Knowledge Base Wiki

Dodom
Dodoma (suahili i angl.)

Valdkund	Tanzanii
Eläjiden lugu (2012)	410,956 ristitud
Pind	2,576 km²
Pämez'	Devis Mvamfupe (heinku 2017—, Davis G. Mwamfupe)
Telefonkod	+255−26
Aigvö	UTC+3

Dodom (suah. i angl.: Dodoma) om Tanzanijan pälidn. Se om Dodoman agjan administrativine keskuz tähäsai mugažo.

Eländpunktan aluz om pandud vl 1907 kuti torguindlidn udel raudtel Germanijan Päivnouzmaižes Afrikas. Kätihe lidnad Dodoman agjan administrativižeks keskuseks valdkundan alusenpanendan aigaspäi vl 1964. Vspäi 1996 om Tanzanijan oficialižeks pälidnaks, sirtihe Dar Es Salamaspäi.

Dodom šingotase pälidnan funkcijoil. Om ümbärtud maižanduzrajonal. Vspäi 2007 anglikanižen jumalankodikundan universitet i Dodoman valdkundaline universitet (35 tuhad üläopenikoid) ratas lidnas.

Lidn sijadase valdkundan keskuzpalas, savannan tahondas, 1120 m ü.m.t. keskmäižel korktusel. Matkad Dar Es Salamhasai om 460 km päivnouzmha avtotel vai raudtedme.

Klimat om subekvatorialine kaks'sezonine pol'kuiv. Kun keskmäine lämuz om +22..+26 C° vodes läbi, ekstremumad oma +8 C° i +36 C°. Paneb sadegid 607 mm vodes, kuiv sezon oleskeleb semendkus-redukus (8 mm pordos).

Vl 2012 eläjiden lugu oli 410 956 ristitud, vl 1974 — 40 tuhad ristituid. Vaiše 625 km² om urbaniziruidud lidnan territorijal. Läz 2,2 mln eläjid om lidnaglomeracijas (2020).

Rahvahad oma afrikanižed igähižed: njamvezi, džagga, haja, gogo, masai da toižed rahvahad, hö ottas 99 % ristitištos.

Religijan mödhe videndez oma riman katolikad, om anglikanižen jumalankodikundan, islaman i sikhizman pühäpertid.

• Lidnan da sen agjan oficialine sait (dodoma.go.tz). (angl.) (suahili)