號，金家莊合併入花山，當塗畀咗部分成立博望區（3區3縣）

「馬鞍山」嘅意思係「似馬鞍噉嘅山」，馬鞍山地方畀啲矮細嘅山仔圍住。因為當地政府嘅目標係令馬鞍山入圍中國十大潔淨城市，所以比較落力治理環境，相比中國其他鋼鐵業城市，馬鞍山嘅環境污染無咁犀利。氣候上同其他長三角城市類似，夏天時濕度低，冬天時唔會好凍。7、8月時係雨季。

主要產業係鋼鐵業，馬鞍山人力豐富，好多工仔同馬鞍山鋼鐵（馬鋼）有關。

2005年時因鋼廠設備擴張，產量大增。馬鞍山發展緊嘅製造業以及快速交通建設，令佢嘅主要產業吸引咗大量投資。

而家馬鞍山年均製造業投資量排安徽第一，GDP排第四，排喺合肥、安慶、蕪湖之後。馬鞍山嘅人口喺省內排第十六，而人均GDP去到兩萬近三萬，排安徽第一，水平接近長三角。

交通發展令馬鞍山嘅經濟、產業水平提升到國家平均水準之上。馬鞍山有深水河港兼稅關，連通咗華東沿海同長江流域嘅內陸城市，令物流快而平。馬鞍山離南京祿口機場40公里，可以直接飛去中國各地同歐洲。喺公路上馬鞍山有高速路去南京、上海、杭州、寧波、合肥、蕪湖。

馬鞍山轄3區、3縣。

花山區 雨山區 博望區 當塗縣 含山縣 和縣

市轄區 雨山區 花山區 博望區

縣 當塗縣 含山縣 和縣

• 加拿大咸美頓
• 日本伊勢崎
• 韓國昌原
• 西班牙阿間達·地·利（Arganda del Rey）
• 澳洲高嘉華（Municipality of Kogarah）
• 美國吉獅堡（Galesburg, Illinois）
• 墨西哥特拉尼攀特拉（Tlalnepantla de Baz）
• 阿根廷薩帕拉（Zapala）