Knowledge Base Wiki

Lu poker è unu dî jocura cchiù diffusi dû munnu. Si joca sulitamenti in quattru, cu li carti ca vannu dû setti ô k cu l'assi. A l'inizziu ogni jucaturi metti na puntata niziali, poi unu duna cincu carti l'unu e quannu finisci s'accumincia lu giru pi vidiri si quarcunu po' "gràpiri" lu jocu. Pi gràpiri c'è bisognu armenu di na coppia di jack. Quannu quarcunu grapi, tutti chiddi ca vonnu cuntinuari a jucari hannu a puntari chiddu ca punta lu jucaturi ca grapi; si un po' grâpiri nuddu, si mmìscanu arrè li carti e s'accumincia arrè lu giru. Passata l'apirtura, lu jucaturi ca detti li carti cancia li carti a tutti li jocatura ca li vonnu canciati. Si ponnu canciari màssimu quattru carti e si quarcunu voli canciati quattru carti, si ci dùnanu tri carti sùbbitu e una â fini dû giru. Quannu si finisci di canciari li carti, lu jucaturi ca grapìu, si voli, fà la so' puntata, altrimenti si po' ritirari dû jocu o passari la parola ô jucaturi succissivu ca po fari li so stessi cosi. A ogni puntata ca si fa, ogni àutru jucaturi po decìdiri si arritiràrisi, puntari quantu lu jucaturi ca fici pi primu la puntata oppuri rilanciari ô rialzu. Ogni jucaturi po rilanciari li puntati di l'àutri, ma non li so. Finita sta fasi li jucatura ca arrèstanu càlanu li carti e cu havi la cumminazzioni ca vali cchiossai, vinci.

Dû vasciu versu l'àutu, chissi sunnu li cumminazzioni dû poker:

• coppia (du' carti uguali)
• duppia coppia (du' coppi di carti uguali)
• tris (tri carti uguali)
• scala (cincu carti di valuri consecutivu di semi vari)
• full (combinazioni di un tris e nna coppia)
• poker (quattru carti uguali)
• culuri (cincu carti dû stessu semi)
• scala riali (na scala cu li carti tutti dû stessu semi)

Naturalmenti tra du cumminazzioni uguali, vinci chidda li cui carti hannu lu valuri cchiù àutu, ricurdànnusi ca lu valuri cchiù àutu l'hannu l'assi e poi si va dî k a scìnniri. Pî cumminazzioni di semi li cchiù mpurtanti sunnu chiddi di cuori, poi chiddi di quatri, poi chiddi di ciura e pi ùrtimi chiddi di picchi.