Knowledge Base Wiki

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

L'arrianismo ya a doctrina d'o bispe Arrio (256-336), qui enta l'anyo 318 ixemenó a suya oposición a lo concepto de trinidad, negando que no bi ha tres personas en dios y no bi n'ha d'atra que o Pai. Afirma tamién que Chesucristo no ye divín y que fue creyato por Dios pa que lo aduyase en o suyo plan.

En l'anyo 320 Aleixandre, o bispe d'Aleixandría convoca un sinodo que excomulga a Arrio por hereche. Manimenos l'arrianismo como doctrina sencilla s'estendilla por a part oriental de l'imperio a escape, sobre tot en a población humil, labradors, pastors, siervos y soldatos.

En l'anyo 325 Constantín convoca o concilio de Nicea, que condena l'arrianismo. Manimenos Constancio II, o fillo de Constantín refirmó a l'arrianismo y bi habió emperadors arrians. Teodosio I persiguió l'arrianismo.

O Concilio de Costantinoble de l'anyo 381 significó a muerte oficial de l'arrianismo en territorio imperial, quedando ya con pocos seguidors. Manimenos l'arrianismo s'heba ixemenato fueras de l'Imperio Romano arribando en os pueblos chermanicos. Ulfilas cristianizó a los godos y lis introdució tamién l'arrianismo.

Os chermans que invadioron l'Imperio Romano d'Occident reintroducioron l'arrianismo, que resistió bel tiempo a lo catolicismo en los reinos que creyoron os vándalos, visigodos, ostrogodos, burgundios y longobardos: Reino Vandalo d'Africa, Reino Visigodo de Tolosa, Reino Visigodo de Toledo, Reino Burgundio, ecetra...

Os visigodos de l'aria danubiana se convirtioron a l'arrianismo enta l'anyo 370, y permaneixioron arrians cuan creyoron o Reino Visigodo de Tolosa y cuan emigroron a Hispania pa formar o Reino Visigodo de Toledo. A mesura que iban ocupando a Peninsula Iberica sustituiban a los bispes catolicos por bispes arrians. O rei Amalarico, casato Clotilde, filla de Clodoveu I prebó de fer-la convertir-se a l'arrianismo, pero murió en combate con o chermano de Clotilde en Narbona.

Bi habió persecucions contra os catolicos con os reis Teudis, Teudiselo y Achila, y a mayor tensión entre catolicos y arrians se produció en o reinato de Leovichildo, en o que bi habió una revuelta catolica dirichita por o suyo fillo Hermenechildo.

O rei Recaredo, aconsellato por Sant Leandro veyió convenient a conversión d'os visigodos a lo catolicismo y unir a visigodos arrians y hispanorromanos catolicos. Convocó o III Concilio de Toledo en l'anyo 587, abchuró de l'arrianismo y establió l'arrianismo como relichión oficial. Manimenos quedoron visigodos que se resistiban a convertir-sen a lo catolicismo.